62
Siona ena ladana matamatana
1 Siona dainai egu uduna do lau hakapua lasi,
bona Ierusalema dainai egu hereva do lau koua lasi,
ela bona Siona ena kara maoromaoro do ia hedinarai,
daba rere ena diari bamona,
bona Siona ese Dirava ena hamauria ia abia,
be kede bamona do ia diaridiari.
2 Ierusalema e, bese idauidau taudia ese,
oiemu kara maoromaoro do idia itaia.
King ibounai ese oiemu hairai do idia itaia.
Ladana matamata oi dekenai do idia atoa.
Lohiabada sibona ese inai ladana oi dekenai do ia henia.
3 Oi be korona mai hairaina danu do oi lao,
Lohiabada ena.
Oi be kwara gauna namo herea do oi lao,
oiemu Dirava ena.
4 Oiemu ladana be do idia atoa lou lasi,
“Iena Tau Ese Ia Rakatania Hahine.”
Bona oiemu tano be do idia gwauraia lou lasi,
“Anina Lasi Tano.”
To oiemu ladana matamatana be,
“Dirava Ese Ia Moalelaia.”
Bona oiemu tano be do idia gwauraia,
“Headava Vadaeni.”
Badina be Lohiabada ese oi dekenai ia moale noho,
bona oiemu tano be ia ese do ia adavaia.
5 Badina be uhau ta ese rami hebou kekeni ia adavaia noho bamona,
oi ia haginia Tauna ese oi do ia adavaia.
Headava matamata tauna ese iena adavana ia moalelaia hegeregerena,
oiemu Dirava ese unai bamona oi do ia moalelaia.
6 Ierusalema e,
oiemu magu edia latanai,
gima taudia lau atoa vadaeni.
Dina bona hanuaboi ibounai be hereva do idia gwauraia noho.
Idia ese Lohiabada do idia hamaoroa noho,
ia ese iena gwauhamata ibounai do ia badinaia,
bona iena gwauhamata ta do ia laloaboio lasi.
7 Idia ese danu Lohiabada ena laga-ani abia dalana do idia koua,
ela bona ia ese Ierusalema ma do ia haginia auka lou,
hanua namona,
tanobada taudia ibounai ese,
idia hanamoa noho gauna do ia halaoa totona.
8 Lohiabada ese gwauhamata metauna momokani ia gwauraia vadaeni,
bona ia ese iena siahu dekena amo do ia karaia haorea.
Ia gwau, “Lau ese emui uiti,
be umui idia tuari henia taudia dekenai do lau henia lou lasi,
bona idau taudia ese emui uaina,
umui hekwarahi totona gauna,
be do idia inua lou lasi.
9 To uiti idia hadoa,
bona anina idia haboua taudia ese do idia ania,
bona idia ese Lohiabada do idia hanamoa.
Bona vain umui naria,
bona edia huahua umui haboua taudia ese,
emui uaina do umui inua,
egu Dubu Helaga ena koua maguna lalonai.”
10 Ierusalema taudia e,
hanua ena murimurinai do umui lao,
bona emui bese taudia edia raka lou mai dalana ta do umui karaia.
Laolao dalana do umui hagoevaia,
do umui karaia hegaegae.
Nadi do umui gogoa noho!
Pepe ta do umui abia isi ataiai,
bese idauidau taudia do idia itaia bona diba totona.
11 Do idia diba Lohiabada ese,
tanobada ena kahana ibounai ia hamaoroa noho, ia gwau,
“Ierusalema taudia do umui hamaoroa, do umui gwau,
‘Lohiabada be ia mai noho,
umui do ia hamauria totona.
Ia ese ia naridia bona ia hamauria vadaeni taudia,
be ia danu do ia mailaidia.’ ”
12 Umui emui ladana be do idia atoa,
“Dirava Ena Bese Helagana,
Lohiabada Ese Ia Hamauria Vadaeni Besena.”
Bona Ierusalema hanua ena ladana do idia atoa,
“Dirava Ese Ia Lalokau Henia Noho Hanua,”
bona, “Dirava Ese Ia Rakatania Lasi Hanua.”