TINGTOENG LUNG
(The Book of Psalms)
Tingtoenglung Cabu Kawng
Tingtoenglung he Greek ol la (Psalms) a ti. He kah cabu dongah laa, hlohli, tingtoenglung, thangthuinah rhen a tael. He cabu a tael he kum 500 tluk di ni. He olpuei la thangthuinah, thothuengnah neh Pathen koeh bawknah ham a mangtaeng. He cabu dongah he thinko lungbuei kah ngaihuetnah kothaenah neh omngaihngah, sungdaehnah neh ngaiuepnah, uepvawtnah neh ueppangnah, patangnah neh hloepnah, thintoeknah neh uehnah kawng thui. Bible cabu dongah Tingtoenglung cabu dongah kah a yet koek koep a loh uh. Pathen uemonah neh koehnah kawng, khodaeng vaengah Pathen khuenah, rhal ta vaengah umponah kawng a thui. He cabu a yet ngai tah a boel la thui pawt tih cabu la a thui. Cabu a bawtnah takuem ah Amen, Amen neh a bawt sak. Tingtoenglung (Psalms) cabu he 400b.c lamloh 100 b.c khuiah a tael.
Sawt Yoeinah
Laabu I—Suencuek Laa (Genesis) 1—41
Hlangdueng kah yoethennah 1
Boeipa kah tlang cim 15
Pathen tah suenkung ni 19
Messiah tingtoengah 22
Bomnah ham thangthuinah28—41
Laabu II—Sunglatnah Laa (Exodus) 42—72
Rhingoelnah 42
Cimnah ham thangthuinah 51
Hlawtnah ham thangthuinah70—72
Book III—Thothuengnah Laa (Leviticus) 73—89
Koep thoh ham thangthui nah 80—89
Laabu IV—Lampahnah Laa (Numbers) 90—106
Pathen poengnah93
Pathen kah khobae-rhambae 105
Laabu V—Olkhueng Rhaepnah Laa (Deuteronomy) 107—150
Pathen Olcim 119
Uepom Pathen 128
Sitlohnah Pathen 145
Thangpom Pathen 149—150
CABU I
1
Longpuei Panit
1 Halang rhoek kah cilsuep dongah aka cet pawt tih,
hlangtholh rhoek kah longpuei ah aka pai pawh,
hmuiyoi rhoek kah tolrhum ah
aka ngol pawt hlang te tah a yoethen.
2 Tedae BOEIPA kah olkhueng dongah a hlahmae tih
khoyin khothaih olkhueng dongah aka thuep tah,
3 Sokca tui taengah a phung thingkung bangla
a om dongah amah tue ah a thaih thaii tih,
a hnah khaw hoo pawh.
A saii boeih te khaw thaihtak.
4 Halang rhoek tah te tlam pawt tih
anih te cangkik bangla yilh loh lat a yawn.
5 Te dongah halang rhoek te laitloeknah dongah,
hlangtholh rhoek te hlangdueng
rhaengpuei taengah, tlai thai mahpawh.
6 BOEIPA loh aka dueng rhoek kah
longpuei te a ngaithuen dongah
halang rhoek kah longpuei tah khoep bing ni.