5
दुष्टआत्मा हतकु मंळसा अक चंगा माळोद
(मत्ती ८:२८-३४; लूका ८:२६-३९)
1 यीशु अदिक आऊन चेलागोळ झील इन आप्पाटी गिरासेनियागोळ्द प्रदेश दा पोहचुसदुर.
2 याग यीशु ड्वांगा मा टु ईळदुन रा तुरन्त ऊंद मंळसा जो कि यारदा दुष्टआत्मा हतकु ईरोद, कब्रस्तान दा टु होटकु यीशु से मिलुसदुन.
3 आव कब्रस्तान दा ईरतोगोन अदिक याऊ आऊक शंकलीगोळ देल भी कटकु ईला ईट सकोन,
4 यतिकी आऊक बेळीगोळ अदिक शंकलीगोळ देल कटकु आगीत, लेकीन आव हापाळ अनली शंकलीगोळी मुर्द बुटीदुन अदिक बेळीगोळ्द तुकळा-तुकळा माळ कोंडीदुन, अदिक यारू आऊक बस दा ईला माळसकोर.
5 आव लगातार ईळ्लक-हागुल कब्रस्तान अदिक पहाळीगोळ दा वयाळोन अदिक कीटुरतोगोन, अदिक तान तान इक कलगोळ देल घायल माळतोगोन.
6 आव यीशु उक दुर टु उच नोळदुन, अदिक आव ओळतेला यीशु उन हात्ती बंदुन अदिक ट्वांगरा अन्द भार देल बिदकु प्रणाम माळदुन.
7 अदिक आव धोळ आवाज देल चिळ्लासकु अंदुन, “हे यीशु, महान परमेश्वर उन पारा, नानी नीन से येन क्याल्सा? ना नीनी परमेश्वर उन किर्या कोळतीन, कि नी नानी दुख कोळबाळ.”
8 आव यीशु से इदुरसाटी हिंग अंदुन यतिकी यीशु आऊन से अंदिदुन, “हे दुष्टआत्मा, ई मंळसा अन्द मय दा टु होटबुळ!”
9 यीशु आ दुष्टआत्मा से केळदुन, “नीन येन हेसुर आद?”
अद यीशु से अन्त, “नान हेसुर सेना आद; यतिकी नाव हापाळ सा आयेव.”
10 अदिक दुष्टआत्मा यीशु से च्याच विनती माळकु अन्त, कि नामी ई प्रदेश टु व्हार्या कळुबाळ.
11 हात्तीगोळ्द पहाळ इन ढलान मा हंदीगोळ्द ऊंद धोळ्द झुण्ड आळोद.
12 दुष्टआत्मागोळ यीशु से विनती माळकु अंदव, “नामी आ हंदीगोळ्द झुण्ड दा कळुबुळ कि नाव आंदुर बुळ्क होक्केव.”
13 इदुरसाटी यीशु आंदरी आग्या कोटुन अदिक दुष्टआत्मा आ मंळसा दा टु होटकु हंदीगोळ्द बुळ्क होकदव अदिक झुण्ड, जो लगभग येढ्ढ हजार इन ईरोद, ढलान मा टु घसरूस्कु झील दा होगकु बित्त. अदिक अल्या मुळ्ककु सोत्तव.
14 हंदीगोळी आळसावाळेर ओळकु नगर अदिक ऊरगोळ दा ईद खबर केळ्सदुर, अदिक जो आगीत, लॉकुर अदरी नोळली बंदुर.
15 यीशु उन हात्ती लॉकुर बंदकु, आ मंळसा अक नोळदुर यारदा दुष्टआत्मागोळ ईरव, मतलब सेना समुस्कु ईरोद, कपळा हाक्कु अदिक गुमसुम कुर्त नोळकु अंजेदुर.
16 या लॉकुर ईद घटना अक पयले नोळीदुर रा हेळदुर कि नोळावाळेर आऊन, यारदा दुष्टआत्मागोळ ईरव, अदिक हंदीगोळ्द पुरा हाल आंदरी अंदकु हेळदुर.
17 आग लॉकुर यीशु से विनती माळकु अनली कुरतुर कि नाम प्रदेश दा टु होटोग.
18 अदिक याग यीशु ड्वांगा मा येरली कुरतुन रा आव यारदा पयले दुष्टआत्मागोळ ईरव, यीशु से विनती माळली कुरतुन, “नानी तान सांगुळ ईरगोळ.”
19 लेकीन यीशु आऊक आग्या कोटीदील, अदिक आऊन से अंदुन, “तान मान्या होगकु तान परिवार इक हेळ कि नीन मा दया माळकु प्रभु नीन साटी ह्यांग धोड्डेव क्याल्सा माळ्यान.”
20 बाक आव होगकु दिकापुलिस दा ई मातगोळी हेळली कुरतुन कि यीशु नान साठी ह्यांग धोड्डेव क्याल्सा माळ्यान; अदिक सप्पा लॉकुर ईद केळकु चकित आदुर.
सोत्त पोर अदिक ऊंद रोगी आर्त
(मत्ती ९:१८-२६; लूका ८:४०-५६)
21 याग यीशु बाक ड्वांगा देल झील इन आप्पाटी होदुन, रा ऊंद धोळ्द भीळ आऊन हात्ती बंदकु जमा आगेत. आव झील इन किनारा मा का ईरोन.
22 याईर हेसुर ईनव ऊंद यहूदी मंळसा, जो यहूदी लॉकुर्द सभागृह अन्द सरदारगोळ दा टु ऊंद सरदार बंदुन, अदिक यीशु उक नोळकु आऊन कालगोळ मा बिदोदुन,
23 अदिक ईद अंदकु यीशु से हापाळ विनती माळदुन, “नान स्याण पोर सायापरी आगेग्यार: नी बंदकु आकिन मा कय ईट कि आक वळ्लीद आगकु जित्ता ईरूल.”
24 आग यीशु आऊन सांगुळ नळदुन अदिक ऊंद धोळ्द भीळ आऊन हिंद आगेत, ईल ताका कि लॉकुर आऊन मा बिळली आगोर.
25 अल्या ऊंद आर्त ईरोर, आक इक हन्नेळ वर्ष टु खुन होगोद रोग ईरोद.
26 आ आर्त हापाळ परेशान ईरोर आक हापाळ वैद्यगोळ से तान ईलाज माळीदुर तरी भी यक्कुल दुखी आगेगीदुर. अदिक तान सप्पा धन लुट्सदुर बाद्दा भी आकी येनु आराम सिकिदील, लेकीन मात यक्कुल रोगी आगेगीदुर.
27 आक यीशु उन बारा दा चर्चा केळीदुर, अनकु “भीळ दा हिंदु टु बंदकु आऊन कपळा अन्द किनारा अक मुटदुर.”
28 यतिकी आक मन मन दा अच अनतोगोर, “अगर ना आऊन कपळा अक मुटाईन, रा वळ्लीद आगेगाईन.”
29 आग आक यीशु उन कपळा अक मुटदुर अदिक तुरन्त आकिन खुन होगोद बंद आगेत, अदिक आ आर्त तान शरीर दा ईद जान्स कोंडुर कि ना तान आ बिमारी देल वळ्लेर आगेदीन.
30 यीशु तुरन्त तान मन दा जान्स कोंडुन कि नान दा टु ईद सामर्थ्य होटाद. अदिक आव भीळ दा हिंद तिर्गकु केळदुन, “नान कपळा अक यार मुटदुर?”
31 आग आऊन चेलागोळ आऊक अंदुर, नी नोळत्या कि भीळ नीन मा बिळली इक आगतद, अदिक नी अनत्या कि यार नानी मुटदुर?
32 लेकीन यीशु आक इक नोळोर साठी नाकु दी कण्ण नेगुकु नोळदुन, कि यार नानी मुटदुर.
33 आग आ आर्त जो आकिन सांगुळ आगीत आक ईद जान्सकु कि नान ह्यांग भलाई आग्याद, अंज्त अदिक नळ्गतेला बंदुर, अदिक आऊन कालगोळ मुंद ट्वांगरा टेक्सकु आऊक सब हाल खरा-खरा हेळ बुटुर.
34 यीशु आकिन से अंदुन, “हे पोरी, नीन विश्वास नीनी वळ्लीद माळ्याद: खुशी देल होग, अदिक तान ईद बिमारी देल ऊळ्दकु ईर.”
35 यीशु ईद अनतेला अच ईरोन कि यहूदी लॉकुर्द सभागृह अन्द सरदार उन मान्या टु थ्वाळासा लॉकुर बंदकु अंदुर, “नीन पोर रा सोतोग्यार, ईग गुरु उक येतरी दुख कोळत्या?”
36 लेकीन जो मात आंदुर अनोर, अदरी यीशु केळदुन पर ध्यान कोटीदील, यहूदी लॉकुर्द सभागृह अन्द सरदार से अंदुन, “अंजबाळ, सिर्फ विश्वास ईट.”
37 अदिक यीशु पतरस अदिक याकूब अदिक आऊन वार्ट यूहन्ना अक बिटकु, दुसरा यारीकु तान सांगुळ बर गोटीदील.
38 याग आंदुर सप्पा मुंदुर यहूदी लॉकुर्द सभागृह अन्द सरदार उन मान्या बंदुर, रा यीशु नोळदुन कि अल खलबली मचुसकु आद. अदिक लॉकुरी हापाळ वर्लतेला अदिक चिल्ळासतेला नोळदुन.
39 आग यीशु मान्या अन्द बुळ्क होक्कु आंदुर से अंदुन, “नीव येतरी खलबली मचुसतीर अदिक वर्लेतीर? पोर सायलिका आर, लेकीन मिंगेत्यार.”
40 आंदुर यीशु उन मज्याक हार्सली कुरतुर, लेकीन आव सप्पा मुंदरी तेगुकु पोर इन मोय-आप्प अदिक तान मुर चेलागोळ सांगुळ बुळ्क यल पोर बिदकु ईरोर, अल होदुर.
41 अदिक आव पोर इन कय हुळकु आकिन से अंदुन, “तलीता कुमी!” यदुर्द मतलब आद, “हे पोरी, ना नीन से अनतीन, येळ.”
42 अदिक आ स्याण पोर तुरन्त यदकु नळुली अदिक वयाळली कुरतुर; यतिकी आक हन्नेळ वर्ष इनोर ईरोर. इदुर मा लॉकुर हापाळ सट्ट आगेदुर.
43 बाक यीशु आंदरी चेतावनी कोटकु आग्या कोटुन कि ईद मात यारू जान्स ईला पायजे, अदिक आव अंदुन “पोर इक येनारा तिनली कोळी.”