1 यरीहो अन सप्पा फाटक इस्त्राएलीगोळ अंज्क इन कारण लगातार बंद ईत्तव, अदिक याऊ व्हार्या ईला होगसकोन अदिक बुळ्क ईला होगसकोन. 2 बाक यहोवा यहोशू से अंदुन, “केळ, ना यरीहो अक आऊन राजा अदिक शूरवीरगोळ सांगुळ नीन वश दा माळ कोळतीन. 3 इदुरसाटी नीम दा यास योध्दा आर नगर इक घेर्स कोमुल, अदिक आ नगर इन नाकु दी हागुल ऊंद घन वयाळकु बरूल. अदिक आर दिन ताका हिंग अच माळेतीर. 4 म्यांडागोळ्द सींग इन माळ्द तुरहीगोळ हुडुकु येळ याजकगोळी नळुगोळी, याजकगोळ से अनी कि आंदुर पवित्र सन्दुक इन मुंद नळदार, सातवा दिशी नगर इन नाकु दी येळ फ्यारा माळी, याजकगोळ से अनी कि आंदुर नळुतेला तुरही मुरस्यार. 5 याजक तुरहीगोळ देल धोळ्द आवाज माळ्यार, याग नीव आ आवाज केळीर रा नीव सप्पा लॉकुर से गर्जन सुरू माळली हेळीतीर, याग नीव हिंग माळीर रा नगर इन दिवारगोळ बिदोदव, आग नीम लॉकुर सीधा नगर दा होदार.”

6 ई प्रकार नून उन पार यहोशू याजकगोळी जमा माळदुन, यहोशू आंदुर से अंदुन, “यहोवा अन पवित्र सन्दुक इक हुडुकु नळी अदिक येळ याजकगोळी तुरही हुडुकु नळुली हेळी, आ याजकगोळी सन्दुक इन मुंद नळु पायजे.” 7 बाक आव लॉकुर से अंदुन, “मुंद वाळुस्कु नगर इन नाकु दी वयाळकु बरी; अदिक अस्त्र शस्त्र वाळेर मंळसा यहोवा अन सन्दुक इन मुंद मुंद नळी.” 8 अदिक याग यहोशू लॉकुर से ईद मात अंदुन, रा आंदुर येळ याजक जो यहोवा अन मुंद येळ तुरही हुडुकु ईरोर तुरही उयतेला नळदुर, अदिक याजक यहोवा अन पवित्र सन्दुक आंदुर हिंद हिंद हुळकु नळोर. 9 अस्त्र शस्त्र वाळेर मंळसागोळ याजकगोळ मुंद नळोर, अदिक पवित्र सन्दुक इन हिंद नळावाळेर लॉकुर तुरही मुरसोर अदिक सांगुळ नळोर. 10 अदिक यहोशू लॉकुरी आग्या कोट्टुन, “यागासताका ना नीमी जयजयकार माळोद आग्या कोळालीन, आगासताका जयजयकार माळबाळेतीर, अदिक न निम्द येनारा शब्द केळदुर दा बरूल, अदिक यातोदु मात नीम बाय दा टु होळ ईला पायजे; याग ना नीमी आग्या कोळाईन आग जयजयकार माळेतीर.” 11 आव यहोवा अन सन्दुक इक ऊंद घन नगर इन नाकु दी वयाळसदुन; आग आंदुर छावनी दा बंदुर, अदिक ईळ्लक अल्या कळदुर. 12 यहोशू व्हातर्या येद्दुन, अदिक याजकगोळ यहोवा अन सन्दुक नेगु कोंडुर. 13 अदिक आ येळ याजकगोळ व्हात इन सींग इन येळ तुरही हुळदुर अदिक यहोवा अन सन्दुक इन मुंद मुंद मुर्सतेला नळदुर; अदिक आंदुर मुंद अस्त्र शस्त्र वाळेर मंळसा नळदुर, अदिक हिंद वाळेर यहोवा अन सन्दुक इन हिंद हिंद नळदुर, अदिक याजकगोळ तुरही मुर्सतेला नळदुर. 14 ई प्रकार आंदुर दुसरा दिशी भी ऊंद घन नगर इन नाकु दी वयाळकु छावनी दा वापस बंदुर, अदिक ई प्रकार आंदुर आर दिन ताका माळदुर. 15 बाक आंदुर सातवा दिशी हापाळ जल्दी यदकु अदा रीति देल नगर इन नाकु दी येळ घन वयाळकु बंदुर; सिर्फ अदा दिशी आंदुर येळ घन वयाळदुर. 16 आग सातवा घन याग याजक तुरही ऊरूतोगोर, आग यहोशू लॉकुर से अंदुन, “जयजयकार माळी; यतिकी यहोवा ई नगर इक नीमी कोट्ट बुटान. 17 नगर अदिक अदुर्द हर ऊंद वस्तु प्रभु अक बली अन रूप दा अर्पीत माळकु नाश आगेदीत; केवल राहाब वेश्या अदिक यास आकिन मान्या आर आंदुर जित्‍ता बिटकु आदार, यतिकी आक नाम कळुदव दूतगोळी होचकु ईटीदुर. 18 अदिक नीव नाश माळ्द वस्तुगोळ से सावधानी देल तान तान इक अलग ईटी, हींग आगबाळुल कि नाश इन वस्तु ठहरूस्कु बाद्दा अदा नाश इन वस्तु दा टु येनारा ताकोम कोमी, अदिक ईत्ता प्रकार देल इस्त्राएली छावनी इक भ्रष्ट माळकु अदरी कष्ट दा हाक्क बुळी. 19 सप्पा व्हान्ना, बेळ्ली अदिक जो बर्तन पीतल अदिक लोहा नव आव, अव यहोवा अन साटी पवित्र आव, अदिक आऊंदा भंडार दा ईटकु आगुल.” 20 ✡आग लॉकुर जयजयकार माळदुर, अदिक याजक नरसिंगा ऊरूतेला ईत्तुर. अदिक याग लॉकुर नरसिंगा अन्द शब्द केळदुर रा बाक हापाळ धोळ्द आवाज देल आंदुर जयजयकार माळदुर, आग नगर इन दिवाल बिदोत, अदिक लॉकुर तान तान मुंदी टु आ नगर मा येरेदुर, अदिक नगर इक ताकोम कोंडुर. 21 अदिक येन गंळ्सुर, येन आर्तेर, येन हारोदोर, येन हाळाबाट्टुर, बल्‍की गोसीगोळ, म्यांडागोळ, मर्रगोळ, गदहागोळ, अदिक यास नगर दा ईरोर, आ सप्पा मुंदरी आंदुर नाश इन वस्तु सम्सकु तलवार देल कोंद बुटुर. 22 आग यहोशू आ येढ्ढु मंळसागोळ से जो आ द्याश इन भेद ताकोमली होगीदुर अंदुन, “तान किर्‍या अन अनुसार आ वेश्या अन मान्या होगकु आकी अदिक जो आकिन हात्ती ईतीदार आंदरी भी तेगुक तरी.” 23 आग आ येढ्ढु हारोदोर भेदीगोळ अंदर होगकु राहाब इक, अदिक आकिन मोय-आप्प, वार्टुर अदिक सप्‍पा मुंदरी जो आकिन मान्या ईरतोगोर, बल्‍की आकिन सप्‍पा परिवार इक तेगुकु तंदुर, अदिक इस्त्राएल इन छावनी टु व्हार्या कुर्स बुटुर. 24 आग आंदुर नगर इक अदिक जो येनारा अदुर दा ईरोद, सप्‍पा अक बेक्‍की हचकु होताक बुटुर; सिर्फ व्हान्ना, बेळ्ली अदिक जो बर्तन पीतल अदिक लोहा नव ईरव, अवरी आंदुर यहोवा अन भवन इन भंडार दा ईट बुटुर. 25 ✡अदिक यहोशू राहाब वेश्या अदिक आकिन आप्प उन घराना अक, बल्‍की आकिन सप्‍पा लॉकुरी जित्‍ता बिट्ट बुटुर, अदिक ईगासताका आकिन वंश इस्त्राएलीगोळ बीच दा ईरतद, यतिकी जो दूतगोळी यहोशू यरीहो अन भेद ताकोमली कळीदुन आंदरी आक होचकु ईटीदुर. 26 ✡बाक अदा समय यहोशू इस्त्राएलीगोळ मुंद किर्‍या तिंदुन, अदिक अंदुन, “जो मंळसा येदकु ई नगर यरीहो अक मात्त माळ्यान आव यहोवा अन दी टु श्रापित आदान. याग आव अदुर्द पायवा हाक्यान आग आऊन धोळ पार सोत्तान, अदिक याग आव अदुर फाटकगोळी हचुस्यान आग आऊन श्याण्णेव पार सोतोदान.” 27 अदिक यहोवा यहोशू अन सांगुळ ईत्तुन; अदिक यहोशू अन्द कीर्ति आ सप्पा द्याश दा फैलुसेत.