12
परमेश्वर उन स्यावा अन जीवन
1 इदुरसाटी हे वार्टुरा अदिक आकतींगेरा, ना नीम से परमेश्वर उन दया याद तोर्सकु विनती माळतीन कि तान शरीर इक जित्ता, अदिक पवित्र, अदिक परमेश्वर उक संतोष कोळावाळा बलिदान माळकु येरसी. अगर नीम्द खरा उपासना आद.
2 ई दुनिया अन घाई आगबाळी; लेकीन नीम मन इन व्हाशोद आगदुर देल नीम चाल चलन भी बदलुसतेला ईरूल, यदुर देल नीव परमेश्वर उन भला, अदिक भावती, अदिक सिद्ध इच्छा अनुभव देल मालूम माळतेला ईत्तीर.
3 यतिकी ना आ अनुग्रह अन कारण जो नानी सिक्याद, नीम दा टु हर ऊंद मंळसा से अनतीन कि ह्यांग सम्स पायजे अदुर देल यक्कुल यावारा भी तान तान इक सम्सबाळुल; लेकीन ह्यांग परमेश्वर हर ऊंद मंळसा अक विश्वास परिणाम इन अनुसार वाट्स बुटान, हांग अच सुबुध्दि इन सांगुळ तान इक समसुल.
4 यतिकी ह्यांग नाम शरीर दा हापाळ सा अंग आव, अदिक सप्पा अंगगोळ्द ऊंदा घाई क्याल्सा हैलेच;
5 हांग अच नाव जो हापाळ अंग ईतकु भी मसीह दा आबुर दाबुर अंग आयेव.
6 याग कि आ अनुग्रह अन अनुसार जो नामी कोटकु आग्याद, नामी संदेश हेळोद वरदान सिक्याद, रा यारी भविष्यवाणी इन दान सिक्याद, आव विश्वास इन परिणाम इन अनुसार भविष्यवाणी माळुल;
7 अगर स्यावा माळोद दान सिकीदाद, रा स्यावा दा हतकु ईरूल; अगर यावारा कल्सावाळा आन, रा कल्सदुर दा हतकु ईरूल;
8 जो प्रोत्साहन कोळवाळा आन, आव प्रोत्साहन कोळुल; दान कोळावाळा उदारता देल कोळुल; अदिक जो अगुवाई माळावाळा आन, आव लगन इन सांगुळ अगुवाई माळुल; अदिक यारी दया तोरसोद दान आद, माळुल, आव खुशी देल दान माळुल.
9 नीम प्यार निष्कपट ईरूल; बुराई देल घृणा माळी; अदिक भलाई दा हतकु ईरी.
10 भाईचारा अन भाव देल आबुर दाबुर से प्यार ईटी; परस्पर आदर माळदुर दा आबुर दाबुर से वाळुसकु नळी.
11 कोशिश माळदुर दा आलसी ईरबाळुल; आत्मिक उत्सुक दा तुमकु ईरी; प्रभु उन स्यावा माळतेला ईरी.
12 आशा दा खुश ईरी; क्लेश दा स्थिर ईरी; हर समय प्रार्थना दा हतकु ईरी.
13 पवित्र लॉकुरी जो येनारा जरूरी आद, अदुर दा आंदुर्द मदत माळी; पाहुनचार माळदुर दा हतकु ईरी.
14 तान सतुसावाळेरी आशीष कोळी; आशीष अच कोळी श्राप कोळबाळी.
15 आनन्द माळावाळेर सांगुळ आनन्द माळी, अदिक वर्ला वाळेर सांगुळ वर्ली.
16 आपस दा ऊंद घाई मन ईटी; अभिमानी आगबाळी, लेकीन गरीबगोळ सांगुळ संगत ईटी; तान नजर दा तान तान इक बुद्धिमान सम्सबाळी.
17 बुराई इन बदला यारदु से बुराई माळबाळी; जो मातगोळ सप्पा लॉकुर नजर दा भला आव, अवरी माळोद कोशिश माळी.
18 येल ताका आग सकुल, नीव सप्पा मंळसागोळ सांगुळ शांती देल ईरी.
19 हे प्रियगोळा, बदला ताकोम बाळेतीर, लेकीन परमेश्वर उन सिट्ट इक मौका कोळी, यतिकी शास्त्र दा लिख्सकु आद, “बदला ताकोमोद नान क्याल्सा आद, प्रभु अनतान ना अच बदला ताकोमाईन.”
20 लेकीन “अगर नीन दुश्मन उपासा आन रा आऊक तिनली कोळ, अगर नीरअळ्क देल आन रा आऊक नीर कुळ्स; यतिकी हिंग माळदुर देल आव खुद अच नीन से शर्मिंदा आदान.”
21 बुराई देल हारूसबाळी, लेकीन भलाई देल बुराई इक जीतुस कोमी.