3
यहूदीगोळ्द विनाश इन हाराम द्वारा साजीश
1 ई मातगोळ्द बाद्दा राजा क्षयर्ष अगागी वंश इनव हम्मदाता अन्द पार हामान उक म्याकळोद पद कोट्टुन, अदिक आऊक महत्व कोटकु आऊन साटी आऊन संगी हाकिमगोळ्द सिंहासनगोळ से ऊँचा सिंहासन ठहरूसदुन.
2 राजा अन्द क्याल्सा जो राजभवन इन फाटक दा ईरतोगोर, आंदुर हामान इन मुंद बांगकु प्रणाम माळतोगोर यतिकी राजा आऊन बारा दा हिंग अच आग्या कोटीदुन; लेकीन मोर्दकै ईला झुकसोन अदिक न आऊक प्रणाम माळोन.
3 आग राजा अन्द क्याल्सा माळावाळेर जो राजभवन इन फाटक दा ईरतोगोर, आंदुर मोर्दकै से केळदुर, “नी राजा अन्द आग्या अन्द येती उल्लंघन माळत्या?”
4 याग आंदुर आऊन से हर रोज हिंग अच माळतेला ईत्तुर, अदिक आव आंदुर्द ऊंद भी केळीदील, आग आंदुर ईद नोळोद इच्छा देल कि मोर्दकै अन्द ईद मात नळदीत का ईला, हामान उक हेळ बुट्टुन; आव आंदरी हेळ बुट्टीदुन कि ना यहूदी हुईन.
5 याग हामान नोळदुन कि मोर्दकै झुकसालुन, अदिक नान इक प्रणाम माळालुन, आग हामान हापाळ अच सिट्टी बंदुन.
6 आव केवल मोर्दकै मा कय नेगोद तान मर्यादा से कम जान्सदुन. यतिकी आंदुर हामान उक ईद हेळ बुट्टुर कि मोर्दकै या जाती इन हुन, इदुरसाटी हामान क्षयर्ष इन साम्राज्य दा ईरावाळेर पुरा यहूदीगोळ इक भी मोर्दकै अन्द जाती जानस्कु, नष्ट माळोद योजना माळदुन.
7 राजा क्षयर्ष उन हन्नेळवा वर्ष इन नीसान हेसुर इन पयला तिंगुळ दा, हामान अदार हेसुर इन हन्नेळवा तिंगुळ ताका अन्द ऊंद ऊंद दिन अदिक ऊंद ऊंद तिंगुळ इन साटी “पूर” मतलब चिट्टी तान मुंद हाक्सुसदुन.
8 आग हामान राजा क्षयर्ष से अंदुन, “नीन राज्य अन्द सप्पा प्रान्तगोळ दा ईरावाळेर द्याश द्याश इन लॉकुर्द न्याड्या तितर-बितर अदिक सटुस्कु ऊंद जाति आद, अदुर्द नियमगोळ से अलग आव; अदिक आंदुर राजा अन्द कानून मा नळालुर, इदुरसाटी आंदरी ईरगोळोद राजा अक लाभदायक ईला ईरोद.
9 अगर राजा अक स्वीकार ईरूल रा आंदरी नष्ट माळोद आग्या लिख्सकु आगुल, अदिक ना राजा अन्द भण्डारीगोळ्द कय दा राजभण्डार दा पहुचुसोर साटी, हत्त हजार बेळ्ली नव सिक्का कोळाईन.”
10 आग राजा तान ऊँगरा तान कय टु ईळुकु, अगागी हम्मदाता अन्द पार हामान उक, जो यहूदीगोळ्द दुश्मन ईरोन कोट्ट बुट्टुन;
11 अदिक राजा हामान से अंदुन, “अद बेळ्ली नीन इक कोटकु आत, अदिक आ लॉकुर भी, ताकी नी आंदुर से ह्यांग नी चाहासत्या हांगा व्यवहार माळ.”
12 हिंग अदा पयला तिंगुळ इन तेरहवा दिन इक राजा अन्द लेखक कारूकु आदुर, अदिक हामान उन आग्या अन्द अनुसार राजा अन्द सप्पा अधिपतिगोळ, अदिक सप्पा प्रान्तगोळ्द प्रधानगोळ, अदिक द्याश द्याश इन लॉकुर्द हाकिमगोळ साटी चिट्टीगोळ, ऊंद ऊंद प्रान्त इन अक्षरगोळ दा, अदिक ऊंद ऊंद द्याश इन लॉकुर्द भाषा दा राजा क्षयर्ष इन हेसुर देल लिख्सकु आत; अदिक अऊर दा राजा अन्द ऊँगरा इन छाप हचकु आत.
13 राज्य इन सप्पा प्रान्तगोळ दा ई आशय इन चिट्टीगोळ हरकारगोळ्द द्वारा कळुकु आत कि ऊंद अच दिन दा, मतलब अदार हेसुर इन हन्नेळवा तिंगुळ इन तेरवा दिन इक, येन हारोदव, येन हाळाबाट्ट, येन आर्त, येन चिकोर, सप्पा यहूदी कोंदकु आगुल, नष्ट माळकु आगुल अदिक आंदुर्द सत्यानाश माळकु आगुल; अदिक आंदुर्द धन सम्पत्ती लुट्सकु आगुल.
14 आ आग्या अन्द लेख इन नकल सप्पा प्रान्तगोळ दा खोल्सकु कळुकु आत कि सप्पा द्याश इन लॉकुर आ दिन इन साटी तयार आगेगुल.
15 ईद आग्या शूशन गढ़ दा कोटकु आत, अदिक हरकारे राजा अन्द आग्या देल तुरन्त होट्ट बुट्टुर. राजा अदिक हामान रा अंगुर इन रास्सा कुडुली कुरतोदुर, लेकीन शूशन नगर दा घबराहट फैलुसेत.