5
मंडली दा अनैतिकता
1 ईद सही दा केळ सिक्याद कि नीम बीच दा व्यभिचार आगतद, अदिक हिंग व्यभिचार जो गैरयहूदीगोळ दा भी आगाल्द, मतलब ऊंद मंळसा तान आप्प उन हिंग्स उक ईटतान.
2 पर नीव घमण्ड देल बातोगीर, अदिक नीव इदुर बदला दुख माळालीर, यदुर देल कि हिंग क्याल्सा माळावाळा नीम बीच दा टु तेगुकु आगायदुन.
3-4 ना रा मय देल दुर ईरीन, लेकीन आत्मा देल नीम सांगुळ आगकु मान्सी उपस्थिती इन दशा दा हिंग क्याल्सा माळावाळेर्द बारा दा ईद आग्या कोटबुट्टीन कि याग नीव अदिक नांद आत्मा, नामव प्रभु यीशु उन सामर्थ्य इन सांगुळ जमा आगुल, रा हिंग मंळसा नामव प्रभु यीशु उन हेसुर देल
5 रा हिंग मंळसा मय इन विनाश इन साटी भूत इक सौप्सकु आगुल, कि आऊन आत्मा अक प्रभु यीशु उन दिन दा उद्धार सिक्कुल.
6 नीम्द घमण्ड माळोद वळ्लीद ईलच; येन नीव जान्सालीर कि थ्वाळासा खमीर पुरा कालस्कु हीट इक खमीर माळ बुळतद?
7 हाळोद खमीर तेगुकु तान तान इक शुद्ध माळी कि व्हाशोद कालस्कु हीट आगेगी; मतलब नीव अखमीरी हीट आगेगी ह्यांग नीव सही दा आईर. यतिकी नाम्द भी फसह, जो मसीह आन, आऊन बलिदान आग्याद.
8 इदुरसाटी बरी, नाव हाब्ब दा खुशी मानसाता, ईदारा हाळोद खमीर टु अदिक ना बुराई अदिक दुष्टता अन खमीर टु, लेकीन सीधाई अदिक सच्चाई इन अखमीरी रोट्टी देल.
9 ना तान चिट्ठी दा नीमी लिख्सीन कि व्यभिचारीगोळ्द संगती माळबाळेत.
10 ईद ईला कि नीव ई दुनिया अन व्यभिचारीगोळ, या लोभ माळावाळेर, या अंधार माळावाळेर, या मूर्ति इन पुजा माळावाळेर्द संगती माळबाळी; यतिकी ईद दशा दा टु होटबुळोद अच बिळाईत.
11 पर नान कहना ईद आद कि अगर यावारा वार्ट अंदकु, व्यभिचारी, या लोभ माळावाळा, या मूर्ति इन पुजा माळावाळा, या बोयावाळा, या सारा कुडावाळा, या अंधार माळावाळा हुन, रा आऊन संगती माळबाळेत; उलटा हिंग मंळसा अन्द सांगुळ ऊम भी बाळेतीर.
12 यतिकी नानी व्हार्यावाळेर्द न्याय माळदुर देल येन क्याल्सा? येन नीमी आंदुर्द न्याय माळोद ईलच जो मंडली दा आर?
13 लेकीन व्हार्यावाळेर्द न्याय परमेश्वर माळतान. इदुरसाटी आ कुकर्मी अक तान बीच दा टु तेगु बुळी.