30
धूप-वेदी
(निर्गमन 37:25-28)
1 “बाक धूप होताकोर साटी बबूल इन हुळ्ली इन वेदी बनुसेत.
2 अदुर लम्बाई ऊंद कय अदिक चौळाई ऊंद कय इन ईरूल, अद चौकोन ईरूल, अदिक अदुर ऊचाई येढ्ढ कय इन ईरूल, अदिक अदुर सींग अदुर्दा तुकळागोळ देल बन्सकु आगुल.
3 अदिक वेदी इन म्याकळव पल्लागोळ अदिक नाकु दीकळव बाजुगोळ अदिक सींगगोळी शुद्ध व्हान्ना देल मळुसेत, अदिक इदुर नाकु दी व्हान्ना अन ऊंद बाळ बनुसेत.
4 अदिक इदुर बाळ इन ल्यालमा इदुर आमने सामने अन येढ्ढु पल्लागोळ मा व्हान्ना अन येढ्ढ येढ्ढ कळागोळ बन्सकु इदुर येढ्ढु दी हचेत, अव इदुर्द नेगव डंडागोळ खानागोळ्द क्याल्सा कोट्टाव.
5 डंडागोळी बबूल इन हुळ्ली इन बन्सकु अवरी व्हान्ना देल मळुसेत.
6 अदिक नी अदरी आ पळदा अन मुंद ईटेत जो गवाही इन चिट्टी इन सन्दुक इन मुंद आद, मतलब प्रायश्चित इन झाकनी इन मुंद जो गवाही इन चिट्टी इन म्याकुच आद, अल्या ना नीन से मुलाकात माळतोगाईन.
7 अदिक अदा वेदी मा हारून सुगन्धित धूप होताकुल; हर रोज हुंजकुका याग आव दिंग्या अक ठीक माळुल आग आव धूप होताकुल,
8 अदिक द्यावमुळका अन होती याग हारून दिंग्यागोळी होताकुल आग धूप होताकतेला ईरूल, ईद धूप यहोवा अन मुंद नीम पीढ़ोन पीढ़ी दा नित्य होताक्कु आगुल.
9 आ वेदी मा नीव यातोदारा दुसरा प्रकार इन धूप होताक बाळेतीर, अदिक ना अदुर मा होमबली अदिक ना अन्नबलि येर्सेतीर; अदिक ना अदुर मा अर्घ कोळेतीर.
10 हारून साल दा ऊंद घन इदुर सींगगोळ मा प्रायश्चित माळुल; अदिक नीम पीढ़ोन पीढ़ी दा साल दा ऊंद घन प्रायश्चित इन पापबली इन रक्ता देल इदुर मा प्रायश्चित माळकु आगुल; ईद यहोवा अन साटी परमपवित्र आद.”
प्राणगोळ्द प्रायश्चित इन रूपये
11 आग यहोवा मूसा से अंदुन,
12 “याग नी इस्त्राएलीगोळ्द गिनती ताकोमली हत्या, आग आळा होती यार्द गिनती आगीदाद आंदुर तान तान जीवा अन साटी यहोवा अक प्रायश्चित इन शुल्क कोळुल, यदुर देल याग नी आंदुर गिनती माळतेला ईत्या आ समय यातोदारा विपत्ति आंदुर मा बंदकु बिळबाळुल.
13 यास लॉकुर आळ्दकु आदार आंदुर पवित्रस्थान इन शेकेल इन अनुसार आर्धा शेकेल कोळुल ईद शेकेल ईप्पत गेरा अन ईरतद, यहोवा अन भेंट आर्धा शेकेल ईरूल.
14 ईप्पत साल या अदुर से यक्कुल अवस्था नोर यास आळ्दकु आगुल आंदुर दा टु ऊंद ऊंद मंळसा यहोवा अक शुल्क कोळुल.
15 याग नीम जीवा अन प्रायश्चित इन निमित्त यहोवा अन भेंट अर्पित माळकु आगुल, आग ना रा अमिर लॉकुर आर्धा शेकेल से यक्कुल कोळुल; अदिक ना गरीब लॉकुर अदुर से गोर्त कोळुल.
16 अदिक नी इस्त्राएलीगोळ से प्रायश्चित इन रूपये ताकोमकु मिलाप इन तम्बु उन क्याल्सा दा हचेत; यदुर देल अद यहोवा अन मुंद इस्त्राएलीगोळ्द स्मरणार्थ चिन्ह ठहरूसुल, अदिक आंदुर जीवगोळ्द प्रायश्चित भी आगुल.”
पीतळा अन गंगार
17 यहोवा मूसा से अंदुन,
18 “तोळोर साटी पीतळा अन ऊंद हौदी, अदिक अदुर पाया भी पीतळा अन बनुसेत. अदरी मिलाप इन तम्बु अदिक वेदी इन न्याड्या दा ईटकु अदुर दा नीर तुम बुळेत;
19 अदिक अदुर दा हारून अदिक आऊन पारगोळ तान तान कय काल तोळु तोगुल.
20 याग याग आंदुर मिलाप इन तम्बु दा प्रवेश माळुल आग आग आंदुर कय काल नीर देल तोळुल, ईलारा सोतोदार; अदिक याग याग आंदुर वेदी इन हात्ती स्यावा टहल माळली, मतलब यहोवा अन साटी हवन होताकली बरूल आग आग आंदुर कय काल तोळुल, हिंग आगबाळुल कि आंदुर सोतोगुल.
21 ईद हारून अदिक आऊन पीढ़ोन पीढ़ी इन वंश इन साटी हमेशा अन विधि ठहरूसुल.”
अभिषेक इन याण्णा
22 बाक यहोवा मूसा से अंदुन,
23 “नी वळ्लीद से वळ्लीद सुगन्धद्रव्य कोम, मतलब पवित्रस्थान इन शेकेल इन अनुसार अईद सौ लुबान तान ताना होळ्द गन्धरस, अदिक अदुर आर्धा, मतलब ढाई सौ शेकेल सुगन्धित कलमी, अदिक ढाई सौ शेकेल सुगन्धित अगर,
24 अदिक अईद सौ शेकेल तेजपान, अदिक ऊंद हीन जैतून इन याण्णा कोंडकु
25 अऊर से अभिषेक इन पवित्र याण्णा, मतलब गन्धरस इन रिति देल तयार माळ्द सुगन्धित याण्णा माळसुसेत; ईद अभिषेक इन पवित्र याण्णा ठहरूसुल.
26 अदिक अदुर देल मिलाप इन तम्बु उन, अदिक गवाही इन चिट्टी इन सन्दुक इन,
27 अदिक सप्पा सामान समेत मेज इन, अदिक सामान समेत दीवट इन, अदिक धूपवेदी इन,
28 अदिक सप्पा सामान समेत होमबली वेदी इन, अदिक पाया समेत गंगार इन अभिषेक माळेत,
29 अदिक अवरी पवित्र माळेत, यदुर देल अव परमपवित्र ठहरूसुल; अदिक जो येनारा अऊर से मुटकु आदीत अद पवित्र आगेदीत.
30 बाक हारून उन आऊन पारगोळ सांगुळ अभिषेक माळेत, अदिक ई प्रकार देल आंदरी नान साटी याजक इन क्याल्सा माळोर साटी पवित्र माळेत.
31 अदिक इस्त्राएलीगोळी नान ईद आग्या केळसेत, ‘ईद याण्णा नीम पीढ़ोन पीढ़ी दा नान साटी पवित्र अभिषेक इन याण्णा आदीत.
32 ईद यातारा मंळसा अन मय मा हाक्कु आगबाळुल, अदिक मिलावट दा अदुर घाई मात्त येनु माळ बाळेतीर; ईद पवित्र आद, ईद नीम साटी भी पवित्र आदीत.
33 जो यावारा ईदुर घाई येनारा बनुसुल, या जो यावारा ईदुर दा टु येनारा पराया कुलवाळेर मा हचुल, आव तान लॉकुर दा टु नष्ट माळकु आगुल.’ ”
पवित्र सुगन्धद्रव्य
34 बाक यहोवा मूसा से अंदुन, “बोल, नखी अदिक कुन्दरू, ईव सुगन्धद्रव्य शुद्ध लुबान समेत कोमेत, ईव सप्पा ऊंद तवल इनव ईरूल,
35 अदिक ईऊर धूप मतलब ऊप्प मिसळुसकु गन्धी इन रिति इन अनुसार शुद्ध अदिक पवित्र सुगन्धद्रव्य माळसुसेत.
36 बाक अदुर दा टु थ्वाळासा पिसुसकु बारीक माळकु हाकेत, आग अदुर दा टु थ्वाळासा मिलाप इन तम्बु दा गवाही इन चिट्टी इन मुंद, यल ना नीन से मुलाकात माळतोगाईन, ईटेत; अद नीम साटी परमपवित्र आदीत.
37 जो धूप नी माळसुस्या, मिलावट दा अदुर घाई नीव लॉकुर तान साटी मात्त येनारा माळ बाळेतीर; अद नीम मुंद यहोवा अन साटी पवित्र आदीत.
38 जो यावारा वास ताकोमोर साटी अदुर घाई येनारा बनुसुल आव तान लॉकुर दा नष्ट माळकु आगुल.”