25
पवित्रस्थान इन साटी भेंट
(निर्गमन 35:4-9)
1 यहोवा मूसा से अंदुन,
2 “इस्त्राएलीगोळ से ईद अनेत कि नान साटी भेंट तरूल यास तान इच्छा देल कोळोद चाहास्यार आ सप्पा मुंदुर से नान भेंट ताकोमेत.
3 अदिक याता वस्तुगोळ्द भेंट आंदुर से ताकोमोद आद अव ईव हुव; मतलब व्हान्ना, बेळ्ली, पीतळ,
4 नीळा, जांभळा अदिक क्याचांद रंग इन कपळा, महीन मलमल कपळा, मर्री इन चुट्टी,
5 क्याचांद रंग देल रंग्सकु म्यांडागोळ्द तोगुल, सूइसगोळ्द तोगुल, बबूल इन हुळ्ली,
6 ऊजुळ इन साटी याण्णा, अभिषेक इन याण्णा साटी अदिक सुगन्धित लुबान साटी सुगन्धद्रव्य,
7 एपोद अदिक चपरास इन साटी सुलैमानी कल्ल, अदिक जळुसोर साटी मणि.
8 अदिक आंदुर नान साटी ऊंद पवित्रस्थान माळुल कि ना आंदुर बीच दा निवास माळाईन.
9 जो येनारा ना नीनी तोर्सतीन, मतलब निवासस्थान अदिक अदुर सप्पा सामान इन नमुना, अदुर्दा हिसाब देल नीव लॉकुर अदरी माळेतीर.”
वाचा अन सन्दुक
(निर्गमन 37:1-9)
10 “बबूल इन हुळ्ली इन ऊंद सन्दुक माळकु आगुल; अदुर लंबाई ढाई कय, अदिक चौळाई अदिक ऊचाई दिळ दिळ कय ईरूल.
11 अदिक अदरी शुद्ध व्हान्ना देल बुळ्क अदिक व्हार्या मळुसेतीर, अदिक सन्दुक इन म्याकुच नाकु दी व्हान्ना अन पट्टी बनुसेतीर.
12 अदिक व्हान्ना अन नाक कळागोळ घळुसकु अदुर नाकु कालगोळ मा, ऊंद दी येढ्ढ कळा अदिक दुसरा दी भी येढ्ढ कळा हचुसेतीर.
13 बाक बबूल इन हुळ्ली इन कोलगोळ माळसुसेतीर, अदिक अवरी भी व्हान्ना देल मळुसेतीर.
14 अदिक कोलगोळी सन्दुक इन येढ्ढु दीकळव कळागोळ दा हाकेतीर, यदुर देल अऊर शक्ति देल सन्दुक नेगुकु आगुल.
15 अव कोलगोळ सन्दुक इन कळागोळ दा हतकु ईरूल; अदिक अदुर देल अलग माळकु आगबाळुल.
16 अदिक जो गवाही इन चिट्टी ना नीनी कोळाईन अदरी अदा सन्दुक दा ईटेत.”
17 “बाक शुद्ध व्हान्ना अन ऊंद प्रायश्चित इन झाकनी माळसुसेतीर, अदुर्द लंबाई ढाई कय, अदिक चौळाई दिळ कय ईरूल.
18 अदिक व्हान्ना मळुसकु येढ्ढ करूब माळसुसकु प्रायश्चित इन झाकनी इन येढ्ढु क्वाना मा हचुसेत.
19 ऊंद करूब ऊंद क्वाना मा अदिक दुसरा करूब दुसरा क्वाना मा हचुसेत; अदिक करूबगोळी अदिक प्रायश्चित इन झाकनी इक ऊंदा तुकळा देल माळकु अदुर्द येढ्ढु क्वाना मा हचुसेत.
20 आ करूबगोळ्द पंख म्याकुच टु हिंग फैलुस्कु बनसुल कि प्रायश्चित इन झाकनी अऊर देल मुचकु ईरूल, अदिक अऊर मार्रगोळ आमने-सामने अदिक प्रायश्चित इन झाकनी दी ईरूल.
21 अदिक प्रायश्चित इन झाकनी इक सन्दुक इन म्याकुच हचुसेत; अदिक जो गवाही इन चिट्टी ना नीनी कोळाईन अदरी सन्दुक इन बुळ्क ईटेत.”
22 ना अदुर म्याकुच ईतकु नीन से मुलाकात माळतोगाईन; अदिक इस्त्राएलीगोळ्द साटी यास आग्यागोळ नानी नीनी कोळोद बिद्दीत, आ सप्पा अन बारा दा प्रायश्चित इन झाकनी इन म्याकुच टु अदिक आ करूबगोळ्द न्याड्या दा टु, जो गवाही इन चिट्टी इन सन्दुक मा ईत्ताव, नीन से मातकात हेळतोगाईन.
पवित्र मेज
(निर्गमन 37:10-16)
23 “बाक बबूल इन हुळ्ली इन ऊंद मेज माळसुसेत; अदुर लंबाई येढ्ढ कय, चौळाई ऊंद कय, अदिक ऊचाई दिळ कय ईरूल.
24 अदरी शुद्ध व्हान्ना देल मळसुसेत, अदिक अदुर नाकु दी व्हान्ना अन ऊंद पट्टी माळसुसेत.
25 अदिक अदुर नाकु दी नाक बेळ्ल चौळा ऊंद पटरी माळसुसेत, अदिक ई पटरी इन नाकु दी व्हान्ना अन ऊंद पट्टी माळसुसेत.
26 अदिक व्हान्ना नव नाक कळा माळसुसकु मेज इन आ नाकु क्वाना दा हचुसेत जो अदुर्द नाकु कालगोळ दा ईत्ताव.
27 अव कळागोळ पटरी इन हात्ती का ईरूल, अदिक मेज नेगोर साटी कोलगोळ ईटेत.
28 कोलगोळी बबूल इन हुळ्ली देल माळसुसकु व्हान्ना देल मळसुसेत, अदिक मेज अऊर देला नेगुकु आगुल.
29 अदिक अऊर परात अदिक धूपदान, अदिक मग्गागोळ अदिक रीचुसव कटोरीगोळ, सप्पा शुद्ध व्हान्ना अन माळसुसेत.
30 अदिक मेज मा नान मुंद भेंट इन रोट्टीगोळ हमेशा ईटतोगेत.”
व्हान्ना नव दिवट
(निर्गमन 37:17-24)
31 “बाक शुद्ध व्हान्ना अन ऊंद दिवट माळसुसेत. ईद दिवट घळुस्द व्हान्ना देल बन्सकु ईरूल; अदुर्द पुष्पकोष, गाठ अदिक फूल, सप्पा ऊंदा तुकळा अन बन्सकु ईरूल;
32 अदिक अदुर किनारागोळ देल आर डगाली होळुल, मुर डगालीगोळ रा दिवट इन ऊंद दी टु अदिक मुर डगालीगोळ अदुर दुसरा दी टु होटकु ईरूल;
33 ऊंद ऊंद डगाली दा बादाम इन फूल इन घाई मुर मुर पुष्पकोष, ऊंद ऊंद गाठ, अदिक ऊंद ऊंद फूल ईरूल; दिवट दा टु होळ्द आरू डगालीगोळ्द ईदा आकार या रूप ईरूल;
34 अदिक दिवट इन डण्डी दा बादाम इन फूल इन घाई नाक पुष्पकोष तान तान गाठ अदिक फूल समेत ईरूल;
35 अदिक दिवट दा टु होळ्द आरू डगालीगोळ दा टु येढ्ढ येढ्ढ डगालीगोळ्द ल्यालमा ऊंद ऊंद गाठ ईरूल, अव दिवट समेत ऊंदा तुकळा अन बन्सकु ईरूल.
36 अऊर्द गाठगोळ अदिक डगालीगोळ, सप्पा दिवट समेत ऊंदा तुकळा अन ईरूल, शुद्ध व्हान्ना मळुसकु पुरा दिवट ऊंदा तुकळा अन माळसुसेत.
37 अदिक येळ दिंग्या माळसुसेत; अदिक दिंग्या होताक्कु आगुल कि अव दिवट इन मुंद ऊजुळ कोळुल.
38 अदुर्द चिमटा अदिक ताटी सप्पा शुद्ध व्हान्ना अन ईरूल.
39 अद सप्पा ई पुरा सामान समेत चौतीस किलो तीम शुद्ध व्हान्ना अन बनसुल.
40 अदिक सावधान ईतकु ई सप्पा वस्तुगोळी आ नमुना अन घाई माळसुसेत, जो नीनी ई पहाळी मा तोर्सकु आग्याद.”