2
Mattathias neh A ca rhoek
1 Semimeon capa, Johan kah a ca Mattathias tah, khosoih Jehoiarih imkhui kah tue vaengah Jerusalme loh puen uh tih Modein ah kho a sak.
2 Mattathias he capa panga om tih Johan Gaddi,
3 Simon Thassi,
4 Judas Makkabaeus,
5 Eleazar Avaran neh Jonathan Apphus om.
6 Judea neh Jerusalem ah a saii tholhnah boeih te Mattathias loh a hmuh.
7 Te dongah, Balae tih sarhing koi hno hmuh ham ka thang, Ka pilnam neh khopuei cim kah pocininah aih he, Ngaidaeng la ka ngol sut mai aya? khopuei he rhal taengla a yalh vaengah, Bawkim he kholong kut la a cungku vaengah.
8 Bawkim khaw aka hinyahna hlang om pawt bangla,
9 A rhuepomnah neh a thingcam te khaw, kutbuem bangla a khuen uh coeng. Ka ca rhoek te longpuei caehtung ah a ngawn uh coeng. Cadong rhoek khaw rhal kah cunghang dongah duek.
10 Diklai namtom boeih loh khopuei te a loh uh, a koerhang khaw boeih a huen uh coeng.
11 A thingcamnah khaw vawl a hlih uh coeng, Sal la om tih a loeih voel moenih.
12 Bawkim he solah, Gentiles loh a tanghnong thil, a rhuepomnah khaw tal coeng,
13 Balae tih a hing la vawk m'van mai eh,” a ti.
14 A rhah uh vaengah khaw Mathathias neh a ca rhoek loh tlamhni te a bai uh a dung la phat rhap uh.
Kholong Bawknah
15 Te vaengh pilnam te Pathen taeng lamloh nong ham aka tanolh manghai kah a boei rhoek te kholong kah hmueih nawn ham aka tanolh la Modin khopuei la cet uh.
16 Amih doe ham te Israel hlang muep cet uh tih Mattathias ca rhoek khaw thum uh.
17 Manghai kah a boei rhoek loh, “Nang tah he khopuei ah mawtkung hinyahkap la na om tih, namah koca neh na huiko long khaw m'bongyong.
18 Balae tih manghai kah olpaek te na vai pawh? Gentile boeih neh Judea pilnam boeih, Jerusalem kah kah aka om pilnam boeih loh saii hamla oepsoeh uh coeng. Na saii koinih namah neh namah koca rhoek ngawn tah manghai kah yapa n'thangpom vetih, cak neh, sui neh, kutdoe khaw muep m'paek ni,” a ti nah.
19 Mattathias loh ol a huel tih, “He ram khuikah Gentile boeih loh manghai ol a ngai tih, a pa rhoek kah bawknah hnawt hamla yalh uh cakhaw ka mawn pawh.
20 Kamah koca, kamah huiko neh kai tah Pathen loh a pa rhoek taengah a saii paipi te ni phat ka vai eh.
21 Pathen kah bomnah nen tah a olkhueng aka hnawt tih a olpaek aka aek la ka om uh mahpawh.
22 Kaimih kah bawknah khosing he ka thovael uh tarha lah ve, manghai kah oltloek te tah ka ngai uh mahpawh,” a ti nah.
23 Ol bawt a thui vaengah Modein lamkah hlang rhoek khuikah pakhat long tah manghai kah oltloek te ngai hamla cai uh coeng. Te dongah tekah aka pai hmueihtuk dongah kholong hmueih te nawn ham la hlang boeih kah a hmai la cet.
24 Mattahias loh anih te a hmuh vaengah a saii tangtae khaw koep saii rhoeh hil a thintoek. A thintoek neh a thuen doel a yong phhai tih tekah hlang te hmueihtuk bantang a ngawn.
25 Pilnam te hmueih nawn hamla aka tanolh mangpa boei te a ngawn tih, hmueihtuk te a palet pah.
26 He tlam ni, Phinehas loh Salu capa Zimri a ngawn vaengkah bangla olkhueng dongah a dung la a lungmu te Mattathias loh a tueng sak.
27 Te phoeiah Mattathias khopuei la cet tih, “Pathen kah paipi dongah a thi aka cak tih, a olkhueng aka ngaih boeih loh kai hnuk ha bang uh,” tila pang.
28 Te tlam te amah neh anih koca rhoek tah tlang la yong tih a khuehtawn boeih te a caeh tak.
29 Te khohnin lamloh tah Israel khuikah a kumngai tah olkhueng ngainah neh aka dueng Pathen te tlap ham khosoek ah khosa la muep cet uh.
30 Mangmu loh a nan uh tih a patang uh aih coeng dongah, a yuu a ca khaw, a boiva khaw, boeih a khuen uh.
31 A ngen loh manghai kah olpae a aek uh dongah cet uh tih khosoek ah thuh uh tila manghai taengah ol te tlek a pha bal.
32 Rhalkap caempuei te loh amih a hloem tih amih a kae vaeng tah a rhaldan ah rhaeh uh. Te vaengah amih te Sabbath hnin ah tloek hamla cai uh.
33 Sap a duem uh vaengah tah Judah rhoek te a doek uh tih, “Halo uh laeh, manghai ol te ngai uh, na hingnah kan hlun bitni,” a ti nah.
34 Te vaengah, “Ka loh uh mahpawh, Sabbath hnin te ka poeih mahpawh, manghai ol te khaw ka ngai uh mahpawh,” ti uh.
35 Rhalkap rhoek loh amih te pahoi a tloek coeng.
36 Tedae Judah rhoek loh pakhat khaw thung uh pawh. A thuh nah lungko khuirhai ah lungto thinglong pakhat khaw paluet uh pawh.
37 “Mingcimnah a caih la ka duek u eh, a duengmueh la kaimih nan nueihnah uh te vaan neh diklai loh phong nawn saeh,” a ti uh.
38 Te dongah amih te rhal loh Sabbath hnin ah a tloek uh, tongpa khaw, huta khaw, camoe khaw boiva khaw a ngawn. te vaengah pilnam thawngkhat duek.
39 Te te Mattathias neh a hui rhoek loh a yaak vaengah a ko bahoeng thae uh.
40 Te dongah khat neh khat te, “Mah Judah pueipo bangla mamih kah hingnah neh bawknah huul ham Gentile rhoek ke tloek ham n'thanah koi ni mamih he diklai hman lamloh n'thup pawn ni,” a ti uh.
41 Te khohnin ah tah khat khat amih te Sabbath hnin ah ni a tloek atah amaih te huul uh thae pawn sih, te daengah ni lungko khuikah aka due a hui Judah rhoek bangla n'duek pawt eh a ti uh.
Khikhak la Rhalthohnah
42 Te phoeiah tah Mattathias neh a hui rhoek te, aka cik rhoihui long khaw, namlung Judah rhoek long, thaomthathueng neh, Israel kah thinom hlang rhoek long khaw, olkhueng hul hamla aka tlungmu rhoek long khaw a bongyong uh.
43 Te phoeiah hnaemnah khui lamloh aka loeih boeih long khaw amih te bongyong tih a caempuei te tha a om uh.
44 Rhalkap te a khueh coeng dongah a thintoek a sah uh tih, hmuiyoi Judah te a ngawn uh. Te rhoek van khaw a loeihnah hamla Gentile taengla yong uh.
45 Mattathias neh a hui rhoek tah kho tom la cet uh tih hmueituk te a palet uh.
46 Israel khori khuiah ah pumdul la a hmuh tongpa boeih tah yahhmuirhet hamla a tanolh uh.
47 Thaihtak la Gentile khoboei rhoek te khaw, a manghai rhoek khaw a thup uh.
48 Moses kah olkhueng te Gentile kut lamloh a huul uh tih boethae manghai Antiochus kah saithainah te a phae uh.
Mattahias kah Olnoi
49 Mattathias te a duek ham tue a pha vaengah tah amah koca rhoek te, “Kuthlahnah neh kothaenah tue he om. Thinlen hlang loh a tukk tih mamih he nueihbu la n'khueh.
50 Tedae ka ca rhoek nang tah olkhueng dongah tlungmu uh lamtah, Pathen neh a pa rhoek kah paipi huul ham tah duek ham khaw sikim uh.
51 A pa rhoek loh balae a sai tih amah tue vaengah metlam a cungkuem uh ti khaw poek uh. Amih kah awtkoi te vai uh lamtah a lenkoek thangpomnah neh a duek thai mueh mingthangnah te m'paek bitni.
52 Abraham te a noemcai vaengah khaw Boeipa dongah pangtungnah a khueh dongah Boeipa loh anih te a uem tih a doe te khaw poek.
53 Joseph khaw ngaihmang tue vaengah Pathen kah olpaek a ngai dongah Egypt khohmuen ah ukkung la om.
54 A pa Phnehas khaw a tlungmunah loh a cahoeh donah a cadil te khosoih la phat om sak ham olkhueh a paek.
55 Joshua khaw Moses kah olpaek te a ngai dongah Israel kah laitloekkung la om.
56 Kaleb khaw pilnam hamla olthangthen a mael puei dongah thapang la khohmuen rhakthuem a paek.
57 David khaw Pathen taengah a uepomnah te a cak dongah, a cadil te kumhal kah manghai la om ham olkhuehnah a paek.
58 Elijah khaw olkhueng dongah a tlungmu dongah vaan la a khueh.
59 Hananiah, Azariah neh Mishael khaw tangnah a khueh uh dongah hmai khui lamloh loeih.
60 Daniel tah thincak hlang la om, te dongah Boeipa loh anih te sathueng ka khui lamkah a hlawt.
61 He kah a pa rhoek he awtkoi la lo uh. Boeipa dongah pangtungnah aka khueh boeih tah pakhat khaw a thaomnah a bawt tlaih moenih.
62 Halang hlang rhoek kah phaepnah te rhih uh boeh. Amih duek uh vetih a rhuepomnah khaw bawt ni, a pum rhong vetih a rhit long ni a caak eh.
63 Tihnin ah a nih te muep phuel uh mai cakhaw, thangvuen ah hma hae ni. A pum te diklai la mael vetih, a poeknah boeih khaw bawt ni.
64 Ka ca rhoek nangmih tah namning sak lamtah Olkhueng hutlnah dongah rhalthen sak uh. Te olkhueng nen ni thangpomnah a len koek te na dang eh.
65 Na manuca Sion tah cueih, kai taengkah bangla anih ol te hnatun uh yoeyah.
66 Judas Makaabaes khaw a hing khuiah a thaom. Anih loh ol m'pae vetih, thunkha taengkah caemtloek vaengah khaw nangmih m'mawt bitni.
67 Pathen olkhueng aka ngai boeih te nangmih taengla khue uh. Na pilnam soah boethae aka saii te a phu lo uh saeh.
68 Gentiles rhoek khaw amamih kah khoboe bangla thung uh lamtah Boeipa ol neh a olpaek te ngai uh yoeyah,” a ti nah.
69 Te phoeiah Mattahias loh amih te yoethen a paek.
70 Anih te Modein kah amah cako phuel ah a up. Te vaengah Israel pilnam boeih cet uh tih anih te mat a rhah uh. He tah kum ya sawmli kum rhuk vaengah aka om hno ni.