4
यीशु अदिक सामरी आर्त
1 फरीसीगोळ केळ्यार कि यीशु बपतिस्मा माळावाळा यूहन्ना से यक्कुल चेलागोळी बपतिस्मा कोळतान.
2 यीशु खुद यागलु ईला उलटा आऊन चेलागोळ बपतिस्मा कोळतोगोर.
3 याग यीशु अक पता नळुत कि फरीसीगोळ हिंग मातगोळी माळतार रा आव यहूदिया बिटकु गलील इक ओळेदुन,
4 अदिक आऊक सामरीया टु आगकु होगोद जरूरी ईरोद.
5 इदुरसाटी आव सूखार हेसुर इन सामरीया अन्द ऊंद नगर ताका बंदुन, जो आ भूमी इन हात्ती आद यदरी याकूब तान पार यूसुफ उक कोटीदुन;
6 अदिक याकूब उन भाय भी अल्या ईरोद. इदुरसाटी यात्रा टु थक्स माळकु यीशु भाय इन हात्ती हिंग अच कुरतोदुन. आ समय लगभग हागुल इनव हन्नेळ मुरदिदव.
7 इटुर दा ऊंद सामरी जाती नोर आर्त नीर तुमली बंदुर. यीशु आकिन से अंदुन, “नानी नीर कुळ्स.”
8 यतिकी आऊन चेलागोळ रा नगर दा भोजन कोम्मोर साटी होगीदुर.
9 आ सामरी जात इन आर्त आऊन से अंदुर, “नी यहूदी ईतकु ना सामरी जाती नोर आर्त इन से नीर येती बेळत्या?” यतिकी यहूदी सामरी जात इन लॉकुर सांगुळ यातोदु प्रकार इन व्यवहार ईटालुर.
10 यीशु उत्तर कोट्टुन, “अगर नी परमेश्वर उन वरदान इक जानसाईद, अदिक ईद भी जानसाईद कि आव याव हुन जो नीन से अनतान, ‘नानी नीर कुळ्स,’ रा नी आऊन से बेळाईद, अदिक आव नीनी जीवन इन नीर कोळायदुन.”
11 आर्त आऊन से अंदुर, “हे प्रभु, नीन हात्ती नीर तुमली रा बाल्टी भी हैलेच, अदिक भाय खोल आद; रा बाक अद जीवन इन नीर नीन हात्ती यल टु बत्त?
12 येन नी नाम आप्प याकूब से धोड्डेव आय, याव नामी ईद भाय कोट्टुन; अदिक खुद अच तान औलाद, अदिक तान जनावरगोळ सांगुळ इदुर दा टु नीर कुळदुन?”
13 यीशु आक इक उत्तर कोट्टुन, “जो यावारा ईद नीर कुळदान आव मात्त प्यासा ईत्तान,
14 लेकीन जो यावारा आ नीर इक कुळदान जो ना आऊक कोळाईन, आव बाक अनन्त काल ताका प्यासा आगतीदील; लेकीन जो नीर ना आऊक कोळाईन, अद आऊन दा ऊंद झरना बनसेदित जो अनन्त जीवन इन साटी उमळुसतेला ईत्तीत.”
15 आर्त आऊन से अंदुर, “हे प्रभु, अद नीर नानी कोळ ताकी ना प्यासा आगबाळुल अदिक ना नीर तुमली ईट दुर बराईन.”
16 यीशु आकिन से अंदुन, “होग, तान गांड्ड उक ईल कारूकु तर.”
17 आर्त उत्तर कोट्टुर, “ना बिना गांड्ड उन आईन.” यीशु आकिन से अंदुन, “नी ठीक अनत्या, ‘ना बिना गांड्ड उन आईन.’
18 यतिकी नी अईद गांडुरी माळ कोंड्या, अदिक यार हात्ती नी ईग आय आव भी नीन गांड्ड आल्लच. ईद नी सही अच अनत्या.”
19 आर्त आऊन से अंदुर, “हे प्रभु, नानी हततद कि नी भविष्यवक्ता हुय.
20 नाम आप्प दादागोळ ईदा पहाळी मा आराधना माळदुर, अदिक नीव अनतीर कि अद जागा यल आराधना माळ पायजे यरूशलेम दा आद.”
21 यीशु आकिन से अंदुन, “हे आर्त, नान मात इन विश्वास माळ कि अद समय बरतद कि नीव ना रा ईद पहाळी मा आप्प उन आराधना माळीर, ना यरूशलेम दा.
22 नीव यारी जान्सालीर, आऊन आराधना माळतीर; अदिक नाव यारी जान्सतेव आऊन आराधना माळतेव; यतिकी उद्धार यहूदीगोळ दा टु आद.
23 लेकीन अद समय बरतद, लेकीन ईग भी आद, यारदा खरा भक्त आप्प उन आराधना आत्मा अदिक सच्चाई देल माळेव, यतिकी आप्प तान साटी हिंग अच आराधकगोळी ढुंढ्सतान.
24 परमेश्वर आत्मा आन, अदिक जरूरी आद कि आऊन आराधना माळावाळेर आत्मा अदिक सच्चाई देल आराधना माळुल.”
25 आर्त आऊन से अंदुर, “ना जान्सतीन कि मसीह जो ख्रिस्त कहलुस्तान, बरावाळा आन; याग आव बंदान, रा नामी सप्पा मातगोळी हेळ बुट्टान.”
26 यीशु आकिन से अंदुन, “ना जो नीन से अनेतीन, आवा हुईन.”
27 इटुर दा यीशु उन चेलागोळ होट्ट बंदुर, अदिक अचम्भा माळली कुरतुर कि आव आर्त से मातगोळी हेळेत्यान; तरी याऊ केळीदील, “नी येन चाहासत्या?” या “यदुर साटी आकिन से मातगोळी हेळत्या?”
28 आग आर्त तान घागरी बिटकु नगर दा वोळेदुर, अदिक लॉकुर से अनली कुरतुर,
29 “बरी, ऊंद मंळसा अक नोळी, याव सप्पा येनारा जो ना माळीन नानी हेळ बुटुन. येनारा ईवा रा मसीह आल्लच?”
30 इदुरसाटी लॉकुर नगर टु होटकु आऊन हात्ती बरली कुरतुर.
31 ईदुर बीच दा आऊन चेलागोळ यीशु से ईद विनती माळदुर, “हे गुरु, येनारा तिन कोम.”
32 लेकीन आव आंदुर से अंदुन, “नान हात्ती तिनोर साटी हिंग भोजन आद यदरी नीव जान्सालीर.”
33 आग चेलागोळ आपस दा अंदुर, “येन यावारा आऊन साटी येनारा तिनली तंदान?”
34 यीशु आंदुर से अंदुन, “नान भोजन ईद आद कि तान कळावाळा अन्द इच्छा अन अनुसार नळाईन अदिक आऊन क्याल्सा पुरा माळाईन.
35 येन नीव अनालीर, ‘कटनी आगदुर दा ईग भी नाक तिंगुळ बाकी आव?’ नोळी, ना नीम से अनतीन, तान कण्णगोळी नेगुकु केयगोळ मा नजर हाक्की कि अव कटाई इन साटी फसल पकसेग्याद.
36 फसल कडावाळा अक मजदूरी सिकतद अदिक अनन्त जीवन इन साटी काय जमा माळतान, ताकी हचावाळा अदिक कडावाळा येढ्ढु मुंदुर मिलुसकु आनन्द माळुल.
37 यतिकी ईल ईद कहावत सही कुरतद: ‘फसल हचावाळा दुसरा आन अदिक कडावाळा दुसरा.’
38 ना नीमी अद केई कडोर साटी कळुदीन यदुर्दा नीव मेहनत माळीदील: दुसरागोळ मेहनत माळदुर अदिक नीव आंदुर्द मेहनत इन फल दा हिस्सेदार आदीर.”
39 आ नगर इन हापाळ सा सामरी लॉकुर आ आर्त इन अंदुर देल यीशु मा विश्वास माळदुर; यतिकी आक ईद गवाही कोटीदुर: आव सप्पा येनारा जो ना माळदीन, नानी हेळ बुटुन.
40 इदुरसाटी याग ई सामरी लॉकुर आऊन हात्ती बंदुर, रा आऊन से विनती माळली कुरतुर कि नाम ईल ईर. इदुरसाटी आव अल येढ्ढ दिन ताका ईत्तुन.
41 आऊन वचन इन कारण अदिक भी हापाळ सा लॉकुर विश्वास माळदुर
42 अदिक आ आर्त से अंदुर, “ईग नाव नीन अंदुर देल अच विश्वास माळालेव; यतिकी नाव खुद अच केळ कोंडेव, अदिक जान्सतेव कि ईवा सही दा दुनिया अन उद्धारकर्ता हुन.”
यीशु अधिकारी अन पार उक चंगा माळदुन
43 बाक आ येढ्ढ दिनगोळ बाद्दा यीशु अल टु होटकु गलील इक होदुन,
44 यतिकी यीशु खुद अच गवाही कोट्टुन कि भविष्यवक्ता अन्द तान द्याश दा आदर आगाल्द.
45 याग आव गलील दा बंदुन, रा गलीली लॉकुर खुशी देल आऊन सांगुळ मिलुसदुर; यतिकी यास क्याल्सा आव यरूशलेम दा हाब्ब इन समय माळीदुन, आंदुर आ सप्पा अक नोळीदुर, यतिकी आंदुर भी हाब्ब दा होगीदुर.
46 आग यीशु बाक गलील इन काना नगर दा बंदुन, यल आव नीर इक अंगुर इन रास्सा माळीदुन. अल राजा अन ऊंद कर्मचारी ईरोन यार पार कफरनहूम नगर दा बिमार ईरोन.
47 आव ईद केळकु कि यीशु यहूदिया टु गलील दा होट बंदान, आऊन हात्ती होदुन अदिक आऊन से ईद विनती माळली कुरतुन कि नळुकु नान पार उक चंगा माळुल: यतिकी आव सोत्तुर मा ईरोन.
48 यीशु आऊन से अंदुन, “यागासताका नीव चमत्कार अदिक अदभुत क्याल्सा नोळालीर आगासताका यागलु विश्वास माळतीदील.”
49 राजा अन कर्मचारी आऊन से अंदुन, “हे प्रभु, नान पार उन सायोर से पयले नळ.”
50 यीशु आऊन से अंदुन, “होग, नीन पार जित्ता आन.” आ मंळसा यीशु उन अंद मात इन भरोसा माळदुन अदिक ओळेदुन.
51 आव हादी मा का ईरोन कि आऊन दास आऊन से बंदकु सिकदुर अदिक अनली कुरतुर, “नीन पार जित्ता आन.”
52 आव आंदुर से केळदुन, “याता घळी आव वळ्लेव आगली कुरतुन?” आंदुर आऊन से अंदुर, “नाळ सातवा तास दा आऊन मय ईळदव.”
53 आग आप्प जान्स कोंडुन कि ईद अदा घळी आत याता घळी यीशु आऊन से अंदुन, “नीन पार जित्ता आन,” अदिक आव अदिक आऊन सप्पा परिवार विश्वास माळदुर.
54 ईद दुसरा आश्चर्यकर्म ईरोद जो यीशु यहूदिया टु गलील दा बंदकु तोर्सदुन.