थिस्सलुनीकियों के नाम पौलुस प्रेरित की दूसरी पत्री
थिस्सलुनीकिगोळ हेसुर पौलुस प्रेरित उन दुसरा चिट्ठी
परिचय
ईद थिस्सलुनीकिगोळ्द लिख्सद पौलुस उन दुसरा चिट्ठी १:१ पयला चिट्ठी लिख्सदुर बाद्दा ईद चिट्ठी लगभग मसीह अन्द जनम इन ५१ साल इन बाद्दा लिख्सदुन. याग आव ईद चिट्ठी लिख्सदुन आग आव कुरिन्थि नगर दा ईरोन ईद चिट्ठी जो थिस्सलुनीकिगोळ्द मंडली इक लिख्सकु आगीत, ईद पौलुस तान दुसरा मिशनरी यात्रा अन न्याड्या दा स्थापित माळदुन प्रेरितगोळ १७:१-१० ईद मंडली यहूदी अदिक गैरयहूदीगोळ्द बन्सकु ईरोद.
ई मंडली इन लॉकुर आखरी समय इन बारा दा अदिक प्रभु अन दुसरा आगमन ईद बारा दा इन बारा दा जानसोर साटी हापाळ उत्सुक ईरोर, इदुरसाटी पौलुस तांद येढ्ढु चिट्ठी दा ई मातगोळ्द जिकर माळतोगोन. ईद दुसरा थिस्सलुनीकिगोळ्द चिट्ठी हुन आर्धा से यक्कुल हिस्सा आखरी समय इन बारा दा आद जो आलसी आर आंदुर बारा दा भी जिकर माळतान. अदिक ईद अनतान कि हर ऊंद मंळसा तान जीवन निर्वाह माळोर साटी क्याल्सा माळुल ३:६-१०
रूप-रेखा
१. पौलुस खुद इन अदिक तान संगीगोळ्द परिचय कोळतान १:१-२
२. पौलुस परमेश्वर उन थिस्सलुनीकिगोळ्द मंडली इक धन्यवाद माळतान, अदिक आंदुर साटी प्रार्थना माळतान१:३-१२
३. आखरी समय इन बारा दा चर्चा २
४. आलस इन विरोध दा अदिक मयनत इन जरवत इन बारा दा पौलुस उन शिक्षा ३:१-१५
५. पौलुस उन मंडली इक दुबारा नमस्कार ३:१६-१८
1
1 पौलुस अदिक सिलवानुस अदिक तीमुथियुस इन सांगुळ नाम आप्प परमेश्वर अदिक प्रभु यीशु मसीह अन लॉकुरी चिट्ठी लिख्सतीन, थिस्सलुनीकेगोळ मंडली दा आद:
2 नाम आप्प परमेश्वर अदिक प्रभु यीशु मसीह अन दी टु नीमी अनुग्रह अदिक शांती सिकतेला ईरूल.
न्याय इन दिन
3 हे वार्टुरा अदिक आकतींगेरा, नीम बारा दा नामी हर समय परमेश्वर उन धन्यवाद माळ पायजे, अदिक ईद उचित भी आद, इदुरसाटी कि नीम विश्वास हापाळ वाळुसीग्याद, अदिक नीम सप्पा मुंदुर्द प्यार आपस दा हापाळ अच वाळुसतेला होगेत्याद.
4 ईल ताका कि नाव खुद परमेश्वर उन मंडली दा नीम बारा दा घमण्ड माळतेव कि यास उपद्रव अदिक क्लेश नीव सहन माळतीर, आ सब दा नीम धीरज अदिक विश्वास प्रगट आगतद.
5 ईद परमेश्वर उन खरा न्याय इन स्पष्ट प्रमाण हुन कि नीव परमेश्वर उन राज्य अन योग्य ठहरूसी, यदुर साटी नीव दुख भी नेगुतीर.
6 यतिकी परमेश्वर उन हात्ती ईद न्याय आद कि जो नीमी क्लेश कोळतार, आंदरी बदला दा क्लेश कोळुल
7 अदिक नीमी, जो क्लेश पाऊसतीर, नाम सांगुळ चैन कोळुल; आ समय याग कि प्रभु यीशु तान सामर्थी स्वर्गदूतगोळ सांगुळ, धधकुसतेला बेक्की दा स्वर्ग टु प्रगट आदान,
8 अदिक जो परमेश्वर उक अरालुर अदिक नाम प्रभु यीशु उन खुशखबरी इक मानसालुर आंदुर से बदला ताकोंडान.
9 आंदुर प्रभु उन मुंदु टु अदिक आऊन ताकत इन तेज देल दुर आगकु अनन्त विनाश इन दण्ड ताकोंडार.
10 ईद आ दिशी आदीत, याग आव तान पवित्र लॉकुर दा महिमा ताकोमोर अदिक सब विश्वास माळावाळेर दा आश्चर्य अन कारण आगोर साटी बंदान; ईंदुर दा नीव भी सहभागी आईर यतिकी नीव नाम गवाही मा विश्वास माळदीर.
11 इदुरसाटी नाव हमेशा नीम साटी प्रार्थना भी माळतेव कि नाम परमेश्वर नीमी आ जीवन इन योग्य समसुल, अदिक भलाई इन हर ऊंद इच्छा अदिक विश्वास इन हर ऊंद क्याल्सा अक सामर्थ्य सहित पुरा माळुल,
12 ताकी नाम परमेश्वर अदिक प्रभु यीशु मसीह इन अनुग्रह अन अनुसार नाम प्रभु यीशु उन हेसुर इक महिमा सिकुल, अदिक नीमी भी.