8
1 Amah long tah diklai khobawt lamloh, diklai khobawt duela a pha tih, a cungkuem he a then la a saekboe.
Solomon loh cueihnah a lungnah
2 Amah te ka lungnah tih amah camoe lamloh ka tlap, amah te ka rhoipang la loh ham ka hue. Te dongah a lungsak loh n'cahoeh.
3 Anih cunnah khaw Pathen taengkah khosaknah neh a thangpom tih, Anih te Boeipa a cungkuem la a lungnah.
4 Amah te Pathen mingnah neh a saep tih, A bisai neh a bongyong.
5 Khosaknah dongakah khuehtawn a hue te boei la om koinih, A cungkuem aka thoeng sak cueihnah metlam a boei ngai eh.
6 Yakmingnah he khuekcet la a om atah, Aka om aka hlinsaikung amah he metlam a om ngai eh.
7 Pakhat long khaw duengnah te a lungnah atah, a thatloh phu khaw a khuet om. Cueinah loh kuemsuemnah, muelhtuetnah tiktamnah neh thaphohnah te a cangpuei.
8 Hmuhnah a ka la aka lamtawn boeih loh, hno rhuem neh hmalong aka thoeng ham hno khaw a ming. Amah dongah miknoek neh kopoekrhainah khaw, khoning neh a tue lamkah aka thoeng khaw mingnah om.
9 Te dongah amah te ka taengah khosak sak ham loh ka ngaih tih amah loh lungpoek then m'paek ni tila ka ming.
10 Te dongah hlangping lakah thangpomnah ka khueh vetih, ka noe cakhaw a ham hmaiah hinyahnah ka dang ni.
11 Laitloeknah dongah khaw huiko la ka om vetih, Ukkung rhoek kah mikhmuh ah khaw a lang ka om ni.
12 Duem ka ngam vaengah kai n'rhing uh vetih, Ka thui vaengah khaw hna a kaeng uh ni. Yulh ka thui vaengah nim te a mih loh, A ka buem uh saeh.
13 Anih rhangneh aka nguel pawt lamloh ka daem vetih, Ka hnukah aka lo rhoek ham kumhal kah poekkoepnah la ka om ni.
14 Pilnam khaw ka khoboei thil vetih, Namtom khaw kai taengah boe a ngai ni.
15 Manghai hlang muen khaw ka thang a yaak vaengah let ni. Pilnam taengah ka tatthai khaw ka tueng sak vetih, Caemtloek vaengah ka thinomnah te tueng ni.
16 Ka im la ka kun vaengah amah taengah duemnah ka dang, Amah neh ka puei uh vaengah khahingnah khaw om pawh. Amah neh khosaknah he tah a tloh om pawt tih, Omngaihnah neh kohoenah ni a om.
17 He he a khuicing ka poek tih ka thinko ah ka thuep, Cueihnah he huiko la om he aka nguel hno ni a om.
18 Amah neh paya la om te cilping la ka ngaingaih, A kut dongkah thakthaenah dongah aka bawt pawh khuehtawn khaw om, Amah neh pueinah, yakmingnah, mingnah dongah, A ol rhekrhanah khaw n'thum sak.
19 Ka camoe neh amah poek ah m'paek tih, ka hmulung dongah hinglu then khaw tla,
20 Aka cim pumsa dongah ka kun tih, A then la lat ka om coeng.
21 Te te Pathen loh m'paek pawt atah, Cueihnah ka dang mahpawh tila ka ming. Te tah cueihnah aka pae kung te mingnah ham khuiben kah noeknah ni. Te dongah Boeipa te ka hloep tih ka oep. Ka thinko boeih neh ka thui.