14
यरदन इन पश्चिमी भाग इन बटवाळा
1 जो-जो भाग इस्त्राएलगोळ कनान द्याश दा नोळदुर, आंदरी एलीआजर याजक, अदिक नून उन पार यहोशू, अदिक इस्त्राएली गोत्रगोळ पुर्वज इन घराना अन मुख्य मुख्य मंळसागोळ आंदरी कोट्टुर आंदुर ईंदुर उर.
2 जो आग्या यहोवा मूसा अन द्वारा साळे ऊंम्बत गोत्रगोळ साटी कोटीदुन, अदुर अनुसार आंदुर हिस्सा चिट्टी हाक्कु कोटकु आदव.
3 मूसा रा येढ्ढवार गोत्रगोळ हिस्सा यरदन इन आप्पाटी कोटीदुन; लेकीन लेवीगोळी आव आंदरी येनु भाग कोटीदील.
4 यूसुफ उन वंश इन रा येढ्ढ गोत्र आगीदव, मतलब मनश्शे अदिक एप्रैम; अदिक आ द्याश दा लेवीगोळी येनु भाग कोटकु आगीदील, सिर्फ ईरव नगर, अदिक जनावर अदिक धन ईटोरसाटी चराईगोळ आंदरी सिकदव.
5 जो आग्या यहोवा मूसा अक कोटीदुन अदुर अनुसार इस्त्राएलगोळ माळदुर; अदिक आंदुर द्याश इक वाट्स बुट्टुर.
हेब्रोन नगर कालेब उक कोटकु आगोद
6 आग यहूदा यहोशू उन हाती गिलगाल दा बंदुन; अदिक कनजी यपुन्ने उन पार कालेब आऊन से अंदुन, “नी जान्सतीद्या कि यहोवा कादेशबर्ने दा परमेश्वर उन जन मूसा से नान अदिक नीन बारा दा येन अंदीदुन.
7 याग यहोवा अन दास मूसा नानी ई द्याश इन भेद ताकोमोर साटी कादेशबर्ने टु कळीदुन आग ना चालीस वर्ष इनव ईरीन; अदिक सच्चा मन देल आऊन हाती बातणी तंदीन.
8 अदिक नान साथी जो नान सांगुळ बंदीदुर आंदुर रा प्रजा अन लॉकुर्द मन निराश माळ बुट्टुर, लेकीन ना तान परमेश्वर यहोवा अन पुरा रीति देल मात मान्सदीन.
9 आग आ दिशी मूसा किर्या तीनकु पुरा रीति देल ‘नान परमेश्वर उन मातगोळ्द अनुकरण माळ्यान, ईद कारण नि:सन्देह याता जमीन मा नी तान काल मंळस्या अद सदा साटी नीन अदिक नीन वंश इन हिस्सा आदीत.’
10 अदिक ईग नोळ, यागुटु यहोवा मूसा से ईद वचन अंदीदुन आग टु पैतालीस वर्ष आगेग्याव, यदुर दा इस्त्राएलगोळ आळी दा वयाळतेला ईत्तुर; आंदुर दा यहोवा तान अनोद अनुसार नानी जीत्ता ईटदुन; अदिक ईग ना पच्यासी वर्ष ईनव आईन.
11 याट ताकत मूसा अन कळोद समय दा नान दा ईरोद आटा ताकत ईग भी नान दा आद; युद्ध माळोर साटी बुळ्क व्हार्या होगोर बरोर साटी याट आ समय नान दा सामर्थ्य ईरोद आट ईग भी नान दा सामर्थ्य आद.
12 इदुरसाटी ईग अद पहाळी नानी कोळ यदुर चर्चा यहोवा आ दिशी माळीदुन; नी रा आ दिशी केळीद्या कि अल अनाकी वंश इनोर ईरतार, अदिक धोड्डेव धोड्डेव गढ़वाळा नगर भी आव; लेकीन येन पता सम्भव आद कि यहोवा नान सांगुळ ईत्तान, अदिक आऊन अनोद अनुसार ना आंदरी आंदुर द्याश दा टु तेगु कोमाईन.”
13 आग यहोशू आऊक आशीर्वाद कोट्टुन; अदिक हेब्रोन नगर यपुन्ने अन पार कालेब उन भाग माळ बुट्टुन.
14 ई कारण हेब्रोन नगर कनजी यपुन्ने अन पार कालेब उन बाग ईंद ताका बन्सकु आद, यतिकी आव इस्त्राएल उन परमेश्वर यहोवा अन पुरा रीति देल अनुसरण माळीदुन.
15 पयले हेब्रोन इन हेसुर किर्यतर्बा ईरोद; आव अर्बा अनाकीगोळ दा सबसे धोड्डेव मंळसा ईरोन. अदिक आ द्याश इक लळाई देल शांती सिक्त.