6
1 नाव जो परमेश्वर उन सहकर्मी आयेव ईद भी हेळतेव कि आऊन अनुग्रह जो नीम मा आत, अदरी वाया होगगोळबाळी.
2 यतिकी आव रा अनतान,
“तान खुश आगोद समय दा ना नीन केळ कोंडीन,
अदिक उद्धार इन दिन ना नीन सहायता माळदीन.”
नोळी, ईग अद खुश
इन समय आद;
नोळी, ईग अद उद्धार इन दिन आद.
3 नाव यातोदु मात दा ठोकर तिनोद यातोद भी मवका कोळालेव ताकी नाम स्यावा मा यातोद भी दोष बरबाळुल.
4 लेकीन हर मात देल परमेश्वर उन सेवकगोळ्द घाई तान लायकत इक प्रगट माळतेव, बळा धीरज देल, क्लेशगोळ देल, दरिद्रगोळ देल, संकटगोळ देल,
5 क्वाळा तिनोद देल, कैद आगदुर देल, दंगा देल, मयनत देल, च्याता ईरोद देल, उपास माळदुर देल,
6 पवित्रता देल, आ ग्यान देल, धीरज देल, परमेश्वर उन प्यार अदिक कृपा देल, पवित्र आत्मा देल,
7 सही प्यार देल, सच्चाई इन वचन देल, परमेश्वर उन सामर्थ्य देल, न्यायीपन इन हथियारगोळ देल जो उजवा डाक्या कयगोळ दा आव,
8 आदर अदिक निरादर देल, बेकार कीर्ति अदिक वळ्लीद कीर्ति देल. अगर भरमुसावाळेर घाई मालूम आगतेव तरी भी सही आयेव;
9 अनजानगोळ्द घाई आयेव, तरी भी प्रसिद्ध आयेव; सोत्तुर घाई आयेव अदिक नोळी जित्ता आयेव; बळ्सकोमावाळेर्द घाई आयेव पर जीव देल कोनसुस्कु आगालेव;
10 शोक माळावाळेर्द घाई आयेव, पर हमेशा खुश ईरतेव; कंगालगोळ्द घाई आयेव, पर हापाळ मुंदुर इक धनवान माळ बुळतेव; हिंग आयेव जसा नाम हात्ती येनु हैलेच तरी भी सब येनारा ईटतेव.
11 हे कुरिन्थिगोळा, नाव तान मन तेरूकु नीम से मातगोळ हेळेव, नाम मन नीम दी तेरूकु आव
12 नीम साटी नाम मन दा यातोदु संकोच हैलेच, लेकीन नीम्द अच मनगोळ दा संकोच आद.
13 लेकीन तान चिकोर जान्सकु नीम से अनतीन कि नीव भी अदुर बदला दा तान मन तेर्द बुळी.
देवभक्ति ईला ईटावाळेर से सावधान
14 अविश्वासीगोळ्द सांगुळ संबंध माळकु जुआळी दा जुत्सबाळी, यतिकी न्यायीपन अदिक अन्याय इन येन मेल-जोल आद? या उजुळ अदिक अंधार इन येन संगती?
15 अदिक मसीह अन्द शैतान उन सांगुळ येन लगाव? या विश्वासी इन सांगुळ अविश्वासी इन येन नाता?
16 अदिक मूर्तीगोळ्द सांगुळ परमेश्वर उन मंदिर इन येन संबंध? यतिकी नाव रा जित्ता परमेश्वर उन मंदिर हुयेव; ह्यांग परमेश्वर अंदान,
“ना आंदुर दा ईराइन
अदिक आंदुर दा नळुतोगाईन;
अदिक ना आंदुर परमेश्वर आगाईन,
अदिक आंदुर नान लॉकुर आदार.”
17 इदुरसाटी प्रभु अनतान,
“आंदुर न्याड्या दा टु होळी
अदिक ब्यार्र ईरी;
अदिक अशुध्द वस्तु उक मुट बाळी,
रा ना नीमी ग्रहण माळाईन;
18 अदिक ना नीम आप्प आगाईन,
अदिक नीव नान पार अदिक पोर आदीर.
ईद सर्वशक्तिमान प्रभु परमेश्वर उन वचन हुन.”