13
आखरी चेतावनी
1 ईग तिसरा बार ना नीम हात्ती बरतीन: हर ऊंद मुकदमा सिद्ध माळोर साटी येढ्ढ या मुर गवाहगोळ्द जरवत ईरतद.
2 ह्यांग ना दुसरा बार नीम सांगुळ ईरीन, हांगा ईग दुर ईरतेला आ लॉकुर से यार पयले पाप माळ्यार, अदिक अन्य सप्पा लॉकुर से ईग पयले से अन बुळतीन कि अगर ना मात बराईन रा बिळतीदील,
3 यतिकी नीव रा इदुर्द सबुत चाहासतीर कि मसीह नान दा माताळतान, जो नीम साटी कमजोर ईला लेकीन नीम दा सामर्थी आद.
4 आव कमजोर इन कारण क्रूस मा येर्सकु रा आदुन, तरी भी परमेश्वर उन सामर्थ्य देल जित्ता आन. नाव भी अदुर्दा कमजोर आयेव, लेकीन परमेश्वर देल जो नीम साटी आन, आऊन सांगुळ ऊळदेव.
5 तान तान इक जाच विश्वास दा आईर का ईला. तान तान इक जाच. येन नीव तान बारा दा ईद जान्सालीर कि यीशु मसीह नीम दा आन? ईलारा नीव जाच दा निकम्मा होटीर.
6 लेकीन नान आशा आद कि नीव जान्स कोंडीर कि नाव निकम्मा हैलेच.
7 नाव तान परमेश्वर से ईद प्रार्थना माळतेव कि नीव येनु बुराई माळबाळी, इदुरसाटी ईला कि नाव सही कांळ्सीगेव, लेकीन इदुरसाटी कि नीव भलाई माळी, बाक नाव निकम्मा अच ठहरूसेगुल.
8 यतिकी नाव सच्चाई इन विरोध दा येनु माळ सकालेव, लेकीन सच्चाई इन साटी इच माळ सकतेव.
9 याग नाव कमजोर आयेव अदिक नीव ताकतवर आईर, रा नाव खुश आगतेव, अदिक ईद प्रार्थना भी माळतेव कि नीव सिद्ध आगेगी.
10 ईदुर कारण ना नीम बेन हींद ई मातगोळी लिख्सतीन, कि उपस्थित आगकु नानी आ अधिकार इन अनुसार यदरी प्रभु बीगळुसोर साटी ईला लेकीन नीम भलाई इन साटी कोटान, कटनाई देल येनु माळोद बिळबाळुल.
आखरी अभिवादन
11 इदुरसाटी हे वार्टुरा अदिक आकतींगेरा, खुश ईरी; सिद्ध आगतेला होगी; हिम्मत ईटी; ऊंदा मन ईटी; मेल मिलाप देल ईरी. अदिक प्यार अदिक शांती इन दाता परमेश्वर नीम सांगुळ ईत्तान.
12 परमेश्वर उन शुद्ध प्यार दा आबुर दाबुरी पवित्र चुम्मा देल नमस्कार माळी.
13 सप्पा मसीह परमेश्वर उन लॉकुर नीमी प्यार अदिक नमस्कार अनतार.
14 प्रभु यीशु मसीह अन अनुग्रह अदिक परमेश्वर उन प्यार अदिक पवित्र आत्मा अन सहभागीता नीम सप्पा मुंदुर सांगुळ आगतेला ईरूल.