1 “बाक हे मंळसा अन सन्तान, नी इस्त्राएल इन पहाळीगोळ से भविष्यवाणी माळकु अन, हे इस्त्राएल इन पहाळीगोळा, यहोवा अन वचन केळी. 2 परमेश्वर यहोवा ईद अनतान: दुश्मन रा नीम बारा दा अंदान, ‘आहा! प्रचीनकाल इन ऊँचा जागा ईग नाम अधिकार दा होट बंदाव.’ 3 ई कारण भविष्यवाणी माळकु अन, परमेश्वर यहोवा ईद अनतान: लॉकुर जो नीमी उजाळस्यार अदिक नाकु दी नीम से हींग नुंग कोंडुन कि नीव ऊळ्दकु राज्यगोळ्द अधिकार आगेगी, अदिक लुतरा नीम्द चर्चा माळतेला अदिक साधारण लॉकुर नीम निन्दा माळतार; 4 ई कारण, हे इस्त्राएल इन पहाळीगोळा, परमेश्वर यहोवा अन वचन केळी, परमेश्वर यहोवा नीम से ईद अनतान: मतलब पहाळी अदिक पहाळीगोळ से अदिक नाला अदिक तराईगोळ से जो नाकु दीकळोद मिग्द राज्यगोळ से लुट्सदव अदिक आंदुर नेगा कारण आगेग्यार; 5 परमेश्वर यहोवा ईद अनतान: सहीदा ना तान जलन इन बेक्की दा मिग्द राज्यगोळ अदिक सोर एदोम इन विरूद्ध दा अंदान कि यार नान द्याश इक तान मन इन पुरा आनंद अदिक अभिमान देल तान अधिकार दा आग्याद कि अद पराया आगकु लुट्सकु आगुल. 6 ई कारण इस्त्राएल इन द्याश इन बारा दा भविष्यवाणी माळकु पहाळी, पहाळीगोळ, नालागोळ, अदिक तराईगोळ से अन, परमेश्वर यहोवा ईद अनतान: नोळी नीव राज्य अन निन्दा सहन माळीर, ई कारण ना तान धोळ्द जलजलाहट देल अंदीन.”

7 परमेश्वर यहोवा ईद अनतान: ना ईद किर्‍या तिंदीन कि नि:सन्देह नीम नाकु दी जो राज्य आव, अवरी तान निन्दा खुद अच सहन माळोद बिद्दीत.

8 “लेकीन हे इस्त्राएल इन पहाळीगोळा, नीम मा डगालगोळ पलसेव अदिक अऊर काय नान प्रजा इस्त्राएल इन साटी हत्तेव; यतिकी आऊन बरोद हात्ती आद. 9 नोळी, ना नीम पक्ष दा आईन, अदिक नीम्द दी कृपादृष्टी माळाईन, अदिक नीव जोत्सकु-बोऊस्कु आदीर; 10 अदिक ना नीम मा हापाळ मंळसा मतलब इस्त्राएल इन सप्पा घराना अक बसुसाईन; अदिक नगर मात बसुसकु अदिक खण्डर मात माळकु आदव. 11 ना नीम मा मंळसा अदिक जनावर येढ्ढु उक हापाळ वाळुसाईन; अदिक आंदुर वाळुस्यार अदिक फलस्यार; अदिक ना नीम इक पुराना समय इन घाई बसुसाईन, अदिक पयले से येक्कुल नीम्द भलाई माळाईन. आग नीव जान्स कोंडीर कि ना यहोवा हुईन. 12 ना हींग माळाईन कि मंळसा मतलब नान प्रजा इस्त्राएल नीम मा नळदीत-वयाळीत; अदिक आंदुर नीमोर स्वामी आदार, अदिक नीव आंदुर खुद इन हिस्सा आदीर, अदिक आंदुर मात नीम कारण निर्वंश आगतीदील. 13 परमेश्वर यहोवा ईद अनतान: जो लॉकुर नीम से अनतार, ‘नी मंळसागोळ्द तिनावाळा हुय, अदिक तान मा बसुस्द राज्य अक निर्वंश माळ कोमत्या,’ 14 ईदुरसाटी ईग नी मंळसागोळी तिनतीदील, अदिक न तान मा बसुस्द राज्य अक निर्वंश माळ्या, परमेश्वर यहोवा अन ईदा वाणी हुन. 15 ना बाक राज्य राज्य अन लॉकुर से नीन निन्दा केळसुसतीदील, अदिक नीनी राज्य राज्य अन दी टु बाक नामधराई सहन माळोद बिळतीदील, अदिक नीन मा बसुस्द राज्य अक नी मात ठोकर तिनस्या, परमेश्वर यहोवा अन ईदा वाणी हुन.”

16 बाक यहोवा अन वचन नान हाती पोहचुस्त: 17 “हे मंळसा अन सन्तान, याग इस्त्राएल उन घराना तान द्याश दा ईरतोगोन, आग तान चलन अदिक क्याल्सागोळ द्वारा आंदुर आऊक अशुद्ध माळतोगोर; आंदुर्द चालचलन नानी महावारी इन अशुध्दता घाई जान्सकु बिळतोगोद. 18 ईदुरसाटी जो हत्या आंदुर द्याश दा माळ्यार, अदिक द्याश इक तान मुरतीगोळ द्वारा अशुध्द माळदुर, ईदुर कारण ना आंदुर मा तान जलजलाहट भळकुसदीन. 19 ना आंदरी राज्य राज्य दा तितर-बितर माळदीन, अदिक आंदुर द्याश द्याश दा बिखरूसेदुर; आंदुर चालचलन अदिक क्याल्सागोळ अनुसार ना आंदरी दंड कोळाईन.” 20 लेकीन याग आंदुर आ राज्य दा पोहचुसदुर येल आंदुर पोहचुस्कु आदुर, आग आंदुर नान पवित्र हेसुर इक अपवित्र ठहरूसदुर, यतिकी लॉकुर आंदुर बारा दा ईद अनली कुरतुर, ईद यहोवा अन प्रजा हुन, लेकीन आऊन द्याश दा टु तेगुकु आग्यार. 21 लेकीन ना तान पवित्र हेसुर इन सुधी तांकोडीन, यदरी इस्त्राएल उन घराना अन आ राज्य अन न्याड्या अपवित्र ठहरूसीद, येल आंदुर होगीदुर. 22 “ई कारण नी इस्त्राएल उन घराना से अन, परमेश्वर यहोवा ईद अनतान: हे इस्त्राएल उन घराना, ना ईऊक नीम निमित्त ईला, लेकीन तान पवित्र हेसुर इन निमित्त माळतीन यदरी नीव आ राज्य दा अपवित्र ठहरूसदीर येल नीव होगीदीर. 23 ना तान धोळ हेसुर इक पवित्र ठहरूसाईन, जो राज्यगोळ दा अपवित्र ठहरूसकु आग्याद, यदरी नीव आंदुर न्याड्या अपवित्र माळ्द; अदिक याग ना आंदुर नजर दा नीम न्याड्या पवित्र ठहरूसाईन, आग आंदुर राज्य जान्स कोंडव कि ना यहोवा हुईन, परमेश्वर यहोवा अन ईदा वाणी हुन.” 24 ना नीम इक राज्यगोळ दा टु ताकोम कोमाईन, अदिक द्याशगोळ दा टु जमा माळाईन; अदिक नीम इक नीम खुद इन द्याश दा पोहचुस बुळाईन. 25 ना नीम मा शुद्ध नीर छिळकुसाईन, अदिक नीव शुद्ध आगेदीर; अदिक ना नीम इक नीम्द सप्पा अशुध्दता अदिक मुरतीगोळ से शुद्ध माळाईन. 26 ना नीम इन व्हाशोद मन कोळाईन, अदिक नीम बुळ्क व्हासा आत्मा पैदा माळाईन, अदिक नीम्द शरीर दा टु कल्ल इन दिल तेगुकु नीम इक मास इन दिल कोळाईन. 27 ना तान आत्मा नीम बुळ्क कोटकु हींग माळाईन कि नीव ना विधीगोळ मा नळदीर अदिक नान नियमगोळी मान्सकु अदुर अनुसार माळीर. 28 नीव आ द्याश दा बसुसीर जो ना नीम आप्पगोळी कोटीदीन; अदिक नीव नान प्रजा ठहरूसीर, अदिक ना नीमव परमेश्वर ठहरूसाईन. ना नीम इक नीम्द सप्पा अशुध्दता देल बीळसाईन, अदिक अन्न पैदा माळोद आग्या कोटकु, अदरी वाळुसाईन अदिक नीम न्याड्या अकाल केडुतीदील. 29 नीव आ द्याश दा बसुसीर जो ना नीम आप्पगोळी कोटीदीन; अदिक नीव नान प्रजा ठहरूसीर, अदिक ना नीमव परमेश्वर ठहरूसाईन. ना नीमी नीम सप्पा अशुध्दता देल बीळसाईन, अदिक अनाज पैदा माळोद आग्या कोटकु, अदरी वाळुसाईन अदिक नीम न्याड्या अकाल हाकतीदील. 30 ना मार्रगोळ काय अदिक केई इन उपज वाळुसाईन, कि राज्यगोळ दा अकाल इन कारण बाक नीम्द नामधराई आगतीदील. 31 आग नीव तान बुरा चालचलन अदिक तान क्याल्सागोळ जो वळ्लेव ईला ईरव, याद माळकु तान अधर्म अदिक घिनोना क्याल्सागोळ कारण तान से सिट्ट माळीर. 32 परमेश्वर यहोवा अन ईदा वाणी आद, नीव जान्स कोंडीर कि ना ईदरी नीम साटी माळालीन. हे इस्त्राएल उन घराना तान चालचलन इन बारा दा लज्जित आग अदिक नीम बाय करीद आगुल. 33 “परमेश्वर यहोवा ईद अनतान: याग ना नीम इक नीम्द सप्पा अधर्म इन क्याल्सागोळ से शुद्ध माळाईन, आग नीम नगरगोळी बसुसाईन; अदिक नीमव खंडर मात माळकु आदव. 34 नीम द्याश जो सप्पा होगा बरावाळेर घाई ऊजाळ आद, अद ऊजाळ आगा बदला जोतुस अदिक बोऊस्कु आदीत. 35 लॉकुर अन तोदार, ईद द्याश जो उजाळ ईरोद, अद अदन इन बगीचा घाई आगेत, अदिक जो नगर खंडर अदिक उजाळ आगेग्याव अदिक ढाऊसकु आगीदव, आंदुर गढवाळेर आदुर, अदिक बसुसकु आदुर. 36 आग जो राज्य नीम आस पास मिक्कु ईत्तीत, अव जान्स कोंडव कि ना यहोवा अच बिद्दुर इक मात माळदीन, अदिक उजाळ दा मार्र हचीन, ना यहोवा ईद अंदीन, अदिक हींग अच माळाईन.” 37 “परमेश्वर यहोवा ईद अनतान: इस्त्राएल उन घराना दा बाक नान से विनती माळकु आदीत कि ना आंदुर साटी ईद माळाईन; मतलब ना आ मंळसागोळ गिनती मर्र-म्यांढ्‌ढागोळ घाई वाळुसाईन. 38 ह्यांग पवित्र समयगोळ मर्र-म्यांढ्‌ढागोळ, मतलब नियत हाब्ब इन समय यरूशलेम दाकळोव मर्र-म्यांढ्ढा अनगिनत आगताव हांग अच जो नगर ईग खंडर आव अव अनगिनत मंळसागोळ्द झुंडगोळ देल तुमकु आदव. आग आंदुर जान्स कोंडार कि ना यहोवा हुईन.”