इब्रानियो के नाम पत्री
इब्रानिगोळ हेसुर चिट्ठी
परिचय
यीशु हाळोद नियम इन हापाळ सा भविष्यवाणीगोळी पुरा ह्यांग माळतान ईदा तोरसावाळा “इब्रानियो अन्द चिट्ठी” ईद ऊंद धिरज कोळावाळा किताब हुन. ऊंद उपदेश देल इदुर रचना माळकु आग्याद. सप्पा भविष्यवाणी अदिक स्याणा याजकगोळ्द जिम्मेदारीगोळी यीशु ह्यांग पुरा माळदुन ईद सरलता देल तोरसावाळा ६० से यक्कुल हाळोद नियम इन संदर्भ ई किताब दा आव. ईदा कारण देल ई किताब इक यहूदी मसीह लॉकुर साटी दिलासा कोळावाळा मान्सकु आग्याद. इदुर मुंद याजकगोळी यग्य माळोद जरवत हैलेच ईद व्यवस्था यीशु ह्यांग पुरा माळदुन ईद ई किताब दा स्पष्ट माळकु आग्याद. सप्पा पापगोळ साटी ऊंदा घन अदिक हमेशा हमेशा अन्द यग्य हिंग यीशु आदुन. ई किताब देल नामी हिंग समझ दा बरतद कि, यीशु मसीह, नामी परमेश्वर मा विश्वास माळोर साटी तयार माळतान. १२:२ ईदा रीति देल ई युग इन नाव मसीह विश्वासीगोळ साटी ई किताब दा धोळ्द दिलासा आद. नामी अदुर मा निर्भर ईर पायजे.
इब्रानियो अन्द चिट्ठी याव लिख्सदुन ईद नामी मालूम हैलेच तरी भी थ्वाळासा विधवान लॉकुर मान्ना आद कि, ईद प्रेरित पौलुस, लूका या बरनबास ई परमेश्वर उन सेवकगोळ लिखसीदार. हांगा ईद किताब याग लिख्सकु आग्याद ईद भी नामी मालूम हैलेच. तरी भी हापाळ सा विधवान लॉकुर हिंग मान्सतार कि, ईद मसीह अन्द जनम इन बाद्दा ७० वर्ष इन पयले लिख्सकु आगीदाद. इदुर कारण हिंग कि, याग यरूशलेम नगर ७० इन साल दा नाश माळकु आत तरी भी ई किताब दा यरूशलेम इन वर्णन ईत्ता प्रकार देल माळकु आग्याद, जसा कि अद नाश माळकु अच ईला आगीत. ईद किताब हापाळ सा मंडलीगोळ दा होगकु वाचुसकु आगीदाद. अद रोम नगर दा लिख्सकु आगीत. १३:२४
रूप रेखा
१. लिखसावाळा हिंग तोर्सतान कि, यीशु ईव परमेश्वर उन सप्पा भविष्यवक्ता अदिक स्वर्गदूत इंदुर से भी महान आन १:१–४:१३
२. इदुर बाद्दा आव ईद तोर्सतान कि, जो याजकगोळ यरूशलेम इन मंदिर दा स्यावा माळतार आंदुर से भी यीशु महान आन ४:१४–७:२८
३. मूसा अक कोटकु आगीद आ आग्यागोळ द्वारा जो हाळोद व्यवस्था परमेश्वर तान लॉकुर से माळदुन अदुर से भी यीशु उन स्यावा महान आद ८:१–१०:३१
४. यीशु हर मात दा श्रेष्ट आन ईद स्पष्ट माळदुर बाद्दा लेखक हापाळ सा दिनचर्या अन्द व्यवहारगोळ बारा दा सुचना कोळतान १०:३२–१३:१७
५. आखरी दा थ्वाळासा बोध अदिक शुभेच्छा कोटकु लेखक ई चिट्ठी इक खतम माळतान १३:१८-२५
1
परमेश्वर उन वचन, पार उन द्वारा
1 पयला अन्द युग दा परमेश्वर आप्प दादागोळ से थ्वाळा-थ्वाळा माळकु अदिक अलग-अलग देल भविष्यवक्तागोळ द्वारा मातगोळ हेळदुन,
2 ई आखरी दिनगोळ दा आव नाम से पार उन द्वारा मातगोळी हेळदुन, यारी आव सप्पा वस्तुगोळ्द वारीस ठहरूसदुन अदिक आऊंदा द्वारा परमेश्वर सप्पा दुनिया अन्द रचना माळ्यान.
3 आव परमेश्वर उन महिमा अन्द ऊजुळ अदिक आऊन स्वरूप इन छाप हुन, अदिक सप्पा वस्तुगोळी तान सामर्थ्य अन्द वचन देल संभाळ्सतान. आव मंळसा जाती इन पापगोळी माफ माळकु स्वर्ग दा होगकु महामहिम परमेश्वर उन ऊमा कय दी होगकु कुरतुन;
परमेश्वर-पार उन महानता
4 ई प्रकार पार स्वर्गदूतगोळ से महान माळकु आदुन, अदा प्रकार ह्यांग परमेश्वर आऊक स्वर्गदूतगोळ से वळ्लीद हेसुर कोट्टुन.
5 यतिकी परमेश्वर यातोदु भी स्वर्गदूतगोळ से हिंग अंदिदील, “नी नान पार हुय, ईंद ना नीन आप्प बनसीन.” अदिक ना यातोदु स्वर्गदूत से परमेश्वर ईद अंदुन, “ना नीन आप्प बनसाईन, अदिक नी नान पार बनस्या.”
6 अदिक याग परमेश्वर तान पयला पैदा आग्द पार उक दुनिया दा कळुतान, रा आव अनतान, “परमेश्वर उन सप्पा स्वर्गदूत आऊंद उपासना माळुल.”
7 लेकीन स्वर्गदूतगोळ्द बारा दा परमेश्वर ईद अनतान, “आव तान दूतगोळी पवन, अदिक तान सेवकगोळी भळकुस्द बेक्की माळतान.”
8 लेकीन परमेश्वर पार उन बारा दा अनतान, “हे परमेश्वर, नीन सिंहासन हमेशा हमेशा ईत्तीत: अदिक नीन शासन नीन लॉकुर मा न्याय इन सांगुळ आगतद.
9 नी सच्चाई से प्यार अदिक अन्याय से दुश्मनी ईट्द; ईद कारण परमेश्वर, नीन परमेश्वर, आनन्द इन याण्णा देल अभिषेक माळदुर द्वारा नीन संगीगोळ से वाळुसकु निवळुसदुन.”
10 वचन ईद भी अनतद, “हे प्रभु, सुरूवात दा नी पृथ्वी इन पायवा हाक्द, अदिक स्वर्ग नीन कय इंद कारीगरी हुन.
11 अव रा नाश आगेदव, लेकीन नी हांगा ईत्या; अदिक अव सप्पा फळक्यागोळ घाई कंदुसेदाव,
12 अदिक नी अवरी चादर इन घाई गुंडस्या, अदिक अव फळक्यागोळ घाई बदलुसेदव: पर नी हांग अच बन्सकु ईत्या अदिक नीन जीवन इन अन्त आगतीदील.”
13 अदिक स्वर्गदूतगोळ दा टु परमेश्वर यार से याग अंदुन, “नी नान ऊम्मा कय दी कुर, यागासताका कि ना नीन दुश्मनगोळी नीन कालगोळ्द ल्यालमा अन्द पांळ्सी माळ कोमालीन?”
14 येन स्वर्गदूत अव आल्लच, जो आत्मागोळ परमेश्वर उन स्यावा अदिक आऊन द्वारा उद्धार ताकोमावाळेर इक मदत माळोर साटी कळुकु आग्याव.