इफिसियों के नाम पौलुस प्रेरित की पत्री
इफिसिगोळ हेसुर पौलुस प्रेरित उन चिट्ठी
परिचय
मसीह अन जनम इन साठ वर्ष पयले इफिसिगोळ चिट्ठी अदिक कुलुस्सिगोळ चिट्ठी लगभग सांगुळ लिख्सकु आगीत.
प्रेरित पौलुस ईद सुचित माळतान कि आवा चिट्ठी इन लेखक हुन १:१ कुलुस्सिगोळ चिट्ठी इन घाई ईद चिट्ठी दा व्यक्तित्व शुभेच्छा नोळकु आगाल. तरी भी ज्यादा तर विधवानगोळ ईद मान्सतार कि पौलुस अच ईद चिट्ठी लिखसीदान. ईदा कारण प्रांत इन अलग अलग मंडली दा ईद चिट्ठी तिर्गुसकु वाचुसकु आगुल हिंग पौलुस उन ईरादा आग सकतद, याग आव ईद चिट्ठी लिख्सदुन आग पौलुस ईद हेळतान कि आव कैद दा ईरोन, ३:१; ४:१ अदिक ६:२० याग तिकिकुस इफिसिगोळ मंडली इक सिकली इफिसियों होगोन आग पौलुस ईद चिट्ठी आऊन कय दा कळुदुन ६:२१-२२
इफिसियों ऊंद हापाळ धोळ्द शयर ईरोद, आ समय एशिया माइनर प्रांत इन अद राजधानी ईरोद. शयर दा अर्तमिस हेसुर ईनव ग्रीक द्याव उन ऊंद धोळ्द मंदिर ईरोद यदुर कारण देल इफिसियों अक हापाळ प्रसिद्धी सिक्त, प्रेरितगोळ १९:२३-३१ ईद इफिसिगोळ मंडली सुरूवात वळ्लीद आत लेकीन बाद्दा कमजोर भी कांळ्सत प्रकाशितवाक्य २:१-७ परमेश्वर तान लॉकुरी निवळुस्कु यीशु मसीह अन द्वारा ह्यांग आंदुरव पापगोळ से छुटकारा कोट्टुन ईद मात पौलुस उन चिट्ठी इन पयला भाग स्पष्ट माळतद, आव मंडली इन तुलना आ शरीर इन सांगुळ माळतान कि यार्द मस्तक मसीह अच हुन अदिक आव अद क्वाना अन्द कल्ल आ इमारत देल यार्द क्वाना अन्द कल्ल मसीह हुन किताब इन दुसरा भाग दा मसीह जीवन ह्यांग जीऊस पायजे ईदुर बारा दा हेळतान.
रूप रेखा
१. पौलुस खुद इन परिचय कोटकु इफिसियों अक शुभेच्छा कोळतान. अध्याय १:१-२
२. बाद्दा आ मंडली इन मसीह अन सांगुळ ह्यांग रिश्ता ईर पायजे १:३–३:२१
३. बाद्दा पौलुस मसीह जीवन ह्यांग जीऊस पायजे ईदुर बारा दा हेळतान ४:१–६:२०
४. पौलुस आखरी शब्द दा चिट्ठी लिख्सकु खतम माळतान ६:२१-२४
1
1 नान पौलुस उन दी टु जो परमेश्वर उन इच्छा देल यीशु मसीह अन प्रेरित आन,
आ पवित्र अदिक मसीह यीशु दा विश्वासी लॉकुर्द हेसुर जो इफिसुस दा आद:
2 नाम्द आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
मसीह दा आत्मिक आशीषगोळ
3 नाम्द प्रभु यीशु मसीह अन्द परमेश्वर अदिक आप्प उन धन्यवाद आगुल कि आव नामी मसीह दा स्वर्गीय जागागोळ दा सब प्रकार इन आत्मिक आशीष कोट्टुन.
4 ह्यांग आव नामी दुनिया अन उत्पत्ति टु पयला अदुर्दा नीवळुस कोंडान
कि नाव आऊन हात्ती प्यार दा पवित्र अदिक निर्दोष आगुल.
5 अदिक तान इच्छा अन्द भला अभिप्राय इन अनुसार नामी तान साटी पयला टु ठहरूसदुन कि यीशु मसीह अन्द द्वारा नाव आऊन गोद पार आगुल,
6 कि आऊन आ अनुग्रह अन्द महिमा अन्द स्तुति आगुल, यारी आव नामी आ प्रिय दा सेंत-मेंत कोट्टुन.
7 नामी अदुर्दा आऊन रक्ता अन द्वारा छुटकारा, मतलब अपराधगोळ्द माफी, आऊन आ अनुग्रह अन्द धन इन अनुसार सिक्याद,
8 यारी आव पुरा ग्यान अदिक समझ सहित
नाम मा बहुतायत देल माळदुन.
9 यतिकी आव तान इच्छा अन्द भेद आ भला अभिप्राय इन अनुसार नामी हेळदुन, यारी आव खुद तान दा ठान्स कोंडीदुन
10 कि समयगोळ्द पुरा आगोद हिंग प्रबन्ध आगुल कि जो येनारा स्वर्ग दा आद अदिक जो येनारा पृथ्वी मा आद, सप्पा येनारा अद मसीह दा जमा माळुल.
11 अदुर्दा यदुर्दा नाव भी आऊन मनसा देल जो तान इच्छा अन्द मत इन अनुसार सप्पा येनारा माळतान, पयला टु ठहरूसकु आगकु मीरास बनसुल
12 कि नाव, यार पयला टु मसीह मा आशा ईटीदेव, आऊन महिमा अन्द स्तुति इन कारण आगुल.
13 अदिक अदुर्दा नीम मा भी, याग नीव सच्चाई इन वचन केळदीर जो नीम्द उद्धार इन खुशखबरी आद अदिक यदुर मा नीव विश्वास माळदीर, वादा माळकु आत पवित्र आत्मा अन्द छाप हत्त.
14 परमेश्वर उन साटी पैस्या देल कोंडकु आग्यार आंदुर्द छुटकारा अन्द साटी नाम्द मीरास इन बयाना हुन, कि आऊन महिमा अन्द स्तुति आगुल.
पौलुस उन प्रार्थना
15 ई कारण, ना भी आ विश्वास इन बातणी केळकु जो नीम लॉकुर दा प्रभु यीशु मा आन अदिक सप्पा पवित्र लॉकुर मा प्यार प्रगट आद,
16 नीम साटी धन्यवाद माळोद बिळालीन, अदिक तान प्रार्थनागोळ दा नीमी याद माळतेला ईरतीन
17 कि नाम्द प्रभु यीशु मसीह अन्द परमेश्वर जो महिमा अन्द आप्प हुन, नीमी तान पहचान दा ग्यान अदिक प्रकाश इन आत्मा कोळुल,
18 अदिक नीम्द मन इन कण्णगोळ ज्योतिर्मय आगुल कि नीव जान्स कोमी कि आऊन बुलाहट इन आशा येन आद, अदिक पवित्र लॉकुर दा आऊन मीरास इन महिमा अन्द धन ह्यांग आद,
19 अदिक आऊन सामर्थ्य नाम दा जो विश्वास माळतार, याट महान आद, आऊन शक्ति इन प्रभाव इन आ कार्य अन्द अनुसार
20 जो आव मसीह दा माळदुन कि आऊक सोत्तुर दा टु जित्ता माळकु स्वर्गीय जागागोळ दा तान ऊम्मा कय दी कुर्सदुन
21 ताकी सब प्रकार इन प्रधानता, अदिक अधिकार, अदिक सामर्थ्य, अदिक प्रभुता अन्द, अदिक हर ऊंद हेसुर इन म्याकुच, जो ना सिर्फ ई दुनिया दा पर बरावाळा दुनिया दा भी ताकोमकु आदीन, कुर्सदुन;
22 अदिक सप्पा येनारा आऊन कालगोळ ल्यालमा माळ बुट्टुन; अदिक आऊक सब वस्तुगोळ मा श्रेष्ट ठहरूसकु मंडली इक कोट बुट्टुन,
23 ईद आऊन मय हुन, अदिक आऊन परिपुर्णता आद जो सब दा सब येनारा पुरा माळतान.