4
1 Cakol khaw a khuel atah then ngai mai coeng, Aka khuel kah poeknah tah nguel. Te ni Pathen neh hlanghing long a ming puei.
2 Te te a om vaengah pilnam loh a awt, A khum vaengah khaw a ngaidam uh. A tue takuem ah khoong tih caemthang a khuem, kutdoe hamla loehlangnah dongkah tanah te khaw cuemcaih.
3 Tedae lailak rhoek kah cadil pul cakhaw cawmthawk mahpawh, Halhca tah a huiko khaw a yung cak pawt tih, likloek sut mai.
4 A hlaeng a baek te thingsup la bu mai cakhaw a cang moenih, Khohli a caeh vaengah hinghuen tih hlithae loh a yungah a phil.
5 A ham hlan ah a baek khaw tlawt tih, a thaih khaw hmang thai pawh. Caak ham khaw hmin laklo pawt tih, hmang ham khaw coeng pawh.
6 Yinhnuk kah a cun camoe he khaw, Pathen loh a cawh vaengah tah, A manu napa kah boethae aka mingpha sak kung la poeh.
7 Tedae aka dueng tah a camoe ah duek mai cakhaw, ngaimong la om ni.
8 Patong hinyahnah a om he a khohnin a puh neh, a kum tue a sen la a taeng dawk mai nen moenih.
9 Tedae yakmingnah a khueh te ni sampok n'ti vetih, Khosak cawtboe a kap pawt ni patong lungcuei n'ti eh.
10 Pathen loh kolonah a khueh tih a lungnah hlang khaw om, Te dongah hlangtholh lakli ah kho a sak vaengah a loh.
11 Amih te dak a koeih daengah ni hnothae loh amih kah yakmingah te a hoilae pawt vetih a hinglu te vuelvaek pawh eh.
12 Halang kah mueimang loh a payawk vaengah hnothen te a hmaang tih, Huengaih kah cahoehnah loh lungbuei mingcimnah khaw a palet.
13 A tue toi neh a cuum la a om pah vaengah kum a sen kah khaw a cup pah,
14 A hinglu tah Boeipa taengah maelhmai then a dang tih, halang lakli lamloh a mih te tlek a doek.
15 Hlang a yet loh a hmuh daeh yakiming pawt tih, He kawng he thuep pawh. Pathen kah lungvatnah neh sitlohnah tah a hlangcoel taengah om tih, A hlangcim rhoek soah amah loh dawndah.
Hlangdueng kah Caemthang
16 Hlangdueng la aka duek loh hlangtholh la aka hing te a cawh vetih, Lungcuei la kah camoe loh hlangtholh la aka hing patong te ol a caek ni.
17 Hlangcueih kah dueknah te a hmuh uh vaengah, Boeipa loh amih ham metla a poek pah tih, daemnah ham metla a khoembael khaw yakming uh mahpawh.
18 A hmuh vaengah a hnaep uh mai khaming, Tedae Boeipa loh a ho hamla amih te a nueih thil.
19 Olmueh lamni amih te diklai ah a daep vetih, rhamrhae neh khosoek lamni rhep a khueh eh. A tloh ni a yook uh vetih, Amih poekkoepnah khawh hmata ni.
Laitloeknah Hnukkhueng
20 A tholhnah te a thoelh pah vetih, a halang khoboe te a hmai ah a yaal pah vaengah a thuen doela ha pawk uh bitni.