41
1 बाक आव नानी मंदिर इन हाती वोतुन, अदिक अदुर येढ्ढु दी खंबागोळी नाप्सकु आर आर कय चौळा नोळदीन, ईद रा ड्यारा अन चौळाई ईरोद.
2 दरवाजा अन चौळाई हत्त कय इन ईरोद, अदिक दरवाजा अन येढ्ढु दिकळव दिवाल अईद अईद कय ईनव ईरोव; अदिक आव मंदिर इन लंबाई नाप्सकु चालीस कय इन, अदिक अदुर्द चौळाई ईप्पत कय आत.
3 आग आव बुळ्क होगकु दरवाजा अन खंबागोळी नाप्सदुन, अदिक येढ्ढ येढ्ढ कय इन पाऊसदुन; अदिक दरवाजा आर कय इन ईरोद; अदिक दरवाजा अन चौळाई येळ कय इन ईरोद.
4 आग अव बुळ्क इन भवन अदिक चौळाई मंदिर इन मुंद नाप्सकु ईप्पत ईप्पत कय इन पाऊसदुन; अदिक आव नान से अंदुन, “ईद रा परमपवित्र जागा हुन.”
मंदिर इन कोठरीगोळ
5 बाक आव भवन इन दिवाल इक नाप्सकु आर कय पाऊसदुन, अदिक भवन इन आसपास नाक नाक कय चौळा व्हार्या अन कोठरीगोळ ईरव.
6 इव व्हार्या अन कोठरीगोळ मुर मंजली ईरव; अदिक ऊंद ऊंद दा तीस तीस कोठरीगोळ ईरव. भवन इन आसपास इन दिवाल ईदुरसाटी ईरव कि व्हार्या अन कोठरीगोळ अऊर सहारा दा इरूल; अदिक अदुर दा अच कोठरीगोळ कळीगोळ फसुसकु ईरव अदिक भवन इन दिवाल इन सहारा दा ईला ईरव.
7 भवन इन हाती जो कोठरीगोळ व्हार्या ईरव, अऊर दा टु जो म्याकुच ईरव, अव येक्कुल चौळा ईरव; मतलब भवन इन हाती जो येनारा बन्सकु ईरोद, अद ह्यांग ह्यांग म्याकुच दी येर तोगोद, हांग हांग चौळा आगतेला होत; ई रिती, ई मान्ना अन चौळाई म्याकुच इन दी वाळुसेगीत, अदिक लॉकुर ल्यालमा अन मंजील इन न्याड्या टु म्याकळोद मंजील इक येर सकोर.
8 बाक ना भवन इन आसपास ऊचा जमीन नोळदीन, अदिक व्हार्यागोळ कोठरीगोळ ऊचाई जोळ ताका आर कय इन बास इन ईरोद.
9 व्हार्या अन कोठरीगोळ साटी जो दिवाल ईरव, अव अईद कय मोटा ईरव, अदिक जो जागा खाली ईतोगीत, अद भवन इन व्हार्या अन कोठरीगोळ्द जागा ईरोद.
10 व्हार्या कोठरीगोळ न्याड्या न्याड्या भवन इन आसपास ईप्पत कय इन अन्तर ईरोद.
11 व्हार्या अन कोठरीगोळ दरवाजा आ जागा अन दी ईरोद, जो खाली ईरोद, मतलब ऊंद दरवाजा उत्तर इन दी अदिक दुसरा दक्षिण इन दी ईरोद; अदिक जो जागा ईतोत, अदुर चौळाई नाकु दी अईद अईद कय इन ईरोद.
पश्चिम इन दीकळोद भवन
12 बाक जो भवन मंदिर इन पश्चिमी इन दी मुंद ईरोद, अद सत्तर कय चौळा ईरोद; अदिक भवन इन आसपास इन दिवाल अईद कय मोटा ईरोद, अदिक अदुर लंबाई नब्बे कय इन ईरोद.
मंदिर इन पुरा नाप
13 आग आव मंदिर इन लंबाई नाप्सकु सौ कय इन नोळदुन; अदिक दिवालगोळ सांगुळ आंगुळ इन भी लंबाई नाप्सकु सौ कय इन नोळदुन.
14 भवन इन पुर्वी सामना अदिक अदुर्द आंगुळ सौ कय चौळा इरोद.
15 बाक आव हींदळोद आंगुळ इन मुंदळोद दिवाल इन लंबाई यदुर येढ्ढु दी सज्जा ईरव, नाप्सकु सौ कय इन नोळदुन, अदिक बुळ्कळोद भवन अदिक आंगुळ इन ओसारा अक भी नाप्सदुन.
मंदिर इन सजावट
16 आग आव डेवढीगोळ अदिक झिलमिलीदार खिळकीगोळी, अदिक आसपास इन मुरू मंजीलगोळ सज्जा अक नाप्सदुन जो डेवढी इन मुंद ईरव, अदिक नाकु दी अऊर्द पट्टीगोळ कटकु ईरव; अदिक जमीन टु खिळकीगोळ ताका अदिक खिळकीगोळ आसपास सप्पा येल्यारा पट्टीगोळ कटकु ईरव.
17 बाक आव दरवाजा अन म्याकुच इन जागा बुळ्कोळोद भवन ताका अदिक अदुर व्हार्या भी अदिक आसपास इन सप्पा दिवाल इन बुळ्क अदिक व्हार्या भी नाप्सदुन.
18 अदुर दा गिधाळ अदिक खजुर इन मार्र हींग अगुळकु ईरव कि येढ्ढ येढ्ढ गिधाळगोळ न्याड्या ऊंद ऊंद खजुर इन मार्र ईरोद; अदिक गिधाळ इन येढ्ढ येढ्ढ मार्रा ईरव.
19 ई प्रकार देल ऊंद ऊंद खजुर इन ऊंद दी मंळसा अन मार्रा माळकु ईरोद, अदिक दुसरा दी हारोद हुल्ल इन मार्रा माळकु ईरोद. ईदा रीती सप्पा भवन इन नाकु दी माळकु ईरोद.
20 जमीन टु हुडुकु दरवाजा अन म्याकुच ताका गिधाळ अदिक खजुर इन मार्र अगुळकु ईरव, मंदिर इन दिवाल ईदा प्रकार देल माळकु ईरोद.
हुळ्ली इन वेदी
21 भवन इन दरवाजा अन खंबागोळ चौकोर ईरव, अदिक पवित्र जागा अन मुंदळोद रूप मंदिर इन घाई ईरोद.
22 वेदी काट इन माळकु ईरोद, अदिक अदुर ऊचाई नाक कय, अदिक लंबाई येढ्ढ कय इन ईरोद; अदिक अदुर क्वाना अदिक अदुर सप्पा पाट अदिक व्हर्सगोळ भी काठ इन ईरोद. आव नान से अंदुन, “ईद रा यहोवा अन हात्ती इन मेज हुन.”
पवित्र जागा अन दरवाजा
23 मंदिर अदिक पवित्र जागा अन दरवाजागोळ्द येढ्ढ येढ्ढ कवाळ ईरव.
24 अदिक हर ऊंद कवाळ दा येढ्ढ येढ्ढ मुळुसावाळा पल्ला ईरव, हर ऊंद कवाळ साटी येढ्ढ येढ्ढ पल्ला.
25 ह्यांग मंदिर इन दिवालगोळ दा गिधाळ अदिक खजुर इन मार्र अगुळकु ईरव, हांग अच अदुर कवाळगोळ मा भी ईरव, अदिक ओसारा अन व्हार्या इन दी हुळ्ली इन मोटा मोटा धरना ईरव.
26 ओसारा अन येढ्ढु दी झिलमिलीदार खिळकीगोळ ईरव अदिक खजुर इन मार्रगोळ अगुळकु ईरव; अदिक भवन इन व्हार्यागोळ कोठरीगोळ अदिक मोटा मोटा धरना भी ईरव.