24
इसहाक उन मदा अन वर्णन
1 अब्राहम हापाळ बाट्ट आगेगीदुन, अदिक यहोवा आऊक सप्पा प्रकार देल आशीषित माळीदुन.
2 अब्राहम तान पुराना सेवक से, जो मान्ना अन अदिक पुरा संपत्ती इंद देखभाल माळतोगोन, अंदुन, “नी तान कय नान जांघ मा ईट.
3 अदिक नान से आकाश अदिक पृथ्वी अन परमेश्वर यहोवा अन ई बारा दा कसम तीन, कि नी नान पार उन साटी कनानीगोळ्द पोरगोळ दा टु, यार बीच दा ना ईरतीन, यारीकु तरतीदील.
4 लेकीन नी नान द्याश दा नानोर अच घराना हाती होगकु नान पार इसहाक उन साटी ऊंद हिंग्स तन कोट्या.”
5 दास आऊन से अंदुन, “आ स्थिती दा ना येन माळाईन, याग आ आर्त ई द्याश दा बरोद ईला चाहस्यार रा; येन ना नीन पार उक आ द्याश दा वोयाईन, येल टु नी बंद्या?”
6 ईदुर मा अब्राहम अंदुन, “नी नान पार उक अल यागलु ओयबाळेत.”
7 यहोवा जो स्वर्ग इन परमेश्वर आन, याव नानी नान आप्प उन मान्या टु अदिक नांद जनम स्थान टु तनकु नान से कसम तीनकु अंदुन कि “ना ईद द्याश नीन वंश इक कोळाईन; आवा तान दूत नींद मुंद मुंद कळ्यान, कि नी नान पार उन साटी अल टु ऊंद आर्त तंद्या.
8 अगर पोर नीन सांगुळ बरोर साटी मना माळतार, आग नी नान कसम देल मुक्त आगेद्या, लेकीन ध्यान ईटेत कि नी नान पार उक अल वापस ओयबाळेतीर.”
9 इदुरसाटी आ सेवक तान स्वामी अब्राहम उन जांघ इन ल्यालमा तान कय ईटदुन अदिक ई बारा दा कसम तीनकु अब्राहम से वादा माळदुन.
10 आग आ सेवक तान स्वामी अन झुंड दा टु हत्त ऊँटगोळ हुळदुन अदिक अऊर मा तान स्वामी इन दी टु अलग अलग सामान कटदुन अदिक नाहोर उन गृह नगर उत्तर-पश्चिम मेसोपोतामिया इन दी होगली कुरतुन.
11 नगर इन व्हार्या पोहचुस्कु आव ऊँटगोळी भाय इन हाती कुर्सबुट्टुन; ईद द्यावगा अन समय ईरोद. ईदा समय आर्तेर नीर तुमली व्हार्या बरतोगोर.
12 आग सेवक प्रार्थना माळदुन, “यहोवा, नान स्वामी अब्राहम उन परमेश्वर, नान क्याल्सा अक सफल माळ अदिक नान स्वामी अब्राहम मा दया माळ.
13 नोळ, ना नीर इन सोता अन हाती नीदुरकु आईन; अदिक नगरवासी इन पोरगोळ नीर तुमोर साटी होळतार.
14 इदुरसाटी आगगोळ कि या पोर इन से ना अनाईन, ‘तान माळका नान दी बांग्स, कि ना कुडाईन,’ अदिक आक अनुल, ‘हुडु, कुडुकोम, बाद्दा ना नीन ऊँटगोळी भी कुळसाईन,’ इक आका आगुल यारी नी तान दास इसहाक उन साटी ठहरूस्या; ईदा रीति देल ना जान्स कोमाईन कि नी नान स्वामी मा करूणा माळ्या.”
15 ईदुर पयले कि आऊन प्रार्थना खतम आगाईत, रिबका नगर इन व्हार्या तान खांदा मा माळका हुडुकु नीर तुमोर साटी बंदुर, आक मिल्का अन पार बतूएल उन पोर ईरोर अदिक मिलकाह अब्राहम उन वार्ट नाहोर उन हिंग्स ईरोर.
16 रिबका हापाळ सुंदर ईरोर, कुवारा ईरोर; ईगासताका यातोदु मंळसा अन बाय ईला नोळीदुर, आक ल्यालमा सोता मा होदुर, तान माळका नीर देल तुमदुर अदिक बाक म्याकुच बंदुर.
17 आग आ दास आकिन से भेंट माळोर साटी ओळदुन, अदिक आकिन से अंदुन, “तान माळका दा टु थ्वाळासा नीर नानी कुळ्सकोम.”
18 आक अंदुर, “हे नान प्रभु, हुडु, कुडुकोम,” अदिक आक फुरताई देल माळका ईळ्सकु कय दा हुडुकु आऊक नीर कुळ्स कोंडुर.
19 याग आक आऊक नीर कुळ्स कोंडुर, आग आक अंदुर, “ना नीन ऊँटगोळ साटी नीर तरतीन, यागासताका अव पुरा संतुष्ट आगेगालव.”
20 इदुरसाटी रिबका झट से माळका अन नीर ऊँटगोळ साटी माळ्द धोनी दा पलटुसदुर, आग आक अदिक नीर तरोर साटी भाय दी वोळदुर अदिक आक सप्पा ऊँटगोळी नीर कुळ्सदुर.
21 नौकर आऊक सुंगा मुंगा ध्यान देल नोळदुन. आव तय माळोद चाहासोन कि यहोवा शायद मात मान्स कोंडुन कि ईला.
22 याग ऊँटगोळ नीर कुडु कोंडव आग आ मंळसा आरदा त्वारा व्हान्ना अन ऊंद नतनी तेगुकु आकी कोट्टुन, अदिक हत्त त्वारा व्हान्ना अन बांगळा आकिन कय दा हाकसुसदुन;
23 अदिक केळदुन, “नी यार पोर हुय? ईद नानी हेळ. येन नीन आप्प उन मान्या नाम ईरोर साटी जागा आद?”
24 आक उत्तर कोट्टुर, “ना रा नाहोर उन पैदा माळ्द मिल्का अन पार बतूएल उन पोर हुईन.”
25 बाक आक आऊन से अंदुर, “नाम मान्या काड्डा अदिक चारा हापाळ आद, अदिक थामसोर साटी जागा भी आद.”
26 आग आ मंळसा ताल्ला बांग्सकु यहोवा अक नमस्कार माळकु अंदुन,
27 “धन्य आय नान स्वामी अब्राहम उन परमेश्वर यहोवा, याव तान करूणा अदिक सच्चाई इक नान स्वामी मा टु हटुसीदिल: यहोवा नानी ठीक हादी मा नळ्सकु नान स्वामी इन वार्टुर मान्या पोहचुस बुट्टुन.”
28 आग आ पोर ओळकु तान मोय इक ई घटना अन सप्पा हाल हेळ बुट्टुर.
29 आग लाबान जो रिबका अन वार्ट ईरोन, व्हार्या भाय इन हाती आ मंळसा अन दी ओळदुन.
30 अदिक हिंग आत कि याग आव अद नतनी अदिक तान आकतींग रिबका अन कय दा अव बाळा भी नोळदुन, अदिक आकिन ईद मात भी केळदुन कि आ मंळसा नान से हिंग मातगोळ अंदुन; आग आव आ मंळसा अन हाती होदुन; अदिक येन नोळदुन, कि आव सोता अन हाती ऊँटगोळ हाती नीदुरकु ईरोन.
31 आव अंदुन, “हे यहोवा अन दी टु धन्य मंळसा अंदर बर नी यती व्हार्या नीदुरकु आय? ना मान्ना अक, अदिक ऊँटगोळ साटी भी जागा तैयार माळीन.”
32 दुर आ मंळसा मान्या बुळ्क होदुन; अदिक लाबान ऊँटगोळ काठिगोळी खोल्सकु काड्डा अदिक चारा कोट्टुन; अदिक आऊन अदिक आऊन साथीगोळ काल तोळुली नीर कोट्टुन.
33 आग अब्राहम उन दास उन मुंद जलपान साटी येनारा ईटकु आत; लेकीन आव अंदुन “ना यागासताका तान बातणी अन कोमालीन, आगासताका येनु तीनतीदिल.”
लाबान अंदुन, “अन कोम.”
34 आग सेवक अंदुन, “ना रा अब्राहम उन दास हुईन.
35 यहोवा नान स्वामी इक हापाळ आशीष कोटान; इदुरसाटी आव महान धनवान मंळसा आगेग्यान; अदिक आव आऊक मर्र-म्यांडा, गोसी, व्हान्ना, पैस्या, दास-दासीगीतेर, ऊँट अदिक गधागोळ कोटान.
36 अदिक नान स्वामी इन हिंग्स सारा अक हाळामुंड इन समय दा ऊंद पार पैदा आग्यान; अदिक आ पार उक अब्राहम तान सप्पा येनारा कोट्ट बुटान.
37 नान स्वामी नानी ईद कसम कोटान, कि ‘ना आऊन पार उन साटी कनानीगोळ पोर दा टु यार द्याश दा आव ईर तोगोन, यातारा भी आर्त इक तरबाळेत.
38 ना आऊन आप्प उन मान्या, अदिक परिवार इन लॉकुर हाती होगकु आऊन पार उन साटी ऊंद आर्त तराईन.’
39 आग ना तान स्वामी से अंदीन, ‘अगर आ आर्त नान हिंद बरतीदील.’
40 आग आव नान से अंदुन, ‘यहोवा, यार मुंद ना नळुतेला बंदीन, आव नीन सांगुळ तान दूत कळुकु नीन यात्रा अक सफल माळ्यान; अदिक नी नान परिवार, अदिक नान आप्प उन घराना दा टु नान पार उन साटी ऊंद आर्त तर सक्या.
41 नी आग अच नान कसम देल मुक्त आद्या, याग नी नान परिवार इन लॉकुर हाती पोहचुस्या; अदिक अगर आंदुर नीनी यातोरारा आर्त कोळतीदील, रा नी नान कसम दा टु बिटोद्या.’ ”
42 इदुरसाटी ईंद ना आ भाय इन हाती होगकु अनली कुरतीन, हे नान स्वामी अब्राहम उन परमेश्वर यहोवा अगर नी नान ई यात्रा अक सफल माळत्या;
43 रा नोळ ना नीर इन भाय इन हाती निदुरकु आईन; अदिक हिंग आगुल, कि जो पोर नीर तुमली बंदार, अदिक ना आकिन अनाईन, “तान माळका दा टु नानी थ्वाळासा नीर कुळ्स,”
44 अदिक आक नान से अनुल, “कुडु कोम, अदिक ना नीन ऊँटगोळ कुडोर साटी भी नीर तुमकु कोळाईन,” आक आका आर्त ईरूल यारी नी नान स्वामी इन पार उन साटी ठहरूस्या.
45 ना मन इन मन दा ईद अनीन अच, कि नोळ रिबका ताल्ला मा माळका हुडुकु बंदुर; बाक आक सोता अन हाती ईळकु तुमली कुरतुर. ना आकिन से अंदीन, “नानी नीर कुळ्स.
46 अदिक आक जल्दी से तान माळका अक ताल्ला मा टु ईळ्सकु अंदुर, ‘ईका, कुडुकोम, हिंद ना नीन ऊँटगोळी भी कुळसाईन,’ ई प्रकार ना कुळदीन, अदिक आक ऊँटगोळी भी कुळ्सदुर.
47 आग ना आकिन से केळदिन, नी यार पोर हुय? अदिक आक अंदुर, ना रा नाहोर उन पैदा माळ्द मिल्का अन पार बतूएल उन पोर हुईन,”
“आग ना आकिन मुग्ग दा नतनी, अदिक आकिन कय दा अव बाळा हाकसुसदीन.
48 बाक ना ताल्ला बांग्सकु यहोवा अक नमस्कार माळदीन, अदिक तान स्वामी अब्राहम उन परमेश्वर यहोवा अक धन्य अंदीन, यतिकी आव नानी वळ्लीद हादी देल पोहचुसदुन कि ना तान स्वामी अन पार उन साटी आऊन रीस्तेदार उन पोर इक ओयाईन.
49 ईग हेळ कि नी येन माळ्या? येन नी नान स्वामी मा दया माळ्या अदिक तान पोर आऊक कोट्या? या नी तान पोर इक कोळोर साटी मना माळ्या? नानी हेळ, यदुर देल ना ईद समसाईन कि नानी येन माळोद आद.”
50 आग लाबान अदिक बतूएल उत्तर कोट्टुर, “ईद मात यहोवा अन दी टु आग्याद; इदुरसाटी नाव लॉकुर नीन से न रा भला अन सकतेव अदिक न बुरा.
51 नोळ, रिबका नीन मुंद आर, आकी ओय, अदिक आक यहोवा अन वचन इन अनुसार, नीन स्वामी इन पार उन हिंग्स आगेगुल.”
52 आंदुर्द ईद मात केळकु, अब्राहम उन दास जमीन मा बिदकु यहोवा अक नमस्कार माळदुन.
53 आग आव रिबका अक अव भेंटगोळ कोट्टुन जो आव सांगुळ तंदीदुन, आव रिबका अक व्हान्ना अदिक चांदी ईनव ईसरा कोट्टुन अदिक हापाळ वळ्लेव कपळा कोट्टुन, आव आकिन वार्ट अदिक आकिन मोय इक किमती भेंटगोळ कोट्टुन.
54 दास अदिक आऊन सांगुळ इनोर मंळसा अल थाम्सदुर अदिक तिंदुर कुळदुर, अल आंदुर ईळ्लक तीम ईत्तुर, आंदुर दुसरा दिशी व्हातर्या यद्दुर अदिक अंदुर “ईग नाव तान स्वामी इन हाती होदेव.”
55 रिबका अन मोय अदिक वार्ट अंदुन, “रिबका अक नाम लॉकुर हाती अदिक येनारा दिन ईरगोळी, आकी हत्त दिन ताका नाम हाती अदिक ईरगोळी, अदुर बाद्दा आक होग सकतार.”
56 लेकीन दास आंदुर से अंदुन, “नान से हादी कायसुसबाळी, यहोवा नान यात्रा सफल माळ्यान, ईग नानी तान स्वामी इन हाती होगगोळी.”
57 रिबका अन वार्ट अदिक आकिन मोय अंदुर, “नाव लॉकुर रिबका अक कारदेव अदिक आकिन से केळेव कि आक येन चाहसतार?”
58 आंदुर रिबका अक कारदुर अदिक आकिन से अंदुर, “येन नी ई मंळसा अन सांगुळ ईग होगोद चाहसत्या?”
रिबका अंदुर, “हव, ना होगाईन.”
59 इदुरसाटी आंदुर रिबका अक अब्राहम उन दास अदिक आऊन सांगुळ आऊन मंळसागोळ सांगुळ होग गोट्टुर, रिबका अन दासी भी आंदुर सांगुळ होदुर.
60 अदिक आंदुर रिबका अक आशीर्वाद कोटकु अंदुर,
“हे नामोर आकतींग, नी हजारो लाखगोळ्द आदिमाता आगुल,
अदिक नीन वंश तान दुश्मनगोळ्द नगर इन अधिकारी आगुल.”
61 आग रिबका तान सहेलीगोळ सांगुळ होदुर; अदिक ऊँट मा येरकु आ मंळसा अन हिंद आदुर, ई प्रकार आ दास रिबका अक हुडुकु नळदुन.
62 इसहाक जो दक्षिण द्याश दा ईरतोगोन, लहैरोई हेसुर इन भाय टु आगकु सुनसान प्रदेश दा होटकु बरतोगोन.
63 द्यावगा अन वती आव मैदान दा ध्यान माळोर साटी होटीदुन; अदिक आव कण्ण नेगुकु येन नोळदुन, कि ऊँटगोळ नळुकु बरेत्याव.
64 रिबका भी कण्ण नेगुकु इसहाक उक नोळदुर, अदिक नोळतेला अच ऊँटगोळ मा टु ईळदोदुर.
65 आग आक तान दास से केळदुर, “जो मंळसा मैदान मा नाम दी बरेत्यान, आव याव हुन?”
दास अंदुन, “आव रा नान स्वामी हुन.” आग रिबका सेरग्या हुडुकु तान बाय मा ईटदुर.
66 दास इसहाक से तान सांगुळ आग्द घटना अन वर्णन माळदुन.
67 आग इसहाक रिबका अक तान मोय सारा अन ड्यारा दा तंदुन, अदिक आकिन से मदा माळकु आकिन से प्यार माळदुन. ई प्रकार इसहाक उक मोय इन मृत्यु उन बाद्दा शांती प्राप्त आत.