योना
योना
परिचय
योना अन किताब भविष्यवक्ता योना अन नीनवे शहर दा उद्देश इन बारा दा आद. दुसरा भविष्यवाणीगोळ्द किताबगोळ तुलना दा, ईद किताब परमेश्वर उन बातणी इन तुलना दा भविष्यवक्ता अदिक आऊन क्याल्सागोळ मा यक्कुल ध्यान केंद्रित माळतद. योना अन सेवकाई लगभग अदा समय आत याग यारोबाम द्वितीय इस्त्राएल इन राजा ईरोन, लगभग 800-750 ईसा पूर्व, लेकीन विधवानगोळी ईद पता हैलेच कि किताब खुद याग लिख्सकु आगीत.
परमेश्वर योना अक नीनवे अन खिलाप प्रचार माळोर साटी कळुदुन, लेकीन योना आग्या मान्सीदिल अदिक नीनवे टु विपरीत दिशा दी होटोदुन. 1:1-3 आव ऊंद जहाज मा सवार आदुन जो तर्शीश शहर होगोद. याग जहाज तर्शीश दी होगोद, रा परमेश्वर ऊंद धोळ्द तुफान कळुदुन जहाज नळसावाळेर हापाळ अंजेदुर, अदिक आंदुर परमेश्वर उन सिट्ट इक शांत माळोर साटी योना अक समुद्र दा भिट बुट्टुर. बाक परमेश्वर योना अक नुंगोर साटी ऊंद धोळ्द मेन कळुदुन. योना पश्चाताप माळदुन अदिक परमेश्वर आऊक जीत्ता ईर गोट्टुन. आखरी दा, योना अदुर खिलाप प्रचार माळोर साटी नीनवे होदुन, अदिक शहर इन लॉकुर पश्चाताप माळदुर. योना अन किताब ई मात मा जोर कोळतद कि परमेश्वर याट दयालु आन, लेकीन योना ईला चाहासोन कि परमेश्वर दयालु ईरूल. 4:2
रूपरेखा
1. हेळकु आग्याद कि योना याता प्रकार परमेश्वर से दूर ओळेदुन अदिक मेन इन व्हाट्टा दा समुसेदुन. 1
2. योना द्वारा मेन इन व्हाट्या ईरतेला परमेश्वर से माळ्द प्रार्थना अन वर्णन आद. 2
3. योना नीनवे दा प्रचार माळतान अदिक शहर इन लॉकुर पश्चाताप माळतार. परमेश्वर आंदरी ऊळसोद फैसला माळतान. 3
4. योना ई मात देल सिट्ट दा आन कि परमेश्वर नीनवे अन लॉकुर मा दया तोर्सदुन, अदिक परमेश्वर योना से अनतान कि आव सप्पा लॉकुर से प्यार माळतान. 4
1
योना अन परमेश्वर उन आग्या ईला मानसोद
1 परमेश्वर उन वचन अमितै अन पार योना अक सिक्त:
2 “तैयार आग, अदिक महानगर नीनवे अक होग. आऊन खिलाप बातणी केळ्स; यतिकी आऊन नागरिकगोळ दुष्कर्मगोळ्द मातकात नान ताका पोहचुस्याद.”
3 योना येद्दुन. आव प्रभु उन मुंद टु ओळदुन. आव समुद्र अन आप्पाटी तर्शीश नगर होगली याफा बन्दरगाह होदुन. अल आऊक ऊंद जहाज सिक्त जो तर्शीश नगर इक होगोद. इदुरसाटी आव जहाज इन भाळा कोट्टुन, अदिक अदुर मा येरेदुन. आव ड्वांगा नळसावाळेर सांगुळ तर्शीश नगर होगोद चाहासोन ताकी आव यहोवा अन नजर टु दुर आगेगुल.
4 लेकीन प्रभु समुद्र मा ऊंद धोळ्द हवा धुंधाळ कळुदुन. आग समुद्र मा भयंकर तुफान येळ्त अदिक जहाज इन मुरोद अंज्क पैदा आगेत.
5 जहाज नळसावाळेर अंजेदुर, अदिक तान-तान द्यावगोळ्द दुहाई कोळली कुरतुर. आंदुर जहाज इन भार कम माळोर साटी जहाज इन माल समुद्र दा भिट्ट बुट्टुर. लेकीन योना जहाज इन बुळकोद भाग दा होगकु अल्या मिंगेदुन, अदिक आव भर जप दा ईरोन.
6 जहाज इन मुखिया आऊन हात्ती बंदकु कारदुन, “ये मिंगावाळा, ईद येन? येळ, तान द्याव उक कारू, कदाचित परमेश्वर नाम दी ध्यान कोळुल अदिक नाव ऊळदोदेव.”
7 जहाज नळसावाळेर आपस दा अंदुर, “बरी, नाव चिट्टीगोळ हाकाता, अदिक ईद पता हचाता कि ईद विपत्ती याता मंळसा अन्द कारण नाम मा बिदाद. इदुरसाटी आंदुर चिट्टीगोळ हाकदुर, अदिक चिट्टी योना अन्द हेसुर मा होळ्त.
8 आंदुर योना से केळदुर, ‘नामी हेळी, ईद विपत्ति नाम मा येती बत्त?’ नी येन क्याल्सा धंदा माळत्या? नी येल टु बंद्या? नी याता द्याश इन ईरावाळा हुय? नी याता समुदाय इनव हुय?”
9 आग योना आंदरी ईद हेळदुन, “ना इब्री हुईन; ना समुद्र अदिक जमीन इक माळावाळा स्वर्गीक प्रभु परमेश्वर उन आराधक हुईन.”
10 ईद केळकु जहाज नळसावाळेर हापाळ अंजेदुर. आंदुर योना से अंदुर, “ईद नी येन माळ्द?”
योना प्रभु उन मुंद टु ओळेत्यान, ईद मात आंदुर जानसोर; यतिकी खुद योना आंदरी हेळीदुन.
11 आंदुर योना से केळदुर, “समुद्र शांत आगेगुल, इदुर साटी नाव नीन सांगुळ येन माळेव?” आ समय समुद्र अन लयरगोळ हापाळ उफान होडोव.
12 योना आंदुर से अंदुन, “नानी नेगुकु समुद्र दा भिटबुळी, आग समुद्र शांत आगेदीत; यतिकी ना जान्सतीन, ईद भयंकर तुफान नान कारण नीम मा बंदाद.”
13 ड्वांगा नळसावाळेर जहाज इक किनारा मा तरोद पुरा कोशिश माळदुर, लेकीन आंदुर अदरी किनारा मा ओय सकिदील. समुद्र अन्द लयरगोळ आंदुर खिलाप भयंकर आगतेला होत्त.
14 आखरी दा जहाज नळसावाळेर प्रभु से प्रार्थना माळदुर, “हे यहोवा, नाव नीन से विनती माळतेव. ई मंळसा अन्द जीव इन बदला दा नामी नष्ट माळबाळ, निर्दोष मंळसा अन्द हत्या अन्द दोष नाम मा हचबाळ; यतिकी हे यहोवा, नी तान इच्छा अनुसार ईद क्याल्सा माळ्या.”
15 आग आंदुर योना अक येब्सदुर अदिक समुद्र दा आऊक भिट्ट बुट्टुर. अदिक समुद्र अन्द भयंकर लयरगोळ शांत आगेदव.
16 ईद नोळकु आंदुर यहोवा अन हापाळ अच अंज्क मान्सदुर, अदिक आऊक बलि येर्सदुर अदिक मन्नतगोळ मान्सदुर.
17 यहोवा ऊंद धोळधुसा मेन ठहरूसीदुन. कि योना अक नुंग बुळुल; अदिक योना आ मेन इन व्हाट्टा दा मुर दिन अदिक मुर ईळ्लक बिदकु ईत्तुन.