28
याजकगोळव पवित्र कपळा
(निर्गमन 39:1-7)
1 “बाक नी इस्त्राएलीगोळ दा टु तान वार्ट हारून, अदिक नादाब, अबीहू, एलीआजर अदिक ईतामार हेसुर इनोर आऊन पारगोळी तान हात्ती तरेत कि आंदुर नान साटी याजक उन क्याल्सा माळुल.
2 अदिक नी तान वार्ट हारून उन साटी वैभव अदिक शोभा अन निमित्त पवित्र कपळा माळसुसेत.
3 अदिक यास मुंदुर्द मन दा बुद्धि आद, यारी ना बुद्धि कोळावाळा आत्मा देल परिपुर्ण माळीन, आंदरी नी हारून उन कपळा माळोद आग्या कोळ कि आंदुर नान निमित्त याजक उन क्याल्सा माळोर साटी पवित्र बनसुल.
4 जो कपळा आंदरी माळव बिद्दाव अव ईव हुव, मतलब छातीबन्द, अदिक एपोद, अदिक बागा, नाक खाना अन अंगरखा, पगळी अदिक कमरबन्द; ईवा पवित्र कपळा नीन वार्ट हारून अदिक आऊन पारगोळ साटी माळकु आगुल कि आंदुर नान साटी याजक उन क्याल्सा माळुल.
5 अदिक आंदुर व्हान्ना अदिक नीळा अदिक जांभळा अदिक क्याचांद रंग इन अदिक सूक्ष्म सन इन कपळा हुडुल.”
6 “आंदुर एपोद उक व्हान्ना अदिक नीळा, जांभळा अदिक क्याचांद रंग इन कपळा अन अदिक महीन मलमल सूक्ष्म सनी इन कपळा तयार माळुल, जो निपुण कढ़ाई इन क्याल्सा माळावाळा अन कय इन क्याल्सा ईरूल.
7 अद ईत्ता प्रकार देल जोळ्सकु आगुल कि अऊर येढ्ढु बाक्का अन क्वानागोळ आपस दा मिलुसकु ईरूल.
8 अदिक एपोद मा जो कढ़ुक्द पट्टी ईत्तीत अदुर बनावट अदुर्दा घाई ईरूल, अदिक अव येढ्ढु बिना जोळ इन ईरूल, अदिक व्हान्ना अदिक नीळा, जांभळा अदिक क्याचांद रंग इन अदिक महीन मलमल सूक्ष्म सनी इन कपळा अन ईरूल.
9 बाक येढ्ढ सुलैमानी मणि हुडुकु अऊर मा इस्त्राएल इन पारगोळ हेसुर अग्ळुसेत,
10 आंदुर हेसुरगोळ दा टु आर ऊंद मणि मा अदिक मिग्द आर हेसुर दुसरा मणि मा, इस्त्राएल इन पारगोळ्द उत्पत्ति इन अनुसार अग्ळुसेत.
11 ह्यांग जौहरी मुद्रा मा नक्काशी माळतान हांग अच नी भी येढ्ढ मणिगोळी इस्त्राएल इन पारगोळ्द हेसुर इन अनुसार अग्ळुसेत अदिक अवरी व्हान्ना अन खानगोळ दा जळुस बुळेत.
12 अदिक येढ्ढु मणिगोळी एपोद इन बाक्कागोळ मा हचुसेत,अव इस्त्राएलीगोळ्द याद तोरसुसावाळा मणि ठहरूस्याव; मतलब हारून आंदुर हेसुर यहोवा अन मुंद तान येढ्ढु बाक्कागोळ मा याद साटी हचकु ईरूल.
13 “बाक व्हान्ना नव खानागोळ माळसुसेत,
14 अदिक डोरीगोळ घाई गुथुस्द येढ्ढ जंजीर शुद्ध व्हान्ना अन माळसुसेत; अदिक गुथुस्द जंजीरगोळी आ खानागोळ दा जळुसेत.”
छातीबन्द या चपरास
(निर्गमन 39:8-21)
15 बाक न्याय इन चपरास इक भी कढ़ाई इन क्याल्सा अन माळसुसेत, एपोद इन घाई व्हान्ना, अदिक नीळा, जांभळा अदिक क्याचांद रंग इन अदिक महीन मलमल सूक्ष्म सनी इन कपळा अन अदरी माळसुसेत.
16 अद चौकोन अदिक दोहरी ईरूल, अदिक अदुर लंबाई अदिक चौळाई ऊंद ऊंद बित्ता अन ईरूल.
17 अदिक अदुर दा नाक पंग्ति मणि जळुसेत. पयला पंग्ति दा रा माणिक्य, पुखराज अदिक पन्ना ईरूल;
18 दुसरा पंग्ति दा मरकत, नीलमणि अदिक हीरा:
19 तिसरा पंग्ति दा लशम, सुर्यकांत अदिक नीलम;
20 अदिक चौथा पंग्ति दा फिरोजा, सुलैमानी मणी अदिक यशब ईरूल; ईव सप्पा व्हान्ना अन खान दा जळुसकु आगुल.
21 अदिक इस्त्राएल इन पारगोळ्द यास हेसुर आव आस मणि ईरूल, मतलब मतलब अदुर्द हेसुरगोळ्द गिनती इन अनुसार ह्न्नेळ हेसुर अगळुल, हन्नेळ गोत्र दा टु ऊंद ऊंद उन हेसुर ऊंद ऊंद मणि मा हिंग अगळुल ह्यांग मोहर इन नक्काशी अगुळकु आगतद.
22 बाक चपरास मा डोरीगोळ घाई गुथुस्द शुद्ध व्हान्ना अन जंजीर हचुसेत;
23 अदिक चपरास दा व्हान्ना अन येढ्ढ कळीगोळ हचुसेत, अदिक येढ्ढु कळीगोळी चपरास इन येढ्ढु क्वाना मा हचुसेत.
24 अदिक व्हान्ना नव येढ्ढु जंजीरगोळी आ येढ्ढु कळीगोळ दा जो चपरास इन क्वानागोळ मा ईत्ताव हचुसेत;
25 अदिक गुथुस्द येढ्ढु जंजीरगोळ्द येढ्ढु मिग्द क्वानागोळी येढ्ढु खानागोळ दा जळुसकु एपोद इन येढ्ढु बाक्कागोळ्द बंधनगोळ मा अदुर मुंद हचुसेत.
26 बाक व्हान्ना नव मात्त येढ्ढ कळीगोळ माळसुसकु चपरास इन येढ्ढु क्वाना मा, अदुर आ कोर मा जो एपोद इन बुळ्क दी ईत्तीत हचुसेत.
27 बाक अऊर अलावा व्हान्ना नव मात्त येढ्ढ कळीगोळ माळसुसकु एपोद इन येढ्ढु बाक्कागोळ्द बंधनगोळ मा, ल्यालमा टु अदुर मुंद अदिक अदुर जोळ इन हात्ती एपोद इन कढ़ाई माळ्द पट्टा अन म्याकुच हचुसेत.
28 अदिक चपरास तान कळीगोळ द्वारा एपोद इन कळीगोळ दा नीळा जाळी देल कटसुसकु आगुल, ई रिति देल अद एपोद इन कढ़ाई माळ्द पट्टा मा बन्सकु ईरूल, अदिक चपरास एपोद मा टु अलग आगबाळुल.
29 याग याग हारून पवित्रस्थान दा प्रवेश माळुल, आग आग आव न्याय इन चपरास मा तान दिल इन म्याकुच इस्त्राएलीगोळ्द हेसुरगोळी हचकु ईरूल, यदुर देल यहोवा अन मुंद आंदुर याद हमेशा ईरूल.
30 अदिक नी न्याय इन चपरास दा ऊरीम अदिक तुम्मीम इक ईटेत, अदिक याग याग हारून यहोवा अन मुंद बरूल, आग आग अव आऊन दिल इन म्याकुच ईरूल, ई प्रकार देल हारून इस्त्राएलीगोळ साटी यहोवा अन न्याय इक तान दिल इन म्याकुच हमेशा हचकु ईरूल.
दुसरा याजकीय कपळा
(निर्गमन 39:22-31)
31 “बाक एपोद उन बागा अक पुरा नीळा रंग इन माळसुसेत.
32 अदुर बनावट हिंग ईरूल कि अदुर न्याड्या दा ताल्ला हाक्कोर साटी ख्वादरा ईरूल, अदिक आ ख्वादरा अन नाकु दी बख्तर इन ख्वादरा अन घाई ऊंद बुनुस्द कोर ईरूल कि अद हरूतीदील.
33 अदुर्द ल्यालमागोळ्द घ्यारा दा नाकु दी नीळा, जांभळा अदिक क्याचांद रंग इन कपळा अन अनार माळसुसेत, अदिक अदुर न्याड्या न्याड्या नाकु दी व्हान्ना अन घंटीगोळ हचुसेत,
34 मतलब ऊंद व्हान्ना अन घंटी अदिक ऊंद अनार, बाक मात्त ऊंद व्हान्ना अन घंटी अदिक ऊंद अनार, ईदा प्रकार देल बागा अन ल्यालमागोळ्द घ्यारा दा नाकु दी हिंग अच ईरूल.
35 अदिक हारून आ बागा अक स्यावा टहल माळाहोती हाकुल, कि याग याग आव पवित्रस्थान इन बुळ्क यहोवा अन मुंद होगुल या व्हार्या होळुल, आग आग अदुर्द आवाज केळ बरूल, ईलारा आव सोतोदान.”
36 “बाक शुद्ध व्हान्ना अन ऊंद पट्टी माळसुसेत, अदिक ह्यांग छापा दा हांगा अदुर दा अक्षर अगुळकु आगुल, मतलब ‘यहोवा अन साटी पवित्र.’
37 अदिक अदरी नीळा फिता देल कटेत; अदिक अद पगळी इन मुंदळोद हिस्सा मा ईरूल.
38 अद हारून उन माथा मा ईरूल, इदुरसाटी कि इस्त्राएली जो येनारा पवित्र ठहरूसुल, मतलब यास पवित्र वस्तुगोळ भेंट दा येर्सुल आ पवित्र वस्तुगोळ्द दोष हारून नेगुतेला ईरूल, अदिक अद हमेशा आऊन माथा मा ईरूल, यदुर देल यहोवा आंदुर से खुश ईरूल.”
39 अंगरखा अक सूक्ष्म सनी इन कपळा अन नाक खानावाळा माळसुसेत, अदिक ऊंद पगळी भी सूक्ष्म सन इन कपळा अन माळसुसेत, अदिक बेलबुटा अन कढ़ाई इन क्याल्सा माळ्द ऊंद कमरबन्द भी माळसुसेत.
40 “बाक हारून उन पारगोळ साटी भी अंगरखागोळ अदिक कमरबन्द अदिक टोपीगोळ माळसुसेत; ई कपळागोळ भी वैभव अदिक शोभा अन साटी माळकु आगुल.
41 तान वार्ट हारून अदिक आऊन पारगोळी ईवा कपळागोळ हाकसुसकु आंदुर अभिषेक अदिक संस्कार माळेत, अदिक आंदरी पवित्र माळेत कि आंदुर नान साटी याजक उन क्याल्सा माळुल.
42 अदिक आंदुर साटी सन इन कपळा अन जंग्यागोळ माळसुसेत यदुर देल आंदुर मय झाक्सकु ईरूल, अव नेळु टु रा जांग ताका अच ईरूल;
43 अदिक याग याग हारून या आऊन पारगोळ मिलाप इन तम्बु दा प्रवेश माळुल, या पवित्र स्थान दा स्यावा टहल माळली वेदी इन हात्ती होगुल, आग आग आंदुर आ जंग्यागोळी हाक्कु ईरूल, ईलारा हिंग आगबाळुल कि आंदुर पापी ठहरूसुल अदिक सोतोगुल. ईद हारून उन साटी अदिक आऊन बाद्दा आऊन वंश इन साटी भी हमेशा अन विधी ठहरूसुल.”