कुरिन्थियों के नाम पौलुस प्रेरित की दूसरी पत्री
कुरिन्थिगोळ्द हेसुर पौलुस प्रेरित उन दुसरा चिट्ठी
परिचय
दुसरा कुरिन्थि ईद चिट्ठी प्रेरित पौलुस यीशु मसीह अन्द जनम इन ५५-५६ साल इन बाद्दा लिख्सदुन १:१ ईद आ येढ्ढ चिट्ठी गोळ दा टु दुसरा चिट्ठी हुन जो पौलुस कुरिन्थिवासीगोळ साटी लिख्सदुन. हापाळ पंडीत विधवान हिंग सम्सतार कि ई चिट्ठी इन पयले कुरिन्थिगोळी ऊंद धोळ्द कळक चिट्ठी लिखसीदुन इदुर बारा दा आव २:३-४ ई वचन दा उल्लेख माळतान लेकीन ई चिट्ठी इन प्रतिक नाम हात्ती हैलेच. ईद दुसरा कुरिन्थि इन चिट्ठी पौलुस संभव अच मकिदुनिया नगर दा टु लिख्सीदान. २:१३
दुसरा कुरिन्थि ई चिट्ठी इन विशेषता ईद आद कि चिट्ठी दा वैक्तिक अदिक भावनात्मक मातगोळ्द चर्चा माळकु आग्याद ई चिट्ठी दा पौलुस जो वळ्लीद अहवाल आव कुरिन्थिगोळ बारा दा तीतुस से हासिल माळदुन अदुर बारा दा खुशी जाहीर माळतान. ई चिट्ठी दा विस्तार देल शिक्षा कोळोद बारा दा व्हाशोद नियम इन दृष्टीकोन देल कांळ्सतद. ईद शिक्षा ई विभाग दा सिकतद याता विभाग दा पौलुस आ चंदा अन्द बारा दा मात हेळतान जो चंदा यरूशलेम इन विश्वासीगोळ्द सहायता साटी ताकोमकु आगीत ८–९ मंडली दा थ्वाळासा लॉकुर पौलुस उन खिलाप ईरोर लेकीन थ्वाळासा मुंदुर अल बरावाळेर ख्वाटा प्रेरित ई विरोध इन फायदा नेगुकु पौलुस उक वोतकु खुद उन्नती माळोद चाहासोर. आंदुर पौलुस उन अधिकार माळदुर मा प्रश्न निर्माण माळदुर इदुरसाटी ई चिट्ठी इन आखरी भाग दा यीशु मसीह अन्द प्रेरित आगदुर नाता देल जो अधिकार आऊक सिक्याद आ अधिकार मा पौलुस जोर कोळतान.
रूप-रेखा:
१. पौलुस उन मंडलीगोळी नमस्कार १:१-७
२. पौलुस उन तान यात्रा अन्द बारा दा बदलाव अदिक जो अहवाल कुरिन्थिगोळ बारा दा हासिल आगीत अदुर बारा दा चर्चा अदिक हिंदळा कळक चिट्ठी यदुर बारा दा आंदुर प्रश्न निर्माण माळीदुर अऊर बारा दा हेळोद १:८–७:१६
३. यरूशलेम दा ईरावाळेर विश्वासीगोळ साटी चंदा माळदुर बारा दा सुचना ८:१–९:१५
४. आखरी दा पौलुस उन तान प्रेरितपन इन बचाव माळोद अदिक तान बरावाळा मुलाकात इन बारा दा चेतावनी कोळोद १०:१–१३:१०
1
1 पौलुस उन दी टु जो परमेश्वर उन इच्छा देल मसीह यीशु उन प्रेरित हुन, अदिक वार्ट तीमुथियुस उन दी टु परमेश्वर उन आ मंडली इन हेसुर,
जो कुरिन्थुस दा आद, अदिक सप्पा अखाया नगर इन सप्पा पवित्र लॉकुर हेसुर:
2 नाम आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
परमेश्वर उन धन्यवाद माळोद
3 नामव प्रभु यीशु मसीह अन्द परमेश्वर अदिक आप्प उन धन्यवाद आगुल, जो दया अन्द आप्प अदिक सप्पा प्रकार इन शांती इन परमेश्वर हुन
4 आव नामव सप्पा क्लेशगोळ दा दिलासा कोळतान; ताकी नाव आ दिलासा अन्द कारण जो परमेश्वर नामी कोळतान, आंदरी भी दिलासा कोळ सकुल जो यातारा प्रकार इन क्लेश दा इतीदार.
5 यतिकी ह्यांग मसीह अन्द दुखगोळ दा नाव यक्कुल सहभागी आगतेव, हांग अच नाव शांती दा भी मसीह अन्द द्वारा यक्कुल सहभागी आगतेव.
6 अगर नामी क्लेश सिकतद, रा ईद नीम्द शांती अदिक उद्धार इन साटी हुन; अदिक अगर शांती सिकतद, रा ईद नीम्द शांती इन साटी हुन; यदुर प्रभाव देल नीव धीरज इन सांगुळ आ क्लेशगोळ इक सहन माळ कोमतीर, यवरी नाव भी सहन माळतेव.
7 नाम्द आशा नीम्द बारा दा मजबूत आद; यतिकी नाव अरूतेव कि नीव ह्यांग नाम दुखगोळ दा, हांग अच शांती दा भी सहभागी आईर.
8 हे वार्टुरा अदिक आकतींगेरा, नाव चाहसालेव कि नीव नाम आ क्लेश देल अनजान ईरी जो आसिया प्रदेश दा नाम मा बित्त; नाव ईत्ता भारी बोझ देल वत्तेगीदेव, जो नाम सामर्थ्य अन व्हार्या ईरोद, ईल ताका कि नाव जीवन देल भी कय तोळकु कुर्तीदेव.
9 अदिक नाव तान मन दा समसेगीदेव कि नाम मा मृत्यु उन आग्या आगेग्याद. ताकी नाव तान भरोसा ईटतीदिल बल्की आ परमेश्वर उन जो सोत्तुर इक जित्ता माळतान.
10 आवा नामी मृत्यु उन हिंग धोळ्द संकट देल ऊळ्सदुन, अदिक ऊळस्यान; अदिक आऊन मा नामी ईद आशा आद कि आव मुंद भी ऊळ्सतेला ईत्तान.
11 नीव भी ऊंद आगकु प्रार्थना अन्द द्वारा नाम सहायता माळीर कि जो वरदान नामी हापाळ मुंदुर द्वारा सिक्त, अदुर कारण हापाळ लॉकुर नाम दी टु धन्यवाद माळुल.
पौलुस उन यात्रा-योजना दा परिवर्तन
12 यतिकी नाव तान अंतर मन इन ई गवाही मा घमण्ड माळतेव, कि दुनिया दा अदिक विशेष माळकु नीम न्याड्या, नाम चरित्र परमेश्वर उन योग्य हिंग पवित्रता अदिक सच्चाई सहित ईरोद, जो शारीरिक ग्यान देल ईला लेकीन परमेश्वर उन अनुग्रह अन्द सांगुळ ईरोद.
13 नाव अदा लिख्सतेव जो नीव वाचुस या सम्स सकतीर. लेकीन बाक भी नीव नामी थ्वाळासा सम्सतीर.
14 अदिक नानी आशा आद कि या दिन प्रभु यीशु मसीह नीम हात्ती बंदान आ दिन नीव घमण्ड इन दिनगोळ दा अदिक अन्त ताका भी मान्सतेला ईत्तीर.
15 ईदा भरोसा देल ना चाहासीन कि पयले नीम हात्ती बराईन कि नीमी दुगना खुशी सिकुल;
16 ना सोचदिन कि नीम हात्ती टु आगकु मकिदुनिया नगर इक होगतेला, नीम से सीकाईन, अदिक बाक मकिदुनिया नगर टु नीम हात्ती बराहोती; मात्त सीकाईन; अदिक नीव नानी यहूदीगोळ दी थ्वाळासा दुर ताका सार माळी.
17 इदुरसाटी ना जो ईद इच्छा माळीदिन रा येन ना अनुचित ईरीन? या जो माळोद चाहासतीन येन मय इन अनुसार माळोद चाहासतीन कि ना मात दा “हव, हव” भी माळाईन अदिक थ्वाळासा समय दा “ईला ईला” भी माळाईन?
18 परमेश्वर खरा गवाह आन कि नाम आ बातणी दा जो नीम से अंदुन “हव” अदिक “ईला” येढ्ढु शब्द सिकालव.
19 यतिकी परमेश्वर उन पार यीशु मसीह यार्द नाम द्वारा मतलब नान अदिक सिलवानुस अदिक तीमुथियुस उन द्वारा नीम न्याड्या दा प्रचार आत, अदुर दा “हव” अदिक “ईला” येढ्ढु ईला ईरव, इदुरसाटी परमेश्वर नामव हव हुन.
20 यतिकी परमेश्वर उन यास भी वादा आव, अव सप्पा अदुर दा “हव” इन सांगुळ आव. इदुरसाटी आऊन द्वारा “आमीन” भी आत कि नाम द्वारा परमेश्वर उन महिमा आगुल.
21 अदिक जो नामी नीम सांगुळ मसीह दा ऊंद माळकु मजबूत माळतान, अदिक याव नामी अभिषेक माळ्यान आवा परमेश्वर हुन,
22 नाव आऊन नव हुयेव याव नाम मा आऊन आगोद छाप हच्यान अदिक बयाना दा आत्मा अक नाम मनगोळ दा कोटान. जो भविष्य दा सिकोद आद.
23 ना परमेश्वर उक गवाह माळकु अनतीन कि ना ईगासताका कुरिन्थुस दा इदुरसाटी बंदिदील, कि ना ईला चाहासीन कि नीमी बोयाईन.
24 ईद ईला कि नाव विश्वास इन बारा दा नीम मा प्रभुता जतुसोद चाहासतेव; लेकीन नीम खुशी दा सहायक आयेव यतिकी नीव विश्वास देल अच संची ईरतीर.