11
राजा याबीन अदिक आऊन संगीगोळ्द यहोशू उन द्वारा हार
1 ईद केळकु हासोर इन राजा याबीन मादोन नगर इन राजा योबाब, अदिक शिम्रोन नगर अदिक अक्षाप नगर इन राजागोळी,
2 अदिक जो जो राजा उत्तर इन दी पहाळी द्याश दा, अदिक किन्नेरेत इन दक्षिण इन अराबा दा, अदिक ल्यालमा अन द्याश दा, अदिक पश्चिम इन दी दोर नगर इन ऊँचा द्याश दा ईरतोगोर, आंदरी
3 अदिक पूर्व पश्चिम येढ्ढु दीकळोर ईरावाळेर कनानीगोळ, अदिक एमोरियों, हित्तीगोळी, परिज्जीगोळी, अदिक पहाळी यबूसीगोळी, अदिक मिस्पा द्याश दा हेर्मोन पहाळी इन ल्यालमा ईरावाळेर हिब्बीगोळी बातणी कळुदुर.
4 अदिक आंदुर तान तान सेना अन सांगुळ, जो समुद्र अन किनारा धुळागोळ घाई हापाळ ईरोद, मीलुस्कु व्हार्या बंदुर, अदिक आंदुर सांगुळ हापाळ सा घ्वाळा अदिक रथ भी ईरव.
5 आग आंदुर सप्पा राजा सम माळकु जमा आदुर, अदिक इस्त्राएलगोळ सांगुळ लळाई माळोर साटी मेरोम हेसुर इन क्यार्रा अन हाती बंदकु ऊंद सांगुळ छावनी हाकदुर.
6 आग यहोवा यहोशू से अंदुन, “आंदुर से अंजबाळ, यतिकी नाळ ना ईदा समय ना आ सप्पा मुंदरी इस्त्राएलगोळ वश दा माळकु कोनसुस बुळाईन; आग नी आंदुर घ्वाळा अन ट्वांगरा अन नश कळसुस बुळेत, अदिक आंदुर रथ होत्ताकु भस्म माळ बुळेत.”
7 अदिक यहोशू सप्पा योध्दा अन सांगुळ मेरोम हेसुर इन क्यार्रा अन हाती पोहचुस्कु अचानक आंदुर मा आक्रमण माळदुर.
8 अदिक यहोवा आंदरी इस्त्राएलगोळ कय दा माळ कोंडुर, इदुरसाटी आंदुर आंदरी कोंदुर, अदिक धोळ्द नगर सीदोन अदिक मिस्त्रपोतमैम ताका, अदिक पूर्व अन दी मिस्पे अन मैदान ताका आंदुर पीछा माळदुन; अदिक आंदरी कोंदुन, अदिक आंदुर दा टु यारीकु जीत्ता बिटीदील.
9 आग यहोशू यहोवा अन आग्या अन अनुसार आंदुर से माळदुन, मतलब आंदुर घ्वाळा अन ट्वांगरा अन नश कळसुस दुन, अदिक आंदुर रथ बेक्की दा होत्ताकु भस्म माळ बुट्टुर.
10 आ समय यहोशू वयाळकु हासोर नगर इक जो पयले आ सप्पा राज्यगोळ्द मुख्य नगर ईरोद ताकोम कोंडुन, अदिक अलेव राजा अक तलवार देल कोंद बुट्टुन.
11 अदिक यास प्राणी अल ईरव आ सप्पा अक आंदुर तलवार देल कोंदकु सत्यानाश माळदुर; अदिक यातोदु प्राणी इक जीत्ता बिटीदील, अदिक हासोर इक यहोशू बेक्की हचकु होताक बुट्टुन.
12 अदिक आ सप्पा नगरगोळी अलेर सप्पा राजागोळ सांगुळ यहोशू ताकोम कोंडुन, अदिक यहोवा अन दास मूसा अन आग्या अन अनुसार आंदरी तलवार देल घात माळकु सत्यानाश माळदुन
13 लेकीन हासोर उक बिटकु, यारी यहोशू होताक्स बुट्टुन, इस्त्राएल अदिक यातोदारा नगर इक जो तान पहाळी मा बसुस्कु ईरोद होताकिदील.
14 अदिक ई नगर इन जनावर अदिक ईंदुर सप्पा लूट इक इस्त्राएलगोळ तांद माळ बुट्टुर; लेकीन मंळसागोळी आंदुर तलवार देल कोंद बुट्टुर, ईल ताका कि आंदुर्द सत्यानाश माळ बुट्टुर, कि ऊंद भी प्राणी इक जीत्ता बिटकु आगीदील.
15 जो आग्या यहोवा तान दास मूसा अक कोटीदुन अदुर्दा अनुसार मूसा यहोशू उक आग्या कोटीदुन अदिक हांगा यहोशू भी माळदुन , जो जो आग्या यहोवा मूसा अक कोटीदुन अऊर दा टु यहोशू अदुर दा यातोदु भी पुरा माळ्द बीना बिटीदील.
यहोशू अन द्वारा जिक्सदव द्याश
16 आग यहोशू आ सप्पा द्याश इक, मतलब पहाळी द्याश, अदिक सप्पा नेगेब द्याश, अदिक गोशेन द्याश, अदिक ल्यालमागोळोव द्याश, अराबा, अदिक इस्त्राएल इन पहाळी द्याश, अदिक अऊर्द ल्यालमागोळोव द्याश इक,
17 हालाक हेसुर इन पहाळी टु हुडु , जो सेईर इन ऊचाई मा आद, बालगाद नगर ताका, जो लबानोन इन मैदान दा हेर्मोन पर्वत इन ल्यालमा आद, याट द्याशगोळ आव आ सप्पा द्याशगोळी जीक्स कोंडुर अदिक आ द्याश इन सप्पा राजागोळी हुडुकु कोंद बुट्टुर.
18 आ सप्पा राजागोळ से युद्ध माळतेला यहोशू उक हापाळ दिन हतदव.
19 गिबोन इन निवासी हिब्बीगोळी बिटकु अदिक यातारा भी लॉकुर इस्त्राएलगोळ से मेल मिलाप माळीदिल; अदिक सप्पा नगरगोळी आंदुर लळाई माळकु जीक्स कोंडुर.
20 यतिकी यहोवा अन जो मनसा ईरोद, कि तान आ आग्या अन अनुसार जो आव मूसा अक कोटीदुन आंदुर मा येनु दया माळ बाळुल, बल्की सत्यानाश माळ बुळुल, ई कारण आव आंदुर मन हिंग कठोर माळ बुट्टुर, कि आंदुर इस्त्राएलगोळ्द सामना माळकु आंदुर से युद्ध माळदुर.
21 आ समय यहोशू पहाळी द्याश दा, बंदकु हेब्रोन, दबीर, अनाब, बल्की यहूदा अदिक इस्त्राएल सप्पा पहाळी द्याश दा ईरावाळेर अनाकीगोळ्द नाश माळदुर; यहोशू नगरगोळ सांगुळ आंदुर सत्यानाश माळ कोंडुन.
22 इस्त्राएल इन द्याश दा यावारा अनाकी ईतीदील; केवल गाजा, गत, अदिक अश्दोद नगर दा यारारा यारारा ईतोदुर.
23 ह्यांग यहोवा मूसा से अंदीदुन, हांग अच यहोशू अद सप्पा द्याश ताकोम कोंडुन; अदिक आऊक इस्त्राएल इन गोत्र अदिक कुलगोळ अनुसार वाट्सकु आंदरी कोट्ट बुट्टुन. अदिक द्याश इक लळाई देल शांती सिक्त.