14
Ieroboama ena natuna mero ia mase
1 Unai neganai king Ieroboama ena natuna Abaisa ia gorere.
2 Vadaeni Ieroboama ese iena adavana ia hamaoroa, ia gwau, “Oi toreisi, oiemu toana do oi haidaua, taunimanima do idia diba lasi oi be Ieroboama ena adavana, bona Silo dekenai do oi lao. Unuseni peroveta tauna Ahaisa dekenai do oi lao. Guna ia gwau lau be Israela ena king do lau lao.
3 Paraoa dekenai idia gabua beredi 10, keke haida, bona hani danu kavabu lalonai do oi abia lao. Iseda mero dekenai dahaka do ia vara be Ahaisa ese oi dekenai do ia hamaoroa.”
4 Ieroboama ena adavana be unai bamona ia karaia. Ia toreisi, Silo dekenai ia lao, Ahaisa ena ruma dekenai ia ginidae. Inai Ahaisa be gau ta ia itaia lasi, badina madi ia buruka.
5 To Lohiabada ese Ahaisa ia hamaoroa guna, ia gwau, “Kamonai, Ieroboama ena adavana be ia mai noho oi dekenai, iena natuna totona oi do ia nanadaia, badina ia gorere.” Bona Lohiabada ese hahine dekenai dakaka do ia hereva gauna be Ahaisa dekenai ia hadibaia.
Hahine be ia ginidae neganai ia be ia koikoi, ia gwau ia be idau hahine ta.
6 To ia be iduara dekenai ia raka vareai neganai, Ahaisa ese iena aena regena ia kamonai, bona ia gwau, “Ieroboama ena adavana e, oi raka vareai. Badina dahaka oi koikoi noho, oi gwau oi be idau hahine ta? Badina be hereva metauna oi totona Lohiabada ese lau dekenai ia henia vadaeni.
7 Do oi lao, Ieroboama do oi hamaoroa, oi gwau, ‘Lohiabada, Israela ena Dirava, be inai bamona ia hereva: Taunimanima edia huanai dekena amo lau ese oi lau abia hidi, Israela taudia edia gunalaia tauna oi lau halaoa.
8 Basileia be Davida ena iduhu dekena amo lau kokia, oi dekenai lau henia, to oi be egu hesiai tauna Davida hegeregerena lasi. Ia ese egu oda hereva ia kamonai henia, bona egu murinai ia raka momokani, bona egu vairana dekenai kara maoromaoro sibona ia karaia.
9 To oiemu kara dika ese king gunadia edia kara dika idia hanaia momokani. Oi ese lau dekenai tomadiho kara oi negea vadaeni, dirava idaudia, bona havevea auri dekena amo karaia kaivakuku oi karaia vadaeni, do oi tomadiho henidia totona.
10 Unai bamona oi karaia dainai, lau ese oi Ieroboama oiemu bese taudia do lau hadikaia. Oiemu natuna tau bona tubuna tau ibounai, maragidia bona burukadia danu, oiemu bese ibounai do lau alaia ore. Idia be Israela dekena amo do lau kokia, haida ese kukuri idia daroa oho bamona.
11 Bema oiemu bese tauna ta be hanua dekenai ia mase neganai, sisia ese do idia ania, o bema hanua ena murimurinai ia mase neganai, ataiai manudia ese do idia ania, badina Lohiabada ese unai bamona ia gwauraia inai.’ ”
12 Ma peroveta tauna Ahaisa ese Ieroboama ena adavana ia hamaoroa, ia gwau, “Oiemu ruma dekenai do oi giroa lou. Oiemu hanua dekenai oi raka vareai neganai, oiemu natuna be do ia mase.
13 Israela taudia ibounai ese ia totona do idia taitai, bona ia do idia guria. Ieroboama ena bese edia huanai, inai mero sibona be guria gabuna namona dekenai do idia guria, badina ia sibona dekenai be Lohiabada, Israela ena Dirava, ese ia moale henia.
14 “Badina be hari dina Lohiabada ese tau ta do ia abia hidi, bona Israela ena king dohore ia halaoa. Inai king ese Ieroboama ena bese taudia ibounai do ia alaia mase.
15 Bona Lohiabada ese Israela do ia panisia, bona Israela be gari dainai do ia mareremarere, sinavai dekenai siriho ia mareremarere bamona. Lohiabada ese inai tano namona, edia sene taudia ia henidia tano dekena amo, Israela taudia do ia kokia, bona Euperate Sinavai unai kahana dekenai do ia luludia lao, badina idia dekenai ia badu momokani, Asera dirava hahine ena kaivakuku idia karaia dainai.
16 Lohiabada ese Israela do ia rakatania, badina Ieroboama ese ia kara dika, bona ia ese unai kara dika dekena amo Israela taudia ia hakaudia kerere dainai, kara dika ma idia karaia.”
17 Ieroboama ena adavana be ia toreisi, ia raka lao, Tirisa hanua dekenai ia ginidae. Iena ruma dekenai ia raka vareai neganai, iena natuna mero ia mase.
18 Israela taudia ibounai ese ia totona idia taitai, bona idia guria, peroveta tauna Ahaisa, Lohiabada ena hesiai tauna, ena uduna dekena amo Lohiabada ese ia gwauraia hegeregerena.
Ieroboama ia mase
19 Ieroboama ena kara oredia, iena tuari, bona iena lohia karadia, edia sivarai be Israela ena King Edia Sivarai Buka ena lalonai idia torea vadaeni.
20 Ieroboama ena lohia negana be lagani 22. Ia mase, bona iena natuna Nadaba ese king dagi ia abia, Ieroboama ena gabu dekenai.
King Rehoboama, Iuda ena king
21 Rehoboama, Solomona ena natuna tau, be Iuda ena king. Iena mauri lagani be 41 neganai king dagi ia abia, bona lagani 17 lalonai Ierusalema dekenai ia lohia. Ierusalema be Lohiabada ese Israela ena iduhu ibounai edia huanai ia abia hidi, unai hanua dekenai iena Ladana do ia noho totona. Rehoboama ena sinana be Namaha, Amono hahine.
22 To Iuda taudia be Lohiabada ena vairanai idia kara dika, bona edia kara dika dekena amo idia ese Lohiabada idia habadua. Edia kara dika ese edia sene taudia edia kara dika idia hanaia.
23 Badina be idia ese ataiai tomadiho gabudia, dirava koikoi edia, bona Asera ena kaivakuku, nadi gaudia, idia karaia. Bona ororo badadia ibounai edia latanai, bona au namodia henunai, Asera ena au tubua idia haginia.
24 Lebulebu karadia danu, be unai dirava koikoi tomadiho gabudia dekenai idia karaia. Ariara tatau bona ariara hahine danu unai tomadiho gabudia idia lao taudia edia huanai edia gaukara idia karaia. Bona Lohiabada ese Israela taudia dekena amo ia lulua ore besedia edia hemarai bona bodaga karadia, be Iuda taudia ese danu idia karaia.
25 King Rehoboama ena lohia lagani namba 5 lalonai Aigupito ena king, Sisaka, ese Ierusalema ia tuari henia.
26 Ia ese Lohiabada ena Dubu ena kohu namo herea, bona king ena ruma ena kohu namodia ia abia lao. Gau ibounai ia abia, golo kesi namodia danu, Solomona ese ia karaia gaudia ibounai ia abia lao.
27 Vadaeni king Rehoboama ese edia gabu dekenai auri laboralabora kesi gaudia ia karaia, bona king ena ruma gimaia taudia dekenai inai kesi ia henidia, do idia naridia totona.
28 King ese Lohiabada ena Dubu Helaga dekenai ia raka vareai neganai ibounai, ia gimaia totona, gima taudia ese unai kesi idia abia lao, bona gabeai gima taudia edia ruma dekenai ma idia atodia lou.
Rehoboama ia mase
29 Rehoboama ena kara oredia, iena kara ibounai edia sivarai be Iuda Ena King Edia Sivarai Buka ena lalonai idia torea vadaeni.
30 Rehoboama bona Ieroboama be ta ta dekenai idia tuari henia nega ibounai.
31 Vadaeni Rehoboama be ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Rehoboama ena gabu dekenai iena natuna Abaisa ese king dagi ia abia.