थिस्सलुनीकियों के नाम पौलुस प्रेरित की पहली पत्री
थिस्सलुनीकिगोळ हेसुर पौलुस प्रेरित उन पयला चिट्ठी
परिचय
थिस्सलुनीकिगोळ्द पयला चिट्ठी पौलुस १:१ लिखसीदुन पयले पवित्रशास्त्र अन भाग बन्सत अदिक मसीह अन जनम इन ५१ साल इन बाद्दा लिख्सकु आगीत, याग पौलुस चिट्ठी लिख्सदुन आग आव कुरिन्थि नगर दा ईरोन थिस्सलुनीकिगोळ्द मंडली यारी आव चिट्ठी लिख्सदुन दुसरा मिशनरी यात्रा अन न्याड्या दा स्थापित माळकु आगीत प्रेरितगोळ १७:१-१० प्रेरितगोळ क्याल्सागोळ्द किताबगोळ दा हिंग हेळकु आग्याद कि ईद मंडली यहूदीगोळ्द अदिक ग्रीकगोळ्द बन्सकु ईरोद.
ई मंडली इन स्थापना माळदुर बाद्दा पौलुस थिस्सलुनीकियों दा यक्कुल दिन ताका रूक्सीदिल. इदुरसाटी आव ई चिट्ठी इक प्रोत्साहन कोळोर साटी लिख्सदुन, ई चिट्ठी दा हापाळ विषयगोळ्द चर्चा माळकु आग्याद, जसा कि मसीहगोळ ह्यांग ईरली पायजे. पौलुस मसीह अन दुसरा आगमन इन ताका लिख्सतान सायद इदुरसाटी कि थिस्सलुनीकिगोळ्द मंडलीगोळ दा ईरावाळेर विश्वासीगोळी केळ्सदुर दा हापाळ उत्साह ईरोद, पौलुस ई बारा दा चिट्ठी इन द्वारा यीशु उन दुसरा आगमन इक लिख्सकु हिंग जीवन व्यतीत माळली प्रोत्साहित माळतान यदुर देल परमेश्वर संतुष्ट आन ५:६-८
रूप-रेखा:
१. मंडली इक नमस्कार अदिक परमेश्वर उन धन्यवाद १
२. पौलुस तान कार्य अन बारा दा अदिक तीमुथियुस जो समाचार इन साटी ईरोन आऊन बारा दा चर्चा माळदुन २–३
३. यीशु उन दुसरा आगमन इन तयारी माळोर साटी मसीह दा ह्यांग जीवन व्यतीत माळ पायजे ४:१–५:१५
४. पौलुस उन मंडली इक नमस्कार अदिक सप्पा मुंदुर आऊन चिट्ठी वाचुस पायजे ईदुर बारा दा सुचना ५:१६-२८
1
1 पौलुस अदिक सिलवानुस अदिक तीमुथियुस उन दी टु थिस्सलुनीकेगोळ मंडली नव हेसुर जो परमेश्वर आप्प अदिक प्रभु यीशु मसीह अन लॉकुर आर अनुग्रह अदिक शांती नीमी सिकतेला ईरूल.
थिस्सलुनीकिगोळ्द जीवन अदिक विश्वास
2 नाव तान प्रार्थनागोळ दा नीमी हमेशा याद माळतेव अदिक हमेशा नीम सप्पा अन बारा दा परमेश्वर उन धन्यवाद माळतेव.
3 अदिक तान परमेश्वर अदिक आप्प उन मुंद नीमव विश्वास इन क्याल्सा अदिक प्यार इन मेहनत अदिक नाम प्रभु यीशु मसीह दा धीरज देल हुळकु आशा अक लगातार याद माळतेव.
4 नामोर वार्टुरा अदिक आकतींगेरा, नाव जान्सतेव कि परमेश्वर नीम से प्यार माळतान आव नीमी नीवळुस्यान.
5 यतिकी नाव नीम हात्ती नाम्द खुशखबरी सिर्फ शब्दगोळ देल अच ईला लेकीन सामर्थ्य देल, अदिक पवित्र आत्मा अन्द पुरा सच्चाई इन निश्चिता देल तंदान; ह्यांग नीव जान्सतीर कि नाव नीम सांगुळ ईरेव, रा नाव ह्यांग ईत्तेव ईद नीम भलाई इन साटी ईरोद.
6 नीव धोळ्द क्लेशगोळ बावजुद. पवित्र आत्मा देल सिक्द खुशी इन सांगुळ, वचन इक ग्रहण माळदुर अदिक नाम्द अदिक प्रभु उन अनुकरण माळली हतदुर.
7 इदुरसाटी हिंग माळदुर देल मकिदुनिया अदिक अखाया द्याश इन सप्पा विश्वासीगोळ साटी नीव आदर्श बन्सेदिर.
8 यतिकी नीम हात्ती टु प्रभु उन वचन सिर्फ मकिदुनिया अदिक अखाया दा अच केळ्सकु आत हिंग अच ईला, लेकीन नीम विश्वास इन जो परमेश्वर मा आद, हर जागा दा अदुर चर्चा फैलुसेत कि ईदुर बारा दा नामी येनु अनोद जरवत अच हैलेच.
9 यतिकी आ लॉकुर नाम बारा दा हेळतार कि नीम्द हात्ती नाम्द स्वागत ह्यांग आत; अदिक नीव ह्यांग मूर्तीगोळ देल परमेश्वर उन दी तिर्गदिर ताकी जित्ता अदिक खरा परमेश्वर उन स्यावा माळी,
10 अदिक आऊन पार उन स्वर्ग मा टु बरोद हादी कायतेला ईरी यारी आव सोत्तुर दा टु जित्ता माळ्यान, अर्थात यीशु उन, जो नामी परमेश्वर उन बरोद आद प्रकोप देल उळस्तान.