45
यूसुफ उन खुद इक प्रगट माळोद
1 आग यूसुफ आ सप्पा मुंदुर मुंद, जो आऊन आस पास नीदुरकु ईरोर, तान इक अदिक रोक्स सकीदील; अदिक कारूकु अंदुन, “नान आस पास इन सप्पा लॉकुर इक व्हार्या माळ बुळी.” वार्टुर मुंद खुद इक प्रगट माळा वती यूसुफ उन सांगुळ अदिक याऊ ईला ईरोन.
2 आग आव चिल्ळास चिल्ळासकु वर्लली कुरतुन; अदिक मिस्त्रीगोळ केळदुर, अदिक फिरौन उन मान्यागोळ लॉकुरी ईदुर्द समाचार सीक्त.
3 आग यूसुफ तान वार्टुर से अनली कुरतुन, “ना यूसुफ हुईन, येन नान आप्प ईगासताका जित्ता आन?” ईदुर्द उत्तर आऊन वार्टुर कोळ सकीदील; यतिकी आंदुर आऊन मुंद घबरूसेदुर.
4 बाक यूसुफ तान वार्टुर से अंदुन, “नान हाती बरी.” ईद केळकु आंदुर हाती होदुर. बाक आव अंदुन, “ना नीम वार्ट यूसुफ हुईन, यारी नीव मिस्त्र बरावाळा अक मार बुटीदिर.
5 ईग नीव लॉकुर पचतासबाळी, अदिक नीव जो नानी ईल मार बुट्टीर, ईदुर से उदास आगबाळी; यतिकी परमेश्वर नीम जीव उळसोर साटी नानी नीम मुंद कळु कोंडान.
6 यतिकी ईग येढ्ढ वर्ष टु ई द्याश दा अकाल आद; अदिक ईग अईद वर्ष अदिक हिंगा ईत्तव यतिकी अऊर दा ना ईग नांगर नळदीत अदिक न अनाज कडुकु आदीत.
7 परमेश्वर नानी नीम मुंद इदुरसाटी कळ्यान कि नीव पृथ्वी मा जीत्ता ईरूल, अदिक नीम जीव इन ऊळोर से नीम वंश वाळुसुल.
8 ई रीति देल ईग नान इक ईल कळावाळेर नीव आलच, परमेश्वर अच ठहरूसदुन; अदिक आवा नानी फिरौन उन आप्प घाई, अदिक आऊन सप्पा मान्ना अन स्वामी, अदिक सप्पा मिस्त्र द्याश इन अधिकारी ठहरूस बुटान.
9 ईग जल्दी नान आप्प उन हाती होगकु अनी, ‘नीन पार यूसुफ ई प्रकार अनेत्यान, कि परमेश्वर नानी सप्पा मिस्त्र द्याश इन अधिकारी ठहरूस्यान; इदुरसाटी नी नान हाती बीना समय माळकु होटबर.
10 अदिक नीन निवास गोशेन द्याश दा ईत्तीत, अदिक नी पारगोळ, नातुगोळ, व्हात-मर्रीगोळ, गोस-वस्तागोळ, अदिक तान सप्पा येनारा अन सांगुळ नान हाती ईत्या.
11 अदिक अकाल ईनव अईद वर्ष अदिक ईत्तव, अऊर दा ना अल्या नींद पालन पोषण माळाईन; हिंग आगबाळुल कि नी, अदिक नींद घराना, बल्की यास नीनोर जनावर आव, आंदुर हसु देल सायुल.’
12 अदिक नीव तान कण्ण देल नोळेतीर, अदिक नान वार्ट बिन्यामीन भी तान कण्ण देल नोळेत्यान कि जो नाम से मातगोळ माळेत्यान आव यूसुफ हुन.
13 नीव नान सप्पा वैभव इन, जो मिस्त्र दा आद अदिक जो येनारा नीव नोळदीर, आ सप्पा अन नान आप्प से वर्णन माळेतीर; अदिक तुरन्त नान आप्प उक ईल तरेतीर.”
14 अदिक आव तान वार्ट बिन्यामीन उक याद्दा देल हचकु वर्लदुन; अदिक बिन्यामीन भी आऊन याद्दी इक लपटुसकु वर्लदुन.
15 आव तान सप्पा वार्टगोळी चुम्सकु आंदुर साटी वर्लदुन, अदुर बाद्दा आऊन वार्टुर आऊन सांगुळ मातगोळ हेळली कुरतुर.
16 ई मात इन समाचार कि यूसुफ उन वार्टुर बंदार, फिरौन उन भवन ताका पोहचुसेत, अदिक ईदुर देल फिरौन अदिक आऊन कर्मचारी खुश आदुर.
17 इदुरसाटी फिरौन यूसुफ से अंदुन, “तान वार्टुर से अन कि ऊंद क्याल्सा माळ्यार: आंदरी याट अनाज हततद तान जनावरगोळ मा मंळ्सकु, कनान द्याश इक वापस होगुल.
18 अदिक तान आप्प अदिक तान तान मान्या अन लॉकुरी हुडुकु नान हाती बंदार: अदिक मिस्त्र द्याश दा जो येनारा भी वळ्लीद से वळ्लीद आद अद ना नीमी कोळाईन, अदिक नीमी द्याश इन वळ्लीद से वळ्लीद पदार्थ तीनली सीक्कीत.
19 अदिक नीनी आग्या सिक्याद, ‘नीव ऊंद क्याल्सा माळी कि मिस्त्र द्याश टु तान चिकोरी अदिक आर्तेर साटी गाळागोळ वोई, अदिक तान आप्प उक तरी.
20 अदिक तान सामान इन चिन्ता माळ बाळेतीर; यतिकी सप्पा मिस्त्र द्याश दा जो येनारा वळ्लीद से वळ्लीद आद अद नीम्द हुन.’ ”
21 इस्त्राएल उन पारगोळ हांग अच माळदुर; अदिक यूसुफ फिरौन उन आग्या अनुसार आंदरी गाळागोळ कोट्टुन, अदिक हादी साटी भोजन इन सामान भी कोट्टुन.
22 आंदुर दा टु ऊंद ऊंद मंळसा अक रा ऊंद ऊंद जोळा कपळा भी कोट्टुन; अदिक बिन्यामीन उक मुर सौ रूपया अन बेळ्ली नव सिक्का अदिक अईद जोळा कपळा कोट्टुन.
23 तान आप्प उन हाती आव जो कळुदुन अद ईद हुन, मतलब मिस्त्र अन वळ्लीद वस्तुगोळ देल तुमकु हत्त गधा, अदिक अनाज अदिक रोट्टी अदिक आऊन आप्प उन हादी साटी भोजन वस्तु देल तुमकु हत्त आर्त गधागोळ.
24 आग आव तान वार्टुरी सार माळदुन, अदिक आंदुर नळदुर; अदिक आव आंदुर से अंदुन, “हादी मा येल्यारा झगळा माळबाळेतीर.”
25 मिस्त्र टु नळुकु आंदुर कनान द्याश दा तान आप्प याकूब उन हाती पोहचुसदुर.
26 अदिक आऊन से ईद वर्णन माळदुर, “यूसुफ ईगासताका जीत्ता आन, अदिक सप्पा मिस्त्र द्याश मा प्रभुता आवा माळतान.” लेकीन आव आंदुर मा विश्वास माळीदिल, अदिक आव तान तान दा ईला ईरोन.
27 आग आंदुर तान आप्प याकूब से यूसुफ उन सप्पा मातगोळ, जो आव आंदुर से अंदीदुन, अंदुर; याग आव आ गाळागोळ इक नोळदुन, जो यूसुफ आऊक तरोर साटी कळीदुन, आग आऊन चित्त थामसेत.
28 अदिक इस्त्राएल अंदुन, “बस, नान पार यूसुफ ईगासताका जीत्ता आन; ना तान मृत्यु से पयले होगकु आऊक नोळाईन.”