9
गिबोनिगोळ्द यहोशू अक ध्वाका कोळोद
1 ईद केळकु हित्ती, एमोरी, कनानी, परिज्जी, हिब्बी, अदिक यबूसी, यास राजा यरदन इन ईप्पाटी पहाळी द्याश दा अदिक ल्यालमा अन द्याश दा, अदिक लबानोन इन मुंद इन महासागर इन किनारा मा ईरतोगोर,
2 आंदुर ऊंद मन आगकु यहोशू अदिक इस्त्राएलीगोळ सांगुळ लळाई माळोर साटी जमा आदुर.
3 याग गिबोन इन निवासीगोळ केळदुर कि यहोशू यरीहो अदिक आई नगर से येन येन माळदुर,
4 आग आंदुर छल माळदुर, अदिक राजदूतगोळ भेष माळकु तान गदहागोळ मा हाळोव बॉरागोळ, अदिक हाळोव हरदव, अदिक जोळ्सदव दाखमधु अन चिलागोळ कटदुर
5 तान कालगोळ दा हाळोव केरू, अदिक मय मा हाळोव कपळा हाक्कु, अदिक तान भोजन इन साटी वंळ्गींद अदिक बुर्सी हद्द रोट्टी हुळदुर.
6 आग आंदुर गिलगाल इन छावनी दा यहोशू उन हाती होगकु आऊन से अदिक इस्त्राएली मंळसागोळ से अनली कुरतुर, “नाव दुर द्याश टु बंदेव; इदुरसाटी ईग नीव नाम से वादा माळी.”
7 इस्त्राएली मंळसागोळ आ हिब्बीगोळ से अंदुर, “येन मालुम नीव नाम बीच दा का ईरतीदीर; बाक नाव नीम से वादा ह्यांग माळेव?”
8 आंदुर यहोशू से अंदुर, “नाव नीनोर दास हुयेव.” आग यहोशू आंदुर से अंदुन, “नीव यार हुईर? अदिक येल टु बंदीर?”
9 आंदुर आऊन से अंदुर, “नीन दास हापाळ दुर इन द्याश टु नीन परमेश्वर यहोवा अन हेसुर केळकु बंदार; यतिकी नाव ईद सप्पा केळेव, मतलब आऊन किर्ती अदिक जो येनारा आव मिस्त्र दा माळदुन,
10 अदिक जो येनारा आव एमोरिया अन येढ्ढु राजागोळ सांगुळ माळदुन जो यरदन इन आप्पाटी पूर्व दिशा दी ईरतोगोर, मतलब हेशबोन इन राजा सीहोन से, अदिक बाशान उन राजा ओग से जो अश्तारोत दा ईरोन.
11 इदुरसाटी नाम मान्यागोळोर बाट्टुर अदिक नाम द्याश इन सप्पा निवासीगोळ नाम से अंदुर, कि हादी इन साटी तान सांगुळ भोजन इन सामान हुळकु आंदुर से सीकली होगी, अदिक आंदुर से अनेतीर, कि नाव नीमोर दास हुयेव; इदुरसाटी ईग नीव नाम से वादा माळी.
12 नामव रोट्टीगोळी नोळी, याग नाव लॉकुर मान्ना बीटीदेव आग ईव बिस्स अदिक ताजा ईरव. लेकीन ईग नी नोळेत्या कि ईव वंळ्गेदव अदिक ईवरी बुर्सी हत्तेग्याद.
13 बाक ईव अंगुर इन रास्सा अन चिला नाव तुमीदेव, आग रा व्हाशेव ईरव, लेकीन नोळी ईग ईव हरदोग्याव; अदिक नामव ईव कपळा अदिक केरूगोळ हापाळ लम्बा यात्रा अन कारण पुराना आगेग्याव.”
14 आग आ मंळसागोळ यहोवा से बीना सलाह ताकोमकु आंदुर भोजन दा टु थ्वाळासा तिंद कोंडुर.
15 आग यहोशू आंदुर से मेल माळकु आंदुर से ईद वादा माळदुन, कि नीमी जीत्ता बीट्टेव; अदिक मंडली इन स्याणागोळ आंदुर से किर्या तिंदुर.
16 आंदुर सांगुळ वादा माळदुर मुर दिन इन बाद्दा आंदरी ईद समाचार सिक्त, कि आंदुर नाम हात्तीगोळोर ईरावाळेर लॉकुर उर, अदिक नाम बीच दा अच बसुस्कु आर.
17 आग इस्त्राएली अल टु होटकु तीसरा दिशी आंदुर नगरगोळी यूर हेसुर गिबोन, कपीरा, बेरोत, अदिक किर्यत्यारीम दा पोहचुसदुर.
18 अदिक इस्त्राएलगोळ आंदरी कोंदीदील, यतिकी मंडली इन स्याणागोळ आंदुर सांगुळ इस्त्राएल ईनव परमेश्वर उन किर्या तिंदीदुर. आग सप्पा मंडली इन लॉकुर स्याणागोळ्द विरूद्ध कुळकुळसली हतदुर.
19 आग सप्पा प्रधानगोळ सप्पा मंडली से अंदुर, “नाव आंदुर से इस्त्राएल इन परमेश्वर उन किर्या तिंदेव, इदुरसाटी ईग नाव आंदरी कय हच सकालेव.
20 नाव आंदुर से ईदा माळेव कि आ किर्या अन अनुसार नाव आंदरी जीत्ता बीट्ट बुट्टेव, ईलारा नाम्द तिंद किर्या अन कारण नाम मा क्रोध बीद्दीत.”
21 बाक स्याणागोळ आंदुर से अंदुर, “आंदुर जीत्ता बिटकु आगुल.” अत: स्याणागोळ ईद वचन इन अनुसार आंदुर सप्पा मंडली इन साटी हुळ्ली कडावाळेर अदिक नीर तुमावाळेर आदुर.
22 बाक यहोशू गिबोन नगर इन लॉकुरी कारूकु अंदुन, “नीव रा नाम बीच दा का ईरतीर, बाक नीव नाम से ईद अनकु यती छल माळदीर, कि नाव नीम से हापाळ दुर ईरतेव?
23 इदुरसाटी ईग नीव श्रापित आईर, अदिक नीम दा टु याऊ हिंग ईरतीदील जो दास, मतलब नान परमेश्वर उन भवन इन साटी हुळ्ली कडावाळा अदिक नीर तुमावाळा ईरतीदील.”
24 आंदुर यहोशू उक उत्तर कोट्टुर, “नीन दासगोळ्द ईद सहीदा हेळकु आगीत, कि नीन परमेश्वर यहोवा तान दास मूसा अक आग्या कोटीदुन कि नीमी अद सप्पा द्याश कोळुल, अदिक आंदुर सप्पा ईरावाळेरळ्द नीम मुंदु टु सर्वनाश माळुल; इदुरसाटी नाम लॉकुरी नीम कारण देल तान जीवगोळ्द लाले बीद्दव, इदुरसाटी नाव हिंग क्याल्सा माळदेव.
25 अदिक ईग नाव नीन वश दा आयेव, ह्यांग व्यवहार नीनी वळ्लीद हततद अदिक वळ्लीद सम्सतद हांगा नी नाम सांगुळ माळ.”
26 आग आव हांग अच माळदुन, अदिक आंदरी इस्त्राएलगोळ कय दा टु हिंग उळ्सदुन, कि आंदुर आंदरी कोनोर साटी होगीदिल.
27 लेकीन यहोशू अदा दिशी आंदरी मंडली इन साटी, अदिक जो जागा यहोवा अन साटी नीवळुसकु आगीत आऊन वेदी साटी, हुळ्ली कडावाळेर अदिक नीर तुमावाळेर नीवळुसदुन, ह्यांग कि ईंद ताका आद.