14
पवित्र आत्मा अन्द वरदान इन बारा दा यक्कुल शिक्षागोळ
1 प्यार इन अनुकरण माळोर साटी कोशिश माळी, अदिक आत्मिक वरदानगोळ्द भी धुन दा ईरी, खास माळकु परमेश्वर उन दी टु बरावाळा बातणी इन दान माळी.
2 यतिकी जो अग्यात भाषा दा मातगोळ माळतान आव मंळसागोळ से ईला लेकीन परमेश्वर से मातगोळ माळतान; इदुरसाटी कि आऊन मातगोळी याऊ समसालुन, यतिकी आव भेद इन मातगोळ पवित्र आत्मा अन्द सामर्थ्य दा आगकु माताळतान.
3 लेकीन जो परमेश्वर उन बातणी वाळस्तान, आव मंळसागोळ से उन्नती अदिक उपदेश अदिक दिलासा अन्द मातगोळ माताळतान.
4 जो अग्यात भाषा दा मातगोळ माळतान, आव तांद अच उन्नती माळतान; लेकीन जो भविष्यवाणी माळतान, आव मंडली अन्द उन्नती माळतान.
5 ना चाहासतीन कि नीव सप्पा मुंदुर अग्यात भाषागोळ दा मातगोळ माळी लेकीन इदुर से यक्कुल ईद चाहासतीन कि परमेश्वर उन दी टु बरावाळा बातणी इन मातगोळ माळी: यतिकी अगर अग्यात भाषा माताळावाळा मंडली अन्द उन्नती इन साटी अनुवाद माळबाळुल रा परमेश्वर उन दी टु बरावाळा बातणी अग्यात भाषा टु वाळुसकु आद.
6 इदुरसाटी हे वार्टुरा अदिक आकतींगेरा, अगर ना नीम हात्ती बंदकु अग्यात भाषागोळ दा मातगोळ माळाईन, रा नान से नीनी येन लाभ आदीत. अदिक ऊजुळ या ग्यान या परमेश्वर उन दी टु बरावाळा बातणी या उपदेश इन मातगोळ माळाईन, रा नीमी यक्कुल फायदा आदीत,
7 ईदा प्रकार अगर निर्जीव वस्तुगोळ भी यदुर देल आवाज होळतद, जसा कोळ्ल या बीन, अगर अऊर्द स्वरगोळ दा भेद ईरतीदील रा जो कोळ्ल ऊयकु या बिन मुर्सकु आगतद, आ हाळ इक ह्यांग अरूकु आदीत?
8 अदिक अगर तुरही इन आवाज साफ ईरतीदील, रा याव लळाई इन साटी तयारी माळ्यान?
9 हिंग अच नीव भी अगर ल्यालग्या देल साफ मातगोळ अनतीदिल, रा जो येनारा अंदकु आगतद अद ह्यांग सम्सकु आदीत? नीव रा हवा देल मातगोळ हेळावाळेर ठहरूसीर.
10 दुनिया दा यासारा अच प्रकार इन भाषागोळ येती ईला इतिदाव, लेकीन अऊर दा टु यातोदारा भी बिना मतलब इन ईला ईतीदाद.
11 इदुरसाटी अगर ना यातोदारा भाषा अन्द मतलब समसालीन, रा माताळावाळा अन्द नजर दा ना परदेशी ठहरूसाईन अदिक माताळावाळा नान नजर दा परदेशी ठहरूस्यान.
12 इदुरसाटी नीव भी याग आत्मिक वरदानगोळ्द धुन दा आईर, रा हिंग कोशिश माळी कि या वरदानगोळ देल मंडली अन्द उन्नती आगतद. आ वरदानगोळ्द कोशिश माळी.
13 ई कारण जो अग्यात भाषा माताळुल, आव दान सिक्कोद साटी प्रार्थना माळुल कि अदुर्द अनुवाद भी माळ सकुल.
14 इदुरसाटी अगर ना अग्यात भाषा दा प्रार्थना माळाईन, रा नान आत्मा प्रार्थना माळतद लेकीन नान दिमाक क्याल्सा कोळाल.
15 इदुरसाटी येन माळ पायजे? ना आत्मा देल भी प्रार्थना माळाईन, अदिक दिमाक देल भी प्रार्थना माळाईन; ना आत्मा देल भी हाळाईन, अदिक दिमाक देल भी हाळाईन.
16 ईलारा अगर नी आत्मा देल अच धन्यवाद माळ्या, रा बाक लॉकुर नीन धन्यवाद मा आमीन अनकु सहमत ह्यांग आदार? यतिकी आव रा अरालुन कि नी येन अनत्या?
17 नी रा सही देल धन्यवाद माळत्या, लेकीन दुसरा अन्द उन्नती आगाल.
18 ना तान परमेश्वर उन धन्यवाद माळतीन, कि ना नीम सप्पा मुंदुर से यक्कुल अग्यात भाषागोळ दा माताळतीन.
19 लेकीन मंडली दा अग्यात भाषा दा हत्त हजार मातगोळ माताळदुर देल नानी ईद वळ्लीद सम्सतद, कि दुसरा मंळसागोळी कलसोर साटी दिमाक देल अईद अच मातगोळ अनाईन.
20 हे वार्टुरा अदिक आकतींगेरा, नीव समझदारी दा चिकोर घाई आगबाळी: बुराई दा रा चिकोर घाई अनजान ईरी, लेकीन समझदारी दा स्याणा मंळसा घाई आगी.
21 व्यवस्था दा लिख्सकु आद कि प्रभु अनतान,
“ना अपरिचित भाषा माताळावाळेर्द द्वारा,
अदिक पराया बाय देल माताळावाळेर लॉकुर द्वारा
ई लॉकुर से मातगोळ माळाईन
तरी भी आंदुर नांद केळतीदिल.”
22 इदुरसाटी अग्यात भाषागोळ माताळोद वरदान विश्वासीगोळ साटी ईला, लेकीन अविश्वासीगोळ साटी चमत्कार इन चमत्कार हुन; लेकीन परमेश्वर उन दी टु बरावाळा बातणी अविश्वासीगोळ साटी ईला, लेकीन विश्वासीगोळ साटी चमत्कार इन चमत्कार हुन.
23 इदुरसाटी अगर मंडली ऊंद जागा दा जमा आगुल, अदिक सप्पा च्या सप्पा मुंदुर अग्यात भाषागोळ माताळुल, अदिक व्हार्यावाळेर या अविश्वासी लॉकुर बुळ्क होट बरूल रा येन आंदुर नीमी पागल अनतीदिल?
24 लेकीन अगर सप्पा मुंदुर परमेश्वर उन दी टु सिकावाळा बातणी कोळली हत्यार, अदिक यावारा अविश्वासी या व्हार्यावाळा मंळसा बुळ्क होट बरूल, रा सप्पा मुंदुर आऊक दोषी ठहरूस बुट्टार अदिक जाँच कोंडार कि आव पापी आन; अदिक आव जान्स कोंडान कि आऊक पश्चाताप इन जरवत आद.
25 अदिक आऊन मन इन भेद प्रगट आगेदव, अदिक आग आव बाय इन भार देल बिदकु परमेश्वर उक दण्डवत माळ्यान, अदिक कबुल माळ कोंडान कि खराखुरा परमेश्वर नाम न्याड्या आन.
मंडली दा आराधना अन्द अनुशासन
26 इदुरसाटी हे वार्टुरा अदिक आकतींगेरा, येन माळ पायजे? याग नीव जमा आगतीर, रा हर ऊंद मंळसा अन्द मन दा हाळ या उपदेश या अग्यात भाषा या प्रकाशक या अग्यात भाषा अन्द अर्थ हेळोद ईरतद. सप्पा येनारा मंडली अन्द उन्नती इन साटी आग पायजे.
27 अगर अग्यात भाषा दा मातगोळ माळोद आद रा येढ्ढ या हापाळ मुंदुर ईरूल रा मुर मुंदुर पारी-पारी देल माताळुल, अदिक ऊंद मंळसा अनुवाद माळुल.
28 लेकीन अगर अनुवाद माळावाळा हैलेच, रा अग्यात भाषा माताळावाळा मंडली दा सुंगा ईरूल, अदिक तान मन देल परमेश्वर से मातगोळ माळुल.
29 परमेश्वर उन दी टु बरावाळा बातणी इक माताळावाळेर दा टु येढ्ढ या मुर मुंदुर माताळुल, अदिक बाकी लॉकुर आंदुर वचन इक परखुसुल.
30 लेकीन जो कुर्तकु आन अगर आऊन मा, येनारा मय उन दी टु बातणी प्रगट आत. रा आव पयला मंळसा सुंगा आगेगुल.
31 यतिकी नीव सप्पा मुंदुर ऊंद ऊंद माळकु परमेश्वर उन दी टु सिक्कावाळा बातणी इक कल्स सकतार, ताकी सप्पा मुंदुर कलुल अदिक सप्पा मुंदुरी शांती सिकुल.
32 यतिकी परमेश्वर उन दी टु बातणी कोळावाळा अन्द आत्मा बातणी कोळावाळा अन्द वश दा आद.
33 यतिकी परमेश्वर अव्यवस्था अन्द ईला, लेकीन शांती इन परमेश्वर हुन.
ह्यांग पवित्र लॉकुर्द सप्पा मंडलीगोळ दा हिंग अच आगतद.
34 आर्तेर मंडली अन्द सभा दा सुंगा ईरूल, यतिकी आंदरी मातगोळ माळोद आग्या हैलेच, लेकीन आंदुर हात्ती ईरोद आग्या आद, ह्यांग व्यवस्था दा लिख्सकु आद.
35 अगर आंदुर येनारा कलोद चाहसतार, रा मान्या तान तान मान्नावाळा से केळुल, यतिकी आर्त इन मंडली अन्द सभा दा मातगोळ माळोद नाच्क इन मात आद.
36 येन परमेश्वर उन वचन नीम दा टु होटाद? या सिर्फ नीम ताका अच पोहचुस्याद?
37 अगर यावारा मंळसा तान तान इक परमेश्वर उन दी टु बरावाळा बातणी कोळावाळा सम्सुल या आऊन हात्ती पवित्र आत्मा अन्द वरदान आद, रा ईद अर्त कोमुल कि जो मातगोळ ना नीमी लिख्सतीन, अव प्रभु उन आग्यागोळ हु.
38 लेकीन अगर यावारा ईद स्वीकार माळालुर, रा आंदरी भी स्वीकार माळकु आगतीदील.
39 इदुरसाटी हे वार्टुरा अदिक आकतींगेरा, परमेश्वर उन दी टु बरावाळा बातणी इन धुन दा ईरी अदिक अग्यात भाषा माताळदुर देल मना माळबाळी;
40 पर सप्पा मातगोळ क्रम देल अदिक व्यवस्थित रूप देल माळकु आगुल.