37
वाचा अन सन्दुक बन्सकु आगोद
(निर्गमन 25:10-22)
1 बाक बसलेल बबूल इन हुळ्ली इन सन्दुक बनुसदुन; अदुर्द लंबाई येढ्ढवार कय, चौळाई दिळ कय, अदिक ऊचाई दिळ कय इन ईरोद.
2 आव अदरी बुळ्क व्हार्या शुद्ध व्हान्ना देल मळुसदुन, अदिक अदुर नाकु दी व्हान्ना अन बाड़ बनुसुदुन.
3 अदिक अदुर नाकु कालगोळ मा हचली आव व्हान्ना नव नाक कळागोळ माळदुन, येढ्ढ कळा ऊंद दी अदिक येढ्ढ कळा दुसरा दी हतदव.
4 बाक आव बबूल इन डण्डागोळ माळदुन, अदिक अवरी व्हान्ना देल मळुसदुन,
5 अदिक अवरी सन्दुक इन येढ्ढु दीकळोद कळागोळ दा हाकदुन कि अऊर सहारा देल सन्दुक नेगुकु आगुल.
6 बाक आव चोखा व्हान्ना देल प्रायश्चित इन झाकनी माळदुन; अदुर लंबाई येढ्ढवार कय अदिक चौळाई दिळ कय इन ईरोद.
7 अदिक आव व्हान्ना मळुसकु येढ्ढ करूब प्रायश्चित इन झाकनी इन येढ्ढु क्वाना मा बनुसदुन;
8 ऊंद करूब ऊंद क्वाना मा, अदिक दुसरा करूब दुसरा क्वाना मा बनुस्त; आव अवरी प्रायश्चित इन झाकनी इन सांगुळ ऊंदा तुकळा अन येढ्ढु क्वाना मा बनुसदुन.
9 अदिक करूबगोळ्द पंख म्याकुच टु फैलुसदुर घाई बन्सदव, अदिक आ पंखगोळ देल प्रायश्चित इन झाकनी मुचकु बनुस्त, अदिक अऊर बाय आमने सामने अदिक प्रायश्चित इन झाकनी दी माळ्द बन्सदव.
पवित्र मेज इन माळकु आगोद
(निर्गमन 25:23-30)
10 बाक आव बबूल इन हुळ्ली इन मेज इक माळदुन; अदुर लंबाई येढ्ढ कय, चौळाई ऊंद कय, अदिक ऊचाई दिळ कय इन ईरोद;
11 अदिक आव अदरी शुद्ध व्हान्ना देल मळुसदुन, अदिक अदुर दा नाकु दी व्हान्ना अन ऊंद बाड़ माळदुन.
12 अदिक आव अदुर साटी नाक बेळ्ल चौळा ऊंद चौखट, अदिक ई पटरी इन साटी नाकु दी व्हान्ना अन ऊंद बाड़ माळदुन.
13 आव मेज इन साटी व्हान्ना अन नाक कळागोळ माळकु आ नाकु क्वानागोळ दा हचदुन, जो अऊर नाकु कालगोळ मा ईरव.
14 अव कळागोळ चौखट इन हात्ती मेज नेगव डण्डागोळ्द खानागोळ क्याल्सा कोळली बन्सदव.
15 आव मेज नेगोर साटी डण्डागोळी बबूल इन हुळ्ली इन बनुसदुन अदिक व्हान्ना देल मळुसदुन.
16 अदिक आव मेज माकळोद सामान मतलब परात, धूपदानी, कटोरागोळ, अदिक रीचुसव बरतन सप्पा शुद्ध व्हान्ना देल बनुसदुन.
व्हान्ना अन दीवट इन माळकु आगोद
(निर्गमन 25:31-40)
17 बाक आव शुद्ध व्हान्ना गढ़ इन पाया अदिक डण्डी समेत दीवट इक माळदुन; अदुर पुष्पकोष, गाठ, अदिक फूल सप्पा ऊंदा तुकळा नव बन्सदव.
18 अदिक दीवट दा टु होळ्द आर डगालगोळ बनुसदव; मुर डगालगोळ अदुर ऊंद दी टु अदिक मुर डगालगोळ अदुर दुसरा दी टु होटकु बन्सदव.
19 ऊंद ऊंद डगाली दा बदाम इन फूल इन घाई मुर मुर पुष्पकोष, ऊंद ऊंद गाठ, अदिक ऊंद ऊंद फूल बन्सत; दीवट दा टु होळ्द आ आर डगालगोळ्द ईदा आकार आत.
20 अदिक दीवट इन डंडा दा बदाम इन फूल इन घाई तान तान गाठ अदिक फूल समेत नाक पुष्पकोष बन्सदव.
21 अदिक दीवट दा टु होळ्द आर डगालगोळ दा टु येढ्ढ येढ्ढ डगालगोळ्द ल्यालमा ऊंद ऊंद गाठ दीवट इन सांगुळ ऊंदा तुकळा अन बन्सदव.
22 गाठगोळ अदिक डगालगोळ सप्पा दीवट इन सांगुळ ऊंदा तुकळा अन बन्सदव; पुरा दीवट नळ्सद शुद्ध व्हान्ना अन अदिक ऊंदा तुकळा अन बन्सत.
23 अदिक आव दीवट इन येळ दिंग्या अदिक थाली अदिक गुलदान शुद्ध व्हान्ना अन माळदुन.
24 आव सप्पा सामान समेत दीवट इक लगभग चौतीस किलो तिमुर्द व्हान्ना अन माळदुन.
धूप वेदी इन माळकु आगोद
(निर्गमन 30:1-5)
25 बाक आव बबूल इन हुळ्ली इन धूपवेदी भी माळदुन; अदुर लंबाई ऊंद कय अदिक चौळाई ऊंद कय इन ईरोद; अद चौकोन बन्सत, अदिक अदुर ऊचाई येढ्ढ कय इन ईरोद; अदिक अदुर सींग ऊंद अच तुकळा नव माळकु ईरव.
26 म्याकळव पल्लागोळ अदिक नाकु दीकळव बाजुगोळ अदिक सींगगोळ समेत आव आ वेदी इक शुद्ध व्हान्ना देल मळुसदुन; अदिक अदुर नाकु दी व्हान्ना अन ऊंद बाड़ माळदुन,
27 अदिक आ बाड़ इन ल्यालमा अदुर येढ्ढु पल्लागोळ मा आव व्हान्ना नव येढ्ढ कळागोळ बनुसदुन, जो अदुर नेगव डण्डागोळ्द खाचागोळ क्याल्सा कोळुल.
28 अदिक डण्डागोळी आव बबूल इन हुळ्ली इन बनुसदुन अदिक व्हान्ना देल मळुसदुन.
धूप अदिक शुद्ध याण्णा अन माळकु आगोद
(निर्गमन 30:22-38)
29 आव अभिषेक इन पवित्र याण्णा अदिक सुगन्धद्रव्य अन धूप ईदा रिति इन अनुसार माळदुन.