5
आदम उन वंशावली
1 आदम उन वंशावली ई प्रकार देल आद. याग परमेश्वर मंळसा अन्द रचना माळदुन आग आव तांद अच स्वरूप इन घाई आऊक माळदुन.
2 आव आंदरी गंळ्स अदिक आर्त माळकु मंळसागोळ्द रचना माळदुन अदिक आंदरी आशीर्वाद कोट्टुन, अदिक रचना अन दिशी आंदुर हेसुर आदम ईटदुन.
3 याग आदम ऊंद सौ तीस वर्ष इन ईरोन, आग आऊन समानता दा, आऊन स्वरूप इन अनुसार, आऊन ऊंद पार पैदा आदुन. आव आऊन हेसुर शेत ईटदुन.
4 शेत उन जनम इन बाद्दा आदम येट्ट सौ वर्ष मात्त जीत्ता ईत्तुन, बाक आऊक भी मात्त पार पोरगोळ पैदा आदुर.
5 ई प्रकार देल आदम उन पुरा ऊमर ऊम्बत सौ तीस वर्ष इन आत; आग आव सोतोदुन.
6 याग शेत ऊंद सौ अईद वर्ष नव आदुन, आग आऊन से एनोश पैदा आदुन.
7 एनोश उन जनम इन बाद्दा शेत येट्ट सौ येळ वर्ष जीत्ता ईत्तुन, अदिक आऊक भी पार पोरगोळ पैदा आदुर.
8 ई प्रकार देल शेत उन पुरा ऊमर ऊम्बत सौ हन्नेळ वर्ष इन आत; अदुर बाद्दा आव सोतोदुन.
9 याग एनोश नब्बे वर्ष इनव आदुन, आग आऊन से केनान उन जनम आत.
10 केनान उन जनम इन बाद्दा एनोश येट्ट सौ पंदरा वर्ष जीत्ता ईत्तुन, आऊक भी मात्त पार पोरगोळ पैदा आदुर.
11 ई प्रकार देल एनोश उन पुरा ऊमर ऊम्बत सौ अईद वर्ष इन आत; अदुर बाद्दा आव सोतोदुन.
12 याग केनान सत्तर वर्ष ईनव आदुन, आग आऊन से महललेल उन जनम आत.
13 महललेल उन जनम इन बाद्दा केनान येट्ट सौ चालीस वर्ष जीत्ता ईत्तुन, आऊक पार पोरगोळ मात्त पैदा आदुर.
14 ई प्रकार देल केनान उन पुरा उमर ऊम्बत सौ हत्त वर्ष इन आत; अदुर बाद्दा आव सोतोदुन.
15 याग महललेल पैसट वर्ष इनव आदुन, आग आऊन से येरेद उन जनम आत.
16 येरेद उन जनम इन बाद्दा महललेल येट्ट सौ तीस वर्ष जीत्ता ईत्तुन, आऊक मात्त भी पार पोरगोळ पैदा आदुर.
17 ई प्रकार देल महललेल उन ऊमर येट्ट सौ पंच्यानव वर्ष इन आत; अदुर बाद्दा आव सोतोदुन.
18 याग येरेद ऊंद सौ बासठ वर्ष इन आदुन, आग आऊन से हनोक उन जनम आत.
19 हनोक उन जनम इन बाद्दा येरेद येट्ट सौ वर्ष जीत्ता ईत्तुन, आऊक मात्त पार पोरगोळ पैदा आदुर.
20 ई प्रकार देल येरेद उन पुरा ऊमर ऊम्बत सौ बासठ वर्ष इन आत; अदुर बाद्दा आव सोतोदुन.
21 याग हनोक पैसठ वर्ष इन आदुन, आग आऊन से मतूशेलह उन जनम आत.
22 मतूशेलह उन जनम इन बाद्दा हनोक मुर सौ वर्ष ताका परमेश्वर उन सांगुळ सांगुळ नळुतेला ईत्तुन, आऊक मात्त पार पोरगोळ पैदा आदुर.
23 ई प्रकार देल हनोक उन पुरा ऊमर मुर सौ पैसठ वर्ष इन आत.
24 हनोक परमेश्वर उन सांगुळ सांगुळ नळुतोगोन; बाक आव गायब आगेदुन, यतिकी परमेश्वर आऊक म्याकुच नेगु कोंडीदुन.
25 याग मतूशेलह ऊंद सौ सत्यासी वर्ष इन आदुन, आग आऊन से लेमेक उन जनम आत.
26 लेमेक उन जनम इन बाद्दा मतूशेलह येळ सौ बयासी वर्ष जीत्ता ईत्तुन, आऊक मात्त पार पोरगोळ पैदा आदुर.
27 ई प्रकार देल मतूशेलह उन पुरा ऊमर ऊम्बत सौ उनसत्तर वर्ष इन आत; अदुर बाद्दा आव सोतोदुन.
28 याग लेमेक ऊंद सौ बयासी वर्ष इन आदुन, आग आऊन से ऊंद पार उन जनम आत.
29 आव ईद अनकु आऊन हेसुर नूह ईटदुन, “यहोवा जो पृथ्वी इक श्राप कोटान, अदुर बारा दा ईव पार नाम क्याल्सा दा, अदिक आ कठिन मेहनत दा जो नाव माळतेव, नामी शांती कोट्टान.”
30 नूह उन जनम इन बाद्दा लेमेक अईद सौ पंच्यानव वर्ष जीत्ता ईत्तुन, आऊक मात्त पार पोरगोळ पैदा आदुर.
31 ई प्रकार देल लेमेक उन पुरा ऊमर येळ सौ सत्यातर वर्ष इन आत; अदुर बाद्दा आव सोतोदुन.
32 अदिक नूह अईद सौ वर्ष इन आदुन; अदिक नूह टु शेम, अदिक हाम, अदिक येपेत उन जनम आत.