6
परमेश्वर द्वारा मूर्तिपूजा अन निंदा
1 बाक यहोवा अन ईद वचन नान हाती पोहचुस्त:
2 “हे मंळसा अन सन्तान, तान बाय इस्त्राएल इन पहाळीगोळ दी माळकु आंदुर खिलाप भविष्यवाणी माळ,
3 अदिक अन, हे इस्त्राएल इन पहाळीगोळा, प्रभु यहोवा अन वचन केळी! प्रभु यहोवा सप्पा पहाळीगोळ से, अदिक नालागोळ अदिक घाटीगोळ से ईद अनतान: नोळी ना नीम मा तलवार नळसुसाईन, अदिक नीम पुजा अन धोळ जागागोळ्द नाश माळाईन.
4 नीमव वेदीगोळ नाश आदव अदिक नीम सुर्य अन प्रतिमागोळ मुरकु आदव; अदिक ना नीम मृत लॉकुरी नीम ई मूर्तीगोळ मुंद भिट बुळाईन.
5 ना इस्त्राएलीगोळोव लाशगोळी आंदुर मूर्तीगोळ मुंद ईटाईन, अदिक आंदुर येलुगोळी नीम वेदीगोळ आसपास बगरूसाईन.
6 नीम यास भी बसुसकु नगर आव, अव सप्पा हिंग नाश आदव, कि नीमव पहाळी माकळव पुजा अन जागा खण्डर आगेदव, नीमव वेदीगोळ नाश आदव अदिक ध्वस्त आगेदव, नीमव मूर्तीगोळ मुरुकु आदव, नीमव सुर्य अन प्रतिमागोळ तुकळा तुकळा आगेदव, अदिक नीम सप्पा कारीगरी मिटुसकु आदव.
7 नीम बीच दा लाशगोळ ढेर हतकु ईत्तव. आग नीव अर्त कोंडीर कि ना यहोवा हुईन.”
8 “तरी भी इस्त्राएलगोळा, ना नीम दा टु येनारा लॉकुरी जीत्ता बीट्ट बुळाईन. येनारा लॉकुर तलवार इन मार देल उळदोदार, अदिक आंदुर दुसरा राज्य दा तितर-बितर आगेदार. दुसरा द्याशगोळ दा बिखरूसकु आर ईंदुर अच ऊळदार.
9 नीमोर ऊळ्दकु लॉकुर आ राष्ट्रगोळ दा नानी याद माळ्यार, येल आंदुर बन्दी माळकु निष्कासित आगीदुर. आंदुर याद माळ्यार कि ना आंदरी दण्ड कोटीदीन, यतिकी आ दिनगोळ दा आंदुर दिल इन निष्ठा नान प्रती ईला ईरोद, अदिक आंदुर दुसरा द्यावगोळ्द मूर्तीगोळ मा कामनापूर्ण ध्यान कोट्टुर, आंदुर ईद अनुभव माळकु तान बेकार क्याल्सागोळ साटी खुद तान नजर दा बेकार ठहरूस्यार, अदिक अंदार कि आंदुर यास दुष्कर्म माळ्यार.
10 आग आंदुर जान्स कोंडार कि ना यहोवा हुईन, अदिक ना जो ईद अंदीन कि ना आंदुर्द नाश माळाईन, अद बेकार अंदिदील.”
11 प्रभु यहोवा ईद अनतान: “तान कय बडुकु अदिक काल आपळुसकु अन, इस्त्राएल इन घराना अन सप्पा घिनोना क्याल्सागोळ मा हाय, हाय, यतिकी आंदुर तलवार, हसु, अदिक मरी देल नष्ट आगेदार.
12 जो दुर आन आव मरी देल सोत्तान, अदिक जो हात्ती आन आव तलवार देल कोंदकु आदान; अदिक जो उळ्दकु नगर दा ईरतेला घेर्सकु आदान, आव हसु देल सोत्तान. ई प्रकार ना तान जलजलाहट आंदुर मा पुरा रीती देल ईळसाईन.
13 याग हर ऊंद धोळ्द पहाळी अदिक पहाळी इन हर ऊंद चोटी मा, अदिक हर ऊंद हिवरा मार्र इन ल्यालमा, अदिक हर ऊंद घना बांज मार्र इन सावली दा, येल येल आंदुर तान सप्पा मुरतीगोळी सुखदायक सुगन्ध द्रव्य येर्सतार, अल आंदुरोर कोंदकु आग्यार आ लॉकुर तान वेदीगोळ आसपास तान मुरतीगोळ बीच दा बिदकु ईत्तार; आग नीव लॉकुर जान्स कोंडीर कि ना यहोवा हुईन.
14 ना तान कय आंदुर खिलाप वाळुसकु आ द्याश इक सप्पा मान्नागोळ सांगुळ आळी टु हुडुकु रिबला ताका उजाळ उजाळ अच माळ कोमाईन. आग आंदुर जान्स कोंडार कि ना यहोवा हुईन.”