यहोशू
यहोशू
परिचय
यहोशू अन किताब इस्त्राएल इन राष्ट्र अक मुंद वाळुस्तद, येल व्यवस्थाविवरण खतम आगतद. इस्त्राएल इन लॉकुर यरदन गांगा अन पूर्वी किनारा टु सुरू आगतार. यहोशू अन किताब हेळतद कि ह्यांग आंदुर यरदन गांगा अक पार माळदुर अदिक मूसा अन उत्तराधिकारी, यहोशू अन नेतृत्व दा कनान द्याश इ भूमि मा विजय प्राप्त माळदुर. आंदुर हिंग ईदुरसाटी माळदुर यतिकी परमेश्वर आंदरी आग्या कोटीदुन. इदुर दा परमेश्वर अब्राहम उन वंशजगोळी कनान इन भूमि कोळोद तान वादा पुरा माळोन. उत्पत्ति 12:7
ईद मालुम हैलेच कि यहोशू उन किताब याव लिखस्यान या संकलित माळ्यान. हापाळ घन लेखक हिंग अनतान ह्यांग कि आव आ घटनागोळ न्याड्या ईरोन जो आगव. उदाहरण इन साटी यहोशू 5:1-6 ई कारण देल हापाळ सा ग्यानी लॉकुर मान्सतार कि यहोशू अन किताब इन हापाळ सा भाग आव खुद लिखस्यान. बल्की ईद स्पष्ट आद कि यहोशू अन अलावा यावारा दुसरा भी येनारा भाग लिखस्यान, जसा कि यहोशू अन अंतिम संस्कार इन विवरण. यहोशू 24:29 हापाळ सा ग्यानी लॉकुर मान्सतार कि किताब घटनागोळ्द लगभग 800 वर्षगोळ बाद्दा लिख्सकु आग्याद. यहोशू अन किताब इन घटनागोळ 1250 ई. स. पूर्व अन आसपास घटित आगीदव, जो मिस्त्र दा रामेसेस उन शासन इन 40 वर्ष इन बाद इन मात आगीदाद. मान्सकु आगतद कि रामेसेस आव राजा ईरोन याव मिस्त्र टु इस्त्राएल इन पलायन इन समय शासन माळीदुन. निर्गमन 1:11
रूपरेखा:
1. इस्त्राएलीगोळ यरदन गांगा अक ह्यांग पार माळदुर अदिक कनान द्याश इन भूमि मा प्रवेश माळदुर. 1; 5:12
2. इस्त्राएल इन द्वारा कनान द्याश मा विजय प्राप्त माळोद बारा दा हेळकु आग्याद. 5:13; 12
3. इदुर बाद्दा हेळकु आग्याद कि कनान द्याश इन भूमि इक इस्त्राएल इन गोत्रगोळ दा ह्यांग वाट्सकु आग्याद. 13–21
4. आखरी दा हेळकु आग्याद कि ह्यांग येनारा गोत्रगोळ यरदन गांगा अन पूर्वी किनारा मा वापस बंदुर, यहोशू अन बिदाई अदिक अंतिम संस्कार, अदिक ह्यांग परमेश्वर उन सांगुळ इस्त्राएल इन वाचा अन नवीनीकरण आत. 22–24
1
परमेश्वर उन यहोशू उक कनान द्याश जीतसोद आग्या कोळोद
1 परमेश्वर उन सेवक मूसा अन्द सोत्तुर बाद्दा, परमेश्वर यहोशू से जो नून उन पार ईरोन अंदुन,
2 “नान सेवक मूसा सोतोदुन. ईग ई लॉकुर अदिक नीव यरदन गांगा अन्द आप्पाटी होगी. नीमी आ द्याश दा होग पायजे यारी ना इस्त्राएल इन लॉकुर इक मतलब नीमी कोळेतीन.
3 ना मूसा अक ईद वचन कोटीदिन की ईद द्याश ना नीमी कोळाईन. इदुरसाटी ना नीमी अद हर ऊंद प्रदेश कोळाईन, जो यातोदारा जागा मा भी नीव होदीर.
4 दक्षिण दा आळी टु उत्तर दा लबानोन इन पहाळी ताका, पूर्व दा फरात महानदी अदिक हित्ती जाती अन सप्पा लॉकुर द्याश टु पश्चिम दा महासमुद्र ताका ठहरूसीत.
5 ना मूसा अन्द सांगुळ ईरीन अदिक ना हांग अच नीम्द सांगुळ ईराईन. नीम्द पुरा जीवन दा, नीमी यावारा भी मंळसा रोकसोर दा समर्थ आगतीदील. ना नीमी बिळालीन. ना यागलु नीम से दुर आगालीन.”
6 “यहोशू, नीमी शक्तिशाली अदिक साहसी आग पायजे! नीमी ई लॉकुर अगुवा आग पायजे अदुर देल आंदुर तान द्याश वापस ताकोम सकुल. ईद अदा द्याश हुन अदरी ना आंदरी कोळोर साटी आंदुर पूर्वजगोळ इक वचन कोटीदिन.
7 लेकीन नीमी ऊंद दुसरा मात इन बारा दा भी मजबुत अदिक साहसी ईरोद बिद्दीत. नीमी आ आदेशगोळ्द पालन निश्चय इन सांगुळ माळ पायजे, यारी नान सेवक मूसा नीमी कोट्टान. अगर नीव आऊन शिक्षागोळ्द ठीक-ठीक पालन माळीर, रा नीव जो येनारा माळीर अदुर्दा सफल आदीर.
8 आ व्यवस्था अन्द किताब दा लिखस्द मातगोळ इक सदा याद ईटी. नीव आ किताब इन अध्ययन ईळ्लक हागुल माळी, आगल्या नीव अदुर्दा लिखस्द आदेशगोळ्द पालन इन बारा दा विश्वस्त ईर सकतीर. अगर ईद नीव माळीर, रा नीव बुध्दिमान बनसीर अदिक जो येनारा माळीर अदुर्दा सफल आदीर.
9 याद ईटी, कि ना नीमी शक्तिशाली अदिक साहसी बन्सकु ईरोद आदेश कोटीदिन. इदुरसाटी यागलु भयभीत आग बाळेतीर, यतिकी नीम्द परमेश्वर यहोवा नीम्द सांगुळ सप्पा जागा दा ईत्तान, एल नीव होदीर.”
यहोशू उन लॉकुर इक आदेश कोळोद
10 आग यहोशू प्रजा अन मुख्य लॉकुरी ईद आग्या कोट्टुन,
11 “ड्यारा टु आगकु होगी अदिक लॉकुर इक तयार आगली अनी. लॉकुर से अनी, ‘थ्वाळासा भोजन तयार माळ कोमुल. ईग टु मुर दिन बाद, नाव लॉकुर यरदन गांगा पार माळेव. नाव लॉकुर होदेव अदिक आ द्याश इक ताकोंडेव यारी नीम्द परमेश्वर यहोवा नीमी कोळेत्यान.’ ”
12 आग यहोशू रूबेनिगोळ, गादीगोळ, अदिक मनश्शेगोळ्द आर्धा वंश इन लॉकुर से अंदुन,
13 “अदरी याद ईटी, जो परमेश्वर उन सेवक मूसा नीमी अंदीदुन. आव अंदीदुन कि परमेश्वर, नीम्द यहोवा अक अदिक नीमी आराम इन साटी जागा कोट्टान. परमेश्वर ईद द्याश नीमी कोट्टान.
14 नीम हिंग्सुर, बाल- बच्यागोळ, अदिक जनावरगोळ रा ई द्याश दा ईत्तव जो मूसा नीमी यरदन इन ईपाटी का कोटान, लेकीन नीव जो योध्दा शस्त्र नेगुकु तान वार्टुर्द मुंद मुंद आपाटी ईळुकु नळदीर, अदिक आंदुर्द मदत माळी.
15 अदिक याग परमेश्वर आंदरी हींग आराम कोट्टान ह्यांग आव नीमी कोट्ट बुटान, अदिक आंदुर भी नीम परमेश्वर यहोवा अन कोळ्द द्याश इन अधिकारी आगेदार; आग नीव तान अधिकार इन द्याश दा, जो परमेश्वर उन दास मूसा यरदन इन ईपाटी पूर्व अन दी नीमी कोटान, वापस बंदकु ईदुर अधिकारी आदार.”
16 आग लॉकुर यहोशू उक उत्तर कोट्टुर, “जो भी माळोर साटी नीव आदेश कोट्टीर, नाव लॉकुर माळेव! या जागा मा कळेतीर,नाव लॉकुर होदेव!
17 नाव लॉकुर पुरा तरीका देल मूसा अन्द आग्या मान्सदेव. अदा तरीका देल नाव लॉकुर अव सप्पा मानसेव जो नीव अंदीर. नाव लॉकुर यहोवा से केवल ऊंद मात चाहसतेव. नाव लॉकुर परमेश्वर यहोवा से ईदा मांग माळतेव कि आव नीम सांगुळ हांग अच ईरूल जसा आव मूसा अन्द सांगुळ ईरोन.
18 आग, अगर यावारा मंळसा नीम्द आग्या मानसोर से इंकार माळतान या यावारा मंळसा नीम्द विरूद्ध निदुरतान, आव कोंदकु आदान. केवल शक्तिशाली अदिक साहसी ईरी!”