1 ईदुर हापाळ दिन इन बाद्दा, याग यहोवा इस्त्राएलगोळी आंदुर नाकु दीकळोर दुश्मनगोळ से आराम कोट्टुन, अदिक यहोशू हाळाबाट्ट अदिक हापाळ ऊमर ईनव आगेगीदुन. 2 आग यहोशू सप्पा इस्त्राएलगोळी, मतलब पुरनियोंगोळ, मुख्य मंळसागोळ, न्यायीगोळ, अदिक सरदारगोळी कारसुसकु अनली कुरतुन, “ना रा ईग बाट्ट अदिक हापाळ ऊमर ईनव आगेदीन; 3 अदिक नीव नोळदीर कि नीम परमेश्वर यहोवा नीम निमित्त ई सप्पा जातीगोळ से येन येन माळ्यान, यतिकी जो नीम दी टु लळुसतेला बंदान आव नीमव परमेश्वर यहोवा हुन. 4 नोळी, ना ई मीकदव जातीगोळी चिट्टी हाक हाक्कु नीम वंश इन हिस्सा माळ कोंडीन; अदिक यरदन टु हुडुकु सुर्य मुळ्कतद आत्त धोळ समुद्र ताका ईरावाळा आ सप्‍पा जातीगोळी भी हिंग अच कोटीन, यदरी ना कळ्द बुटीन. 5 अदिक नीम परमेश्वर यहोवा आंदरी नीम मुंदु टु आंदुर द्याश दा टु तेगु कोंडान; अदिक नीव तान परमेश्वर यहोवा अन वचन इन अनुसार आंदुर द्याश मा अधिकार माळ कोंडीर. 6 इदुरसाटी हापाळ हिम्मत कटकु, जो येनारा मूसा अन किताब दा लिख्सकु आद अदरी पुरा माळोर दा ध्यान माळेतीर, अदुर से न रा ईत्त डोक्केतीर न आत्त. 7 ईव जो जातीगोळ नीम बीच दा ईतोग्याव ईऊर बीच दा होगबाळेतीर, अदिक न ईंदुरव द्याव गोळोव हेसुर इन चर्चा माळेतीर, अदिक ना अऊर्द किर्‍या तीनसेतीर, अदिक ना अऊर उपासना माळेतीर, अदिक ना अवरी नमस्कार माळेतीर, 8 लेकीन ह्यांग ईंद इन दीन ताका नीव तान परमेश्वर यहोवा अन भक्ति दा लवलीन ईरतीर, हांग अच ईरतोगेतीर. 9 यहोवा नीम मुंद टु धोड्डेव धोड्डेव अदिक ताकतवर जातीगोळी तेगदान; अदिक नीम मुंद ईंद इन दीन ताका याऊ ठहरूस सकीदील. 10 ✡नीम दा टु ऊंद मंळसा हजार मंळसागोळी खेदाळस्यान, यतिकी नीम परमेश्वर यहोवा तान वचन इन अनुसार नीम दी टु लळुसतान. 11 इदुरसाटी तान परमेश्वर यहोवा अन सांगुळ प्यार ईटोद पुरा ध्यान ईटेतीर. 12 यतिकी अगर नीव यातोदारा रिती यहोवा से तिर्गकु ई जातीगोळ बाकी लॉकुर से मीलुसली कुरतीर जो नीम बीच उळुकु ईरतार, अदिक ईंदुर से सगाई मदा माळकु ईंदुर सांगुळ समधियाना रिश्ता जोळसीर, 13 रा सहीदा जान्स कोमी कि मुंद नीमव परमेश्वर यहोवा ई जातीगोळी नीम मुंदु टु तेगुतिदील; अदिक ईंदुर नीम साटी जाल अदिक फंदा, अदिक नीम पांजरागोळ साटी कोळागोळ, अदिक नीम कण्‍ण दा मुळ्ल ठहरूस्यार, अदिक आखरी दा नीव ई वळ्लीद जागा मा टु जो नीम परमेश्वर यहोवा नीमी कोटान नाश आगेदीर.

14 “केळी, ईद नान सायोद समय आद, नीव जान्सतीर अदिक सहीदा विश्वास माळतीर कि यहोवा नीम साटी हापाळ धोड्डेव क्याल्सा माळ्यान, नीव जान्सतीर कि आव तान कोळ्द वचनगोळ दा टु यातोदु पुरा माळदुर दा असफल ईतीदील, यहोवा आ सप्पा वचनगोळी पुरा माळ्यान, जो आव नामी कोटान. 15 अव सप्पा वळ्लेव वचन जो नीम परमेश्वर यहोवा नामी कोटान, पुरा तरीका देल सही आग्याव. लेकीन यहोवा, अदा तरीका देल दुसरा वचनगोळी भी सत्य माळ्यान, आव चेतावनी कोटान कि अगर नीव पाप माळीर आग नीम म्याकुच विपत्तीगोळ बंदव, आव चेतावनी कोटान कि आव नीमी आ द्याश इक बीळोर साटी विवश माळ्यान यदरी आव नीमी कोटान. 16 ईद घटसीत, अगर नीव तान परमेश्वर यहोवा अन सांगुळ माळ्द वादा अन पालन माळोर से इनकार माळीर, अगर नीव द्यावगोळ हाती होदीर अदिक आंदुर स्यावा माळीर रा ई द्याश इक नीव खोऊस बुट्टीर, अगर नीव हिंग माळीर रा यहोवा नीम मा हापाळ सिट्टी बंदान, आग नीव ई वळ्लीद द्याश टु जल्दी से नाश आगेदीर यदरी आव नीमी कोटान.”