7
मदा जीवन इन उदाहरण
1 हे वार्टुरा अदिक आकतींगेरा, येन नीव जान्सालीर, ना व्यवस्था अन जान्सावाळेर से अनतीन, कि यागासताका मंळसा जित्ता ईरतान, आगासताका आऊन मा व्यवस्था अन अधिकार ईरतद?
2 उदाहरण इन साटी ऊंद मदावळ्त आर्त तान मान्नावाळा अन व्यवस्था अन अनुसार आगासताका बंधन दा आर यागासताका आकिन मान्नावाळा जित्ता आन लेकीन अगर आकिन मान्नावाळा सोतोगतान रा आक मदा संबंधी व्यवस्था देल मुक्त आगेगतार.
3 इदुरसाटी अगर गांड्ड उन जीते जी आक यावारा दुसरा गंळ्स उन आगेगुल, रा व्यभिचारिणी अंदकु आदार, लेकीन अगर गांड्ड सोतोगुल, रा आक आ व्यवस्था देल बिट्टोदुर, ईल ताका कि अगर यावारा दुसरा गंळ्स उन आगेदुर तरी भी व्यभिचारिणी ठहरूसतीदील.
4 हांग अच हे नान वार्टुरा अदिक आकतींगेरा, नीव भी मसीह अन मय इन द्वारा व्यवस्था अन साटी सोतकु बनसेदीर, कि आ दुसरा अन आगेगी, जो सोत्तुर दा टु जित्ता आदुन: ताकी नाव परमेश्वर उन स्यावा दा उपयोगी ठहरुसुल.
5 यतिकी याग नाव शारीरिक स्वभाव इन हात्ती ईरेव, रा पापगोळ अभिलाषागोळ जो व्यवस्था अन द्वारा ईरोद, मृत्यु अन काय पैदा माळोर साटी नाम अंगगोळ दा क्याल्सा माळोद.
6 लेकीन यार्द बंधन दा नाव ईरेव आऊन साटी सोतकु, ईग व्यवस्था देल हिंग बिटोदेव, कि शास्त्र लेख इन हाळोद रीति मा ईला, उलटा आत्मा अन व्हाशोद रीति मा स्यावा माळतेव.
व्यवस्था अदिक पाप
7 रा नाव येन अंदेव? येन व्यवस्था पाप आद? यागलु ईला! उलटा बिना व्यवस्था अन ना पाप इक अरालीन: व्यवस्था अगर ईला अनाईत, कि लालच माळबाळ रा ना लालच इन बारा दा ईला जान्स सकायदिन.
8 लेकीन पाप मौका नोळकु आग्या अन द्वारा नान दा सप्पा प्रकार इन लालच पैदा माळ्त, यतिकी बिना व्यवस्था अन पाप मुर्दा आद.
9 ना रा व्यवस्था अन बिना पयले जित्ता ईरीन, लेकीन याग आग्या बत्त, रा पाप जित्ता आगेत, अदिक ना सोतोदीन.
10 अदिक अदा आग्या जो जीवन तरोरसाटी ईरोद, नान साटी मृत्यु उन कारण ठहरूस्त.
11 यतिकी पाप मवका नोळकु आग्या अन द्वारा नानी बहकुस्त, अदिक अदुर्दा द्वारा नानी कोंद भी बुळ्त.
12 इदुरसाटी व्यवस्था पवित्र आद, अदिक आग्या भी सही अदिक वळ्लीद आद.
13 रा येन अद जो वळ्लीद ईरोद, नान साटी मृत्यु ठहरूस्त? यागलु ईला! लेकीन पाप आ वळ्लीद वस्तु उन द्वारा नान साटी मृत्यु उक पैदा माळावाळा आत कि अदुर पाप आगोद प्रगट आगुल, अदिक आग्या अन द्वारा पाप हापाळ अच पापमय ठहरूसुल.
बुळ्क इन लळाई
14 नाव जान्सतेव कि व्यवस्था रा आत्मिक आद, लेकीन ना शारीरिक अदिक पाप इन कय देल मारकु आईन.
15 जो ना माळतीन अदरी अरालीन; यतिकी जो ना चाहासतीन अद माळालीन, लेकीन यदुर देल नानी घृणा बरतद अदा माळतीन.
16 अगर जो ना चाहासालीन अदा माळतीन, रा ना मान्स कोमतीन कि व्यवस्था भला आद.
17 रा हिंग दशा दा अदुर्द माळावाळा ना आल्लच, उलटा पाप हुन जो नान दा कुर्तकु आद.
18 यतिकी ना जान्सतीन कि नान दा मतलब नान मय दा यातोदु वळ्लीद वस्तु वास माळाल्द. इच्छा रा नान दा आद, लेकीन वळ्लीद क्याल्सा नान से आग सकालव.
19 यतिकी यातोद वळ्लीद क्याल्सा अन ना इच्छा माळतीन, अद रा माळालीन, लेकीन यातोद बुराई अन इच्छा माळालीन, अदा माळतीन.
20 इदुरसाटी अगर ना अदा माळतीन यदुर्द इच्छा माळालीन, रा अदुर्द माळावाळा ना ईतीदील, लेकीन पाप जो नान दा कुर्तकु आद.
21 ई प्रकार ना ईद अनुभव ताकोमतीन कि याग भलाई माळोद इच्छा माळतीन, रा बुराई नान से आगतद.
22 यतिकी ना अंतर आत्मा देल रा परमेश्वर उन नियम देल हापाळ खुश ईरतीन.
23 लेकीन नानी तान शरीर दा दुसरा प्रकार इन व्यवस्था कांळ्सकु बिळतद, जो नान दिमाक इन नियम देल लळाई माळतद अदिक नानी पाप इन नियम इन बंधन दा हाकतद जो नान शरीर दा आद.
24 ना ह्यांग दुखी मंळसा आईन! नानी ई मृत्यु उन मय देल याव बिळस्यान?
25 जो नानी पापगोळ देल छुटकारा कोळतान आ प्रभु यीशु मसीह अन द्वारा आ परमेश्वर उन धन्यवाद माळतीन. ईत्ता प्रकार बुद्धी देल परमेश्वर उन नियम इन पालन माळतीन.