13
Dabua auka rami
1 Lohiabada ese lau Ieremia ia hamaoroa inai bamona: “Oi lao, dabua auka rami ta do oi hoia, bona maoromaoro do oi karaia, ranu dekenai do oi atoa lasi.”
2 Vadaeni lau ese rami ta lau hoia, Lohiabada ena hereva hegeregerena, bona lau karaia.
3 Vadaeni Lohiabada ese lau dekenai ia hereva lou, ia gwau,
4 “Oi hoia vadaeni rami do oi abia, do oi toreisi, Euperate Sinavai dekenai do oi lao, unuseni nadi ena matuna ta dekenai do oi hunia.”
5 Vadaeni lau lao, Euperate Sinavai ena badibadinai rami lau hunia, Lohiabada ena oda hegeregerena.
6 Dina momo idia ore murinai Lohiabada ese ma lau ia hamaoroa, ia gwau, “Oi toreisi, Euperate Sinavai dekenai do oi lao, unai rami ma do oi abia lou.”
7 Vadaeni Euperate Sinavai dekenai lau lao, rami lau hunia gabuna dekenai, to lau abia neganai lau itaia, ia be dika vadaeni, negea gauna sibona.
8 Unai neganai Lohiabada ese lau ia hamaoroa, ia gwau,
9 “Lau ese Iuda ena hekokoroku bona Ierusalema ena hekokoroku bada be unai bamona danu do lau hadikaia.
10 Inai kara dika taudia ese lau idia kamonai henia lasi momokani, idia ese sibodia edia laloa auka bona dika dekena amo, dirava idaudia idia tomadiho henia, bona edia hesiai gaukara idia karaia. Inai taudia be inai rami, negea gauna, hegeregerena do idia lao.
11 Badina be rami be tau ena gaba dekenai ia dogoatao namonamo bamona, lau ura Israela bona Iuda bese taudia be lau dekenai idia dogoatao namonamo noho. Badina lau ura egu bese taudia ese egu ladana dekenai hanamoa bona hairai do idia henia. To idia ese lau idia kamonai henia lasi. Lau inai Lohiabada lau hereva vadaeni.”
Uaina ena hodu
12 Lohiabada Dirava ese lau ia hamaoroa, ia gwau, “Ieremia e, Israela taudia do oi hamaoroa, ‘Emui uaina hodudia ibounai uaina dekenai do umui hahonua be namo.’ Vadaeni idia ese oi dekenai do idia haere, do idia gwau, ‘Oi laloa ai be ai diba lasi, uaina hodu ibounai uaina dekenai idia honu be idia namo, a?’
13 “Unai neganai oi ese idia do oi hamaoroa, ‘Lohiabada ese inai bamona ia gwau: Lau ese inai tano taudia ibounai be uaina dekenai do lau hahonua, do idia kekero momokani, taudia inai: King taudia, unai be Davida ena bese taudia, hahelagaia taudia, peroveta taudia, bona Ierusalema taudia ibounai danu.
14 Unai neganai lau ese idia ta ta be idia sibona ta ta dekenai do lau botaia hebou, eregabe bona buruka danu, ela bona idia ibounai do lau hamakohia maragimaragi, uaina hodu momo idia makohia maragimaragi bamona. Lau be idia dekenai do lau bogahisihisi lasi momokani, bona idia ibounai do lau alaia ore.’ ”
Ieremia ese Israela taudia ia sisiba henidia, do idia hekokoroku lasi
15 Israela taudia e,
Lohiabada ese ia hereva vadaeni gauna do umui kamonai:
Do umui hekokoroku lasi,
bona iena hereva do umui kamonai.
16 Lohiabada emui Dirava do umui hanamoa,
ia ese tano dekenai dibura do ia havaraia lasi neganai.
Badina ororo be dohore dibura bada dainai,
emui aedia do idia hekwakwanai.
Diari do umui tahua,
to Lohiabada ese dibura masemase dekenai do ia halaoa.
Inai karadia do idia vara lasi neganai,
Lohiabada do umui hanamoa.
17 To bema egu sisiba umui kamonai lasi neganai,
lau ese emui hekokoroku dainai,
hunia dekenai do lau tai.
Do lau tai bada herea,
egu matana ranu do ia diho,
badina be Lohiabada ena bese,
be tuari taudia ese idia abia mauri vadaeni.
18 Lohiabada ese lau Ieremia ma ia hamaoroa, ia gwau,
“King mai iena sinana danu do oi hamaoroa, do oi gwau,
‘Emui helai gabudia dekena amo do umui diho mai,
henunai do umui helai,
badina be emui kwaradia dekenai idia noho korona gaudia,
be emui kwaradia dekena amo do idia moru.’ ”
19 Negebe kahana hanua ibounai,
edia magu ikoukou idia koua vadaeni.
Edia ikoukou kehoa totona tau ta be lasi.
Iuda taudia ibounai be tuari taudia ese idia abia lao vadaeni.
Idau tano dekenai, daudau gabuna do idia noho totona,
mai guia danu idia abidia lao.
20 Ierusalema hanua e,
oiemu matana do oi negea!
Mirigini kahana dekena amo,
oi hadikaia totona tuari orea ia mai noho.
Oiemu mamoe,
Lohiabada ese oi dekenai ia henia,
do oi naridia totona,
unai tau namodia be edeseni?
21 Oi dekenai idia manada vadaeni,
bona oi laloa idia be oiemu turana korikori taudia,
be Lohiabada ese oiemu biaguna do ia halaoa neganai,
oi be edena bamona do oi hereva?
Hisihisi ese oi do ia abia,
hahine ese natuna ia havaraia hisihisi bamona, ani?
22 Vadaeni unai neganai sedira oiemu lalona do oi tahua,
do oi gwau,
“Badina dahaka inai hisihisi lau dekenai idia vara,
bona dahaka dainai egu dabua idia kokia,
bona lau idia hadikaia?”
Inai kara idia vara,
badina oiemu kara dika be bada dainai.
23 Etiopia tauna ese iena kopina ia haidaua diba, a?
O lepadi ese iena kopina toutoudia do ia kokia diba, a?
Bema inai bamona idia karaia diba neganai,
umui kara dika dekenai umui manada Ierusalema taudia ese,
kara namodia do umui karaia diba.
24 Lohiabada ese umui do ia lulua lao gabu idauidau dekenai,
lai be tano kaukau dekena amo,
uiti momoru ia hodaia lao noho bamona.
25 Lohiabada ese ia hereva vadaeni,
umui emui davana korikori be inai,
badina be umui ese ia umui laloaboio vadaeni,
bona dirava koikoidia dekenai umui abidadama henia vadaeni dainai.
26 Lohiabada ese emui dabua do ia kokia,
emui hemarai be taunimanima do idia itaia totona.
27 Lohiabada ese ia itaia vadaeni,
umui ese ia badu henia karadia,
bona heudahanai, bona sihari kava karadia, umui karaia noho.
Ia ese umui ia itaia,
unai karadia be ororo bona uma gabudia dekenai umui karaia.
Ierusalema taudia e,
madi umui be dika do umui davaria!
Umui be goeva lasi ela bona edena negai?