8
Roman kah Khokhannah
1 Judas loh Roman rhoek kah a thang te a yaak. Amih tah a tha bahoeng om uh tih amah te huitai la aka coeng boeih khaw a then la voek hlak. A taengla aka cet boeih tah pa ya la boeih a khueh.
2 A tha boehoeng a om uh dongah a thui tangtae bangla, rhalthennah neh boeih a ta uh. Amih loh Gaul rhoek a ta tih, Gual rhoek te mangmu thoh sak ham a tanolh te khaw,
3 Spain khohmuen te a saii tih sui hmuen te cak hmuen a loh pah te khaw,
4 Amih lamloh hla sitoe cakhaw a mangtaengnah, thinsennah neh rampum boeih a taemrhai thai te khaw, Te dongah diklai khobawt lamloh amih aka muk manghai tah a tlak yoeyah te khaw, amih te puenthae neh a phop tih kum takuem mangmuh a thoh sak te khaw a ming.
5 Roman rhoek loh Philip neh Makedonia mangha Perseu te khaw, amaih taengah aka tloe lamkah aka thoo rhoek te khaw caem neh a phop uh.
6 Amih te tloek hamla Asia manghai Antiocus a ham loh, vuei ya pum kul, marhang cem neh, leng neh, caempuei neh a paan dae a yawk sak.
7 Roman rhoek loh anih te a hing la a khuen uh tih amah khaw, a hnuk aka manghai rhoek long khaw mangmu muep thoh sak ham, tamna la a tuuk rhoek neh a khohmuen a then boeih, Roman kut dongah tloeng ham ol a tloek pah.
8 India ram neh, Media, Lydia khaw te khaw anih taeng lamloh a loh pa tih, manghai Eumenes taengah a paek pah.
9 Amih te Greek loh phae hamla a taeng bal dae vik a phoe pah.
10 Te dongah Greek te rhalboel loh a paan tih amih te a ngawn. Greek te hmalaem la muep om tih cungku uh. Te dongah Roman huta camoe khaw te tamta la a khuen tih a poelyoe pah. Khohmuen te a loh pah tih hmuencak khawa koengloeng pah tih tihnin due sal a bi sak.
11 Ram neh tui sanglak aka om long amih te muep a tloelh dae amamih te a phae tih sal a bi sak.
12 Tedae paya la aka khueh a taenga aka kuep hlang tah paya la a kueh van. A hla a yoei la manghai te khaw muep a na coeng dongah a thang aka ya boeih loh amih te a rhih uh.
13 Amih loh bom a ngaih tih a manghai sak ngaih hlang tah a manghai sak mai. Khoe ham a ngaih hlang tah a khoe mai tih amamih khaw muep pomsang uh.
14 Tedae amah khuikah hlang te pakha khaw oekhlawnnah ham rhuisam khaw khuem pawt daidi khaw a bai uh moenih.
15 Amah khuikah laipai a khueh uh tih laipai ya pakul loh hnin takuem, pilnam kah khosaknah neh amih kah ukktaemnah te a thui uh.
16 A ram ukktaem ham te kum khat ah hlang pakhat tloep tloep a pangtung coeng. Te taengah lu rhip a thuk uh tih a khuiah uethentnah neh thatlainah om pawh.
Roman neh Paya la Omnah
17 Te dongah Judas loh Accos koca Johan capa Eupolemus, Eleazar capa Jason te a tuek tih Rome la paya tlap ham neh paipi saii ham a tueih.
18 Greek loh Israel he sal rheprhep a khueh aih vaengah tah hnamkun khui lamloh loeih a ngaih uh.
19 Rome la a caeh uh vaengah a longcaeh bahoeng sen. Amih te laipai im a pha uh vaengah tah,
20 “Makkabeus la a khue Judas neh a manuca rhoek, Judah kah pilnam boeih loh kaimih he nangmih taengla n'tueih coeng. Nangmih neh huitai la om tih rhoepnah om thoh pawh sih,” a ti nah.
21 Te kah ol te amih long khaw a ngaih uh.
22 Amah khohnin ah hlatnah ca te rhohum cabael dongah koep a daek uh. Te te Jerusalem la amih neh rhen a pat tih rhoepnah huitai poekkoepnah la a khueh uh. Te kah capat dongah,
23 Roman neh khaw, Judah namtu nen khaw, tuitunli ah khaw, lan ah khaw rhoepnah net cet yoeyah saeh. Cunghang neh rhal khaw amih lamloh hla yoeyah saeh.
24 Caemrhal he Rom taengah khaw, a uknah ram kah a huitai taengah khaw a puek atah,
25 Amih taengah a thuinuet bangla Judah namtu loh amah huitai bangla thinko boeih te rhep saii saeh.
26 Rhalthohnah aka saii te tah Roman kah oltloeknah bangla cang khaw, lungpok haica khaw, tangka khaw, sangpho khaw pae boel saeh.
27 Amah te tlam te rhalthohnah he Judah namtu lamloh a thoeng lamhma atah, huitai khaw Roman loh a ngaih bangla saii saeh. Amih taengah Roman loh a tueng sak van bangla.
28 A rhal te tah cang khaw, tangka khaw, sangpho khaw Roman kah oltloek bangla pae boel saeh. Olrhi he khoem saeh lamtah thailatnah om mueh la vai saeh.
29 Te dongah he ol nen he Roman loh Judah pilnam neh paipi a ok uh.
30 He phoeiah khaw voeivang loh thap ham khaw, hnawt ham khaw ol a om atah koep thap thai saeh. Voeivang loh rhen a thap tih a hnawt te khaw cak sak saeh.
31 Manghai Demetrius loh amih soah a thae a saii te khaw a dangkah bangla koep a daek uh. Nang loh balae ti kai patai neh paya Judah soah hnorhih neh na nan.
32 Tahae ah nang kawng ha puen uh coeng atah kaimih loh amih kah hamcum te ka huul puei ni. Nang te tuipuei long neh lan long khaw kan muk ni,” a ti nah.