3
यूहन्ना बपतिस्मा कोळावाळा अन्द बातणी
(मत्ती ३:१-१२; मरकुस १:१-८; यूहन्ना १:१९-२८)
1 तिबिरियुस रोमन इन राज्य अन्द पंद्रावा वर्ष दा पुन्तियुस पिलातुस यहूदिया अन्द न्यायाधीश ईरोन, अदिक गलील दा हेरोदेस, इतूरैया अदिक त्रखोनीतिस द्याश दा आऊन वार्ट फिलिप्पुस, अदिक अबिलेने दा लिसानियास, चौथाई इन राजा ईरोर,
2 अदिक याग हन्ना अदिक कैफा महायाजक ईरोर, आ समय दा परमेश्वर उन वचन आळी दा जकरयाह अन्द पार यूहन्ना अन्द हात्ती पोहचुस्त.
3 बपतिस्मा कोळावाळा यूहन्ना यरदन इन आसपास इन सप्पा प्रदेश दा होगकु, पश्चाताप माळी, बपतिस्मा ताकोमी बाक परमेश्वर नीम पापगोळी माफ माळ्यान, हिंग प्रचार माळ्त टेटदुन.
4 ह्यांग यशायाह भविष्यवक्ता अन्द माताळ्द वचनगोळ किताब दा लिख्सकु आव:
“आळी दा ऊंद कारावाळा अन्द आवाज केळ बरेत्याद कि,
‘प्रभु उन हादी तयार माळी,
अदिक आऊन यात्रा अन्द साटी सळकगोळी सरका माळी.
5 हर ऊंद घाटी तुमकु आदीत,
अदिक हर ऊंद पहाळी अदिक टीला ल्यालमा माळकु आदीत;
अदिक जो वाकळा आद अद सीधा, अदिक जो म्याकुच आद अद ल्यालमा अदिक जो ल्यालमा आद अद म्याकुच
अदिक अद चौरस हादी बनसीत.
6 अदिक हर ऊंद मंळसा परमेश्वर उन उद्धार इक नोळीत.’ ”
7 जो भीळ इन भीळ आऊन हात्ती बपतिस्मा ताकोमली होटकु बरतोगोद, आंदुर से यूहन्ना अनतोगोन, “हे हाव इन चिकोरा, याव नीमी चतरा माळ बुटुन कि परमेश्वर उन बरावाळा प्रकोप देल ओळी?
8 इदुरसाटी हिंग मातगोळ माळी जो नीम पश्चाताप इक तोर्सतद, अदिक तान तान मन दा ईद विचार माळबाळी कि नाम आप्प अब्राहम हुन; यतिकी ना नीम से अनतीन कि परमेश्वर ई कल्लगोळ देल भी अब्राहम उन साटी औलाद पैदा माळ सकतान.
9 ईग कोळ्ली मार्रगोळ्द जळी मा ईटकु आद, इदुरसाटी जो-जो मार्र वळ्लीद काय तराल, अदरी कळकु अदिक बेक्की दा हाक्कु आदीत.”
10 आग लॉकुर आऊन से केळदुर, “रा नाव येन माळेव?”
11 आव आंदरी उत्तर कोट्टुन, “यार्द हात्ती येढ्ढ कुळता आव, आव आऊक ऊंद कुळता कोळुल यार्द हात्ती हैलेच अदिक यार्द हात्ती तिनोद आद, आव भी हिंग अच माळुल.”
12 कर ताकोमावाळेर भी बपतिस्मा ताकोमली बंदुर, अदिक आऊन से केळदुर, “हे गुरु, नाव येन माळेव?”
13 आव आंदुर से अंदुन, “जो नीम साटी ठहरूसकु आग्याद, अदुर से यक्कुल ताकोम बाळेतीर.”
14 सिपाहीगोळ भी आऊन से ईद केळदुर, “नाव येन माळेव?”
यूहन्ना आंदुर से अंदुन, “यारदारा मा दबाव हाक्कु आऊन से पैस्या ताकोमबाळी अदिक ख्वाटा दोष हचबाळी, लेकीन तान रोजी देल अच संतुष्ट ईरी.”
15 याग लॉकुर आस हचकु ईरोर, अदिक सप्पा तान तान मन दा यूहन्ना अन्द बारा दा विचार माळोर कि येन ईवा रा मसीह आलच,
16 रा बपतिस्मा कोळावाळा यूहन्ना आ सप्पा मुंदुर से अंदुन, “ना रा नीमी नीर देल बपतिस्मा कोळतीन, लेकीन आव बरावाळा आन जो नान से यक्कुल ताकतवर आन; ना रा ई लायक भी हैलेच कि आऊन केरू उन बंध खोल्स सकाईन. आव नीमी पवित्र आत्मा अदिक बेक्की देल बपतिस्मा कोट्टान.
17 आऊन मार्र, आऊन कय दा आद; अदिक आव तान केई वळ्लीद तरीका देल साफ माळ्यान; अदिक तान गोदीगोळी रा ढ्वाला दा जमा माळ्यान; लेकीन भूसा अन्द गवान्डा अक आ बेक्की दा होताक्यान जो यागलु नुनाल्द.”
18 इदुरसाटी आव हापाळ सा शिक्षा कोट कोटकु लॉकुरी चेतावनी कोळतोगोन कि तान हादी बदलुसुल.
19 लेकीन याग आव चौथाई द्याश इन राजा हेरोदेस उक आऊन वार्ट फिलिप्पुस उन हिंग्स हेरोदियास इन बारा दा अदिक सप्पा कुकर्मगोळ्द बारा दा जो आव माळीदुन, फटकार्सदुन,
20 रा हेरोदेस आ सप्पा देल वाढ़ुस्कु ईद कुकर्म भी माळदुन कि बपतिस्मा कोळावाळा यूहन्ना अक बंदीगृह दा हाक बुट्टुन.
यीशु उन बपतिस्मा
(मत्ती ३:१३-१७; मरकुस १:९-११)
21 याग सप्पा लॉकुर बपतिस्मा ताकोंडुर अदिक यीशु भी बपतिस्मा ताकोमकु प्रार्थना माळोन, रा स्वर्ग खुल्सेत,
22 अदिक पवित्र आत्मा कबूतर इन घाई आऊन मय मा ईळुत, अदिक स्वर्ग टु ईद आकाशवाणी आत कि: “नी नान प्रिय पार हुय, ना नीन देल हापाळ खुश आईन.”
यीशु उन वंशावली
(मत्ती १:१-१७)
23 याग यीशु खुद उपदेश कोळली कुरतुन, रा लगभग तीस वर्ष ईनव ईरोन ह्यांग लॉकुर सम्सतोगोर अदिक यीशु यूसुफ ईनव पार ईरोन; अदिक यूसुफ एली नव,
24 अदिक एली मत्तात ईनव, अदिक मत्तात लेवी नव, अदिक लेवी मलकी नव, अदिक मलकी यन्ना नव, अदिक यन्ना यूसुफ ईनव,
25 अदिक यूसुफ मत्तित्याह नव, अदिक मत्तित्याह आमोस ईनव, अदिक आमोस नहूम ईनव, अदिक नहूम असल्याह नव, अदिक असल्याह नोगह ईनव,
26 अदिक नोगह मात ईनव, अदिक मात मत्तित्याह नव, अदिक मत्तित्याह शिमी नव, अदिक शिमी योसेख ईनव, अदिक योसेख योदाह ईनव,
27 अदिक योदाह यूहन्ना नव, अदिक यूहन्ना रेसा नव, अदिक रेसा जरूब्बाबिल ईनव, अदिक जरूब्बाबिल शालतिएल ईनव, अदिक शालतिएल नेरी ईनव,
28 अदिक नेरी मलकी नव, अदिक मलकी अद्दी नव, अदिक अद्दी कोसाम ईनव, अदिक कोसाम इलमोदाम ईनव, अदिक इलमोदाम एर ईनव,
29 अदिक एर यहोशू नव, अदिक यहोशू इलाजार ईनव, अदिक इलाजार योरीम ईनव, अदिक योरीम मत्तात ईनव, अदिक मत्तात लेवी नव,
30 अदिक लेवी शमौन ईनव, अदिक शमौन यहूदा नव, अदिक यहूदा यूसुफ ईनव, अदिक यूसुफ योनान ईनव, अदिक योनान इल्याकीम ईनव,
31 अदिक इलयाकीम मलेआह ईनव, अदिक मलेआह मिन्नाह ईनव, अदिक मिन्नाह मत्तात ईनव, अदिक मत्तात नातान ईनव, अदिक नातान दाऊद ईनव,
32 अदिक दाऊद यिशै ईनव, अदिक यिशै ओबेद ईनव, अदिक ओबेद बोअज ईनव, अदिक बोअज सलमोन ईनव, अदिक सलमोन नहशोन ईनव,
33 अदिक नहशोन अम्मीनादाब ईनव, अदिक अम्मीनादाब अरनी नव, अदिक अरनी हिस्त्रोन ईनव अदिक हिस्त्रोन फिरिस ईनव, अदिक फिरिस यहूदा नव,
34 अदिक यहूदा याकूब ईनव, अदिक याकूब इसाहक ईनव, अदिक इसहाक अब्राहम ईनव, अदिक अब्राहम तिरह ईनव, अदिक तिरह नाहोर ईनव,
35 अदिक नाहोर सरूग ईनव, अदिक सरूग रऊ नव, अदिक रऊ फिलिग ईनव, अदिक फिलिग एबिर ईनव, अदिक एबिर शिलह ईनव,
36 अदिक शिलह केनान ईनव, अदिक केनान अरफक्षद ईनव, अदिक अरफक्षद शेम ईनव, अदिक शेम नूह नव, अदिक नूह लिमिक ईनव,
37 अदिक लिमिक मथूशिलह ईनव, अदिक मथूशिलह हनोक ईनव, अदिक हनोक यिरिद ईनव, अदिक यिरिद महललेल ईनव, अदिक महललेल केनान ईनव,
38 अदिक केनान एनोश ईनव, अदिक एनोश शेत ईनव, अदिक शेत आदम ईनव, अदिक आदम परमेश्वर उन पार ईरोन.