याकूब की पत्री
याकूब उन चिट्ठी
परिचय
याकूब उन साटी परिचय याकूब उन किताब याकूब हेसुर इनव यातारा मंळसा द्वारा लिख्सकु आगीत. ईव संभव यीशु उन वार्ट याकूब ईरोन, जो सुरूवाती मंडली दा ऊंद अधिकारी ईरोन अदिक यरूशलेम नगर इन हिस्सा ईरोन प्रेरितगोळ १५:१३ प्रेरित पौलुस आऊक गलातिगोळ २:९ दा मंडली इन खंबा भी अंदुन. विधवानगोळ मानसोद भी आद कि याकूब उन किताब मसीह अन जनम इन ५० साल इन बाद्दा लिख्सकु आगीत. यतिकी याकूब यरूशलेम दा मंडली इन अधिकारी ईरोन, इदुरसाटी आव अल ईरतेला शायद किताब लिखसीदुन.
याकूब तान किताब इक “राज्यगोळ न्याड्या बिखरूस्द व्हार्या जनजातीगोळ” इक संबोधित माळदुन १:१ याकूब दा सप्पा च्या सप्पा मसीहगोळ मा लागु आगताव लेकीन “व्हार्या जनजाती” शब्दगोळ उपयोग ईद संभव आगतद कि याकूब सीधा यहूदी मसीहगोळी लिखसोन. यतिकी ईद किताब पाठकगोळ ऊंद व्यापक समुह ताका पोहचुसोर साटी माळीदुन. ईद हापाळ विषयगोळी संबोधित माळ्त. याकूब विश्वास अदिक कार्यगोळ न्याड्या संबंधगोळ मा ध्यान केंद्रित माळतान. खरा आराम कारवाई दा तोर्सकु आदीत २:१७. आव धनवान लॉकुरी २:१-४ पक्षपात तोरसोर खिलाप भी चेतावनी कोळतान अदिक नामी हेळतान कि नाव येन अनतेव ३:१-१२
रूप-रेखा
१. याकूब तान पाठकगोळी धन्यवाद कोळतान. १:१
२. ईदुर बाद्दा आव मसीहगोळी सहन माळोर साटी प्रोत्साहित माळतान याग आंदुर बिमार आगतार. १:२-२७
३. बाक आव अनतान कि विश्वासगोळ माध्यम देल विश्वास इन साटी ह्यांग जरूरी आद. २:१-२६
४. अदुर बाद्दा आव अनतान कि यास शक्तिशाली शब्द आग सकताव. ३:१-१२
५. आग याकूब हेळतान कि ह्यांग परमेश्वर उन ग्यान दुनिया अन ग्यान से अलग आद. ३:१३–४:१०
६. ईदुर बाद्दा आव तान पाठकगोळी घमण्डी आगा खिलाप चेतावनी कोळतान. ४:११–५:६
७. याकूब थ्वाळासा साधारण निर्देश कोटकु तान किताब खतम माळतान. ५:७-२०
1
1 परमेश्वर उन अदिक प्रभु यीशु मसीह नव दास याकूब उन दी टु आ हन्नेळ गोत्रगोळी जो तितर-बितर आगकु ईरतार नमस्कार पोहचुसुल.
विश्वास अदिक बुद्धिमानी
2 हे नान वार्टुरा अदिक आकतींगेरा, याग नीव अलग प्रकार इन परीक्षागोळ दा बिळी, रा इदरी पुरा खुशी इन मात समसी,
3 ईद जान्सकु कि नीम विश्वास इन परख आगदुर देल धीरज पैदा आगतद.
4 लेकीन धीरज इक तान सप्पा क्याल्सा माळगोळी कि नीव पुरा अदिक सिद्ध आगेगी, अदिक नीम दा यातोदु मात इन कमी ईरबाळुल.
5 लेकीन नीम दा टु यारीकारा दिमाक इन कमी ईरूल रा परमेश्वर से बेळुल, जो सप्पा मुंदुरी बिना दोष हचकु अनुग्रहपुर्वक कोळतान, अदिक आऊक कोटकु आदीत.
6 लेकीन विश्वास देल बेळुल, अदिक येनु सक माळबाळुल, यतिकी सक माळावाळा समुद्र अन्द लयर इन घाई आन जो हवा देल वाहुसतद अदिक हारतद.
7 हिंग मंळसा ईद सम्सबाळुल कि नानी प्रभु उन हाती टु येनारा सिक्कीत,
8 आ मंळसा येढ्ढ चित्तवाळा हुन अदिक तान सप्पा मातगोळ दा संची हैलेच.
गरीबी अदिक अमीरी
9 गरीब वार्टुरा याग परमेश्वर नीमी धोळ्द पद कोळतान रा खुशी माळी,
10 अदिक अमीर तान नीच दशा मा; यतिकी आव काड्डा अन्द फूल इन घाई ओळेदान.
11 यतिकी सुर्य अन होळतेला अच हापाळ बिसुल बिळतद अदिक काड्डा अक वंळ्गास बुळतद, अदिक अदुर्द फूल झळसेगतद अदिक अदुर शोभा नाश आगेगतद. ईदा प्रकार अमीर भी तान हादी मा नळुत-नळुत नाश आगेदान.
परख अदिक लालच
12 धन्य आन आ मंळसा जो परीक्षा दा स्थिर ईरतान, यतिकी आव सही होटकु जीवन इंद अद मुकुट हासिल माळ्यान यदुर्द वादा प्रभु तान प्यार माळावाळेर से माळ्यान.
13 याग यारदारा परीक्षा आगुल, रा आव ईद अनबाळुल कि नान परीक्षा परमेश्वर उन दी टु आगतद; यतिकी ना रा बेकार मातगोळ से परमेश्वर उन परीक्षा आग सकतद, अदिक ना आव यारदारा परीक्षा खुद माळतान.
14 लेकीन हर ऊंद मंळसा तांद अच बेकार अभिलाषागोळ देल जेडुकु अदिक फसुसकु परीक्षा दा बिळतान.
15 बाक बेकार अभिलाषा व्हाट्टा दी ईतकु खुद इन निर्माण माळतद अदिक पाप याग पुरा रीति देल वाळुसेगतद रा मृत्यु उक तयार माळतद.
16 हे नान प्रिय वार्टुरा अदिक आकतींगेरा, ध्वाका तिनबाळी.
17 यतिकी हर ऊंद वळ्लीद दान अदिक हर ऊंद परिपुर्ण उपहार स्वर्ग टु अच आद, अदिक अद आ परमेश्वर उन द्वारा ज्योति याव स्वर्गीय प्रकाश इक माळ्यान ल्यालमा तनकु आगताव, आव हमेशा बदलुस्त सावली घाई बदलुसालुन.
18 आव तांद अच इच्छा देल नामी सच्चाई अन्द वचन इन द्वारा तयार माळदुन, कि नाव आऊन दुनिया दा जो वस्तुगोळ आव अऊर दा टु ऊंद प्रकार इन पयला काय आदेव.
केळोद अदिक माळोद
19 हे नान प्रिय वार्टुरा अदिक आकतींगेरा, ईद मात नीव जान्स कोमी: हर ऊंद मंळसा केळोर साटी तत्पर अदिक माताळदुर दा धीर अदिक सिट्ट दा धीरा ईरूल,
20 यतिकी मंळसा अन्द सिट्ट परमेश्वर उन न्यायी उद्देश इक प्राप्त माळ सकाल्द.
21 इदुरसाटी सप्पा मईलपन अदिक दुश्मनी भाव इन बळती इक दुर माळकु, आ वचन इक नम्रता देल ग्रहण माळकोमी जो मन दा बोऊस्कु आत अदिक जो नीम उद्धार माळ सकतद.
22 सिर्फ केळावाळेर अच ईला जो तान तान इक ध्वाका कोळतार, लेकीन वचन मा नळावाळेर बन्सी.
23 यतिकी जो यावारा वचन इन केळावाळा ईरूल अदिक अदुर मा नळावाळा ईला आगुल, रा आव आ मंळसा अन्द घाई आन जो तान स्वाभाविक मार्रा आरसा दा नोळतान.
24 आव तान तान इक नोळकु होटोगतान अदिक तुरन्त मारतोगतान कि ना ह्यांग ईरीन.
25 लेकीन जो मंळसा स्वतंत्रता अन्द सिद्ध व्यवस्था मा ध्यान माळतान, आऊक परमेश्वर आऊन क्याल्सा दा इदुरसाटी आशीष कोट्टान कि केळकु मारालुन लेकीन हांग अच क्याल्सा माळतान.
26 येन नीम दा टु यावारा तान तान इक न्यायी सम्सतान? अगर नीव तान ल्यालग्या अक वश दा माळ सकालीर रा नीव तान तान इक ध्वाका कोळतीर अदिक नीम न्यायीपन बेकार आद.
27 नाम परमेश्वर अदिक आप्प उन हात्ती शुद्ध अदिक निर्मल भक्ति ईद आद कि अनाथगोळ अदिक रांड्यागोळ्द क्लेश दा आऊन सुधी ताकोमुल, अदिक तान तान इक दुनिया से निष्कलंक ईटुल.