2
इफिसुस उक बातणी
1 “इफिसुस उन मंडली इन स्वर्गदूत उक ईद लिख्स:
“जो येळु तारा तान ऊम्मा कय दा हुळकु आन, अदिक व्हान्ना अन्द येळु दिंग्या ईटोद जागा अन्द न्याड्या दा टेटतद, अद ईद अनतद कि
2 ना नीन क्याल्सा, नीन मयनत, अदिक नीन धीरज इक जान्सतीन; अदिक ईद भी कि नी बेकार लॉकुरी नोळ सकाल, अदिक जो तान तान इक प्रेरित अनतार, अदिक आल्लच, आंदरी नी परखुस्कु ख्वाटा माळ्द.
3 नी धीरज हुडुत्या, अदिक नान हेसुर इन साटी दुख नेगुत नेगुत थक्सीदील.
4 लेकीन नानी नीन खिलाप ईद अनोद आद कि नी तान पयला अन्द घाई प्यार बिटबुट्या.
5 इदुरसाटी याद माळ कि नी यल टु बिद्या, अदिक मन तिर्गुस अदिक पयला अन्द घाई क्याल्सा माळ. अगर नी मन तिर्गुसतिदिल, रा ना नीन हात्ती बंदकु नीन दिंग्या ईटोद जागा अक अदुर जागा दा टु सरकुस बुळाईन.
6 लेकीन हव, नीन दा ईद मात रा आद कि नी नीकुलइयोगोळ्द क्याल्सागोळ देल घृणा माळत्या, आंदुर देल ना भी नफरत माळतीन.
7 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, ना आऊक आ जीवन इन मार्र दा टु जो परमेश्वर उन स्वर्गलोक दा आद, काय तिनली कोळाईन.”
स्मुरना अक बातणी
8 “स्मुरना अन्द मंडली इन स्वर्गदूत उक ईद लिख्स:
“जो पयला अदिक आखरी आन, जो सोतोगीदुन अदिक ईग जित्ता आगेग्यान, आव ईद अनतान कि
9 ना नीन क्लेश अदिक गरीबी इक जान्सतीन लेकीन नी धनी आय, अदिक जो लॉकुर तान तान इक यहूदी अनतार अदिक आल्लच, लेकीन शैतान उन सभा उर, आंदुर अपमान इक भी जान्सतीन.
10 जो दुख नीनी झेलसोद बिद्दीत, अऊर देल अंजबाळ. यतिकी नोळी, शैतान नीम दा टु काईक मुंदुरी जेलखाना दा हाकावाळा आन ताकी नीम परख आग सकुल; अदिक नीमी हत्त दिन ताका क्लेश नेगोद बिद्दीत. जीव कोळासताका विश्वासी ईर, रा ना नीनी जीवन इन मुकुट कोळाईन.
11 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, आऊक दुसरा मृत्यु देल नुकसान आगतीदील.”
पिरगमुन उक बातणी
12 “पिरगमुन उन मंडली इन स्वर्गदूत उक ईद लिख्स:
“यार हात्ती येढ्ढ धार इंद अदिक तेज तलवार आद, आव ईद अनतान कि
13 ना ईद जान्सतीन कि नी अल ईरत्या यल शैतान उन सिंहासन आद; नी नान हेसुर मा स्थिर ईरत्या, अदिक नान मा विश्वास माळदुर देल आ दिनगोळ दा भी हिंद हटसीदिल यदुर दा नान विश्वासयोग्य गवाह अन्तिपास, नीम न्याड्या आ जागा मा घात माळकु आदुन यल शैतान ईरतद.
14 लेकीन नानी नीन खिलाप येनारा मातगोळ माताळोव आव, यतिकी नीन अल काईक मुंदुर हिंग आर, जो बिलाम इन शिक्षा अक मान्सतार, याव बालाक उक इस्त्राएलीगोळ्द मुंद ठोकर इन कारण ईटोद कल्सदुन कि आंदुर मूर्तीगोळ मा येर्सद चीजगोळ तिनुल अदिक व्यभिचार माळुल.
15 हांगा नीन अल काईक हिंग आर, जो नीकुलइयो अन्द शिक्षा अक मान्सतार.
16 इदुरसाटी मन तिर्गुस, ईलारा ना नीन हात्ती राटनेरी बंदकु तान बाय इन तलवार देल आंदुर सांगुळ लळाई माळाईन.
17 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, आऊक ना गुप्त मन्ना दा टु कोळाईन, अदिक आऊक ऊंद बिळीद कल्ल भी कोळाईन; अदिक आ कल्ल मा ऊंद हेसुर लिख्सकु ईत्तीत, अदरी हासिल माळावाळेर्द अलावा अदिक याऊ अदरी अरूतीदील.”
थुआतीरा अक बातणी
18 “थुआतीरा अन्द मंडली इन स्वर्गदूत उक ईद लिख्स:
“परमेश्वर उन पार यारव कण्णगोळ बेक्की इन ज्वाला घाई, अदिक यारव कालगोळ वळ्लीद पीतळा अन्द घाई आव, आव ईद अनतान कि
19 ना नीन क्याल्सागोळ, नीन प्यार अदिक विश्वास अदिक स्यावा अदिक धीरज, इक जान्सतीन अदिक ईद भी कि नीनव हिंदळोव क्याल्सा पयले से वळ्लेव आव.
20 लेकीन नानी नीन खिलाप ईद अनोद आद कि नी आ आर्त इजेबेल इक ईरगोळत्या जो तान तान इक भविष्यवक्ता अनतार, अदिक नान दासगोळी व्यभिचार माळली अदिक मूर्तीगोळ मा येर्सद चीजगोळी तिनोद कल्सकु भरमुसतार.
21 ना आकिक मन तिर्गुसोर साटी मवका कोट्टीन, लेकीन आक तान व्यभिचार देल मन तिर्गुसोद चाहासालुर.
22 नोळ, ना आकिक व्हर्स मा हाकतीन यल आक रोगशैय्या मा ईरोर; अदिक जो आकिन सांगुळ व्यभिचार माळतार अगर आंदुर भी आकिन घाई क्याल्सागोळ देल मन तिर्गुसतिदिल रा ना आंदरी धोळ्द क्लेश दा हाकाईन.
23 ना आकिन चिकोर इक कोंद बुळाईन; आग सप्पा मंडली जान्स कोंडीत कि दिल अदिक मन इक अरावाळा ना अच हुईन, अदिक ना नीम दा टु हर ऊंद मंळसा अक आऊन क्याल्सा अन्द अनुसार बदला कोळाईन.
24 लेकीन नीव थुआतीरा अन्द बाकी लॉकुर से, यास ई शिक्षा अक मान्सालुर अदिक आ मातगोळी यवरी शैतान उन गयरा मातगोळ अनतार जान्सालीर, ईद अनतीन कि ना नीम मा मात्त ओझा हाकतिदिल.
25 लेकीन हव, जो नीम हात्ती आद अदरी नान बरासताका ताका रोक्सकु ईटी.
26 “जो विजय हासिल माळुल अदिक नान क्याल्सागोळ्द अनुसार आखरी ताका माळ्त ईरूल, ना आऊक गैर यहूदी लॉकुर मा अधिकार कोळाईन,
27 अदिक आव लोवा अन्द छळी हुडुकु आंदुर मा राज्य माळ्यान, याता प्रकार गळग्या माळावाळा नव मुण्ण इन बर्तन चकनाचुर आगेगताव: नानी भी हिंगा अधिकार तान आप्प उन हात्ती टु सिक्याद;
28 अदिक ना आऊक व्हातुर इंद तारा कोळाईन.
29 यार किव ईतीदाव आव केळ कोमुल कि आत्मा मंडलीगोळ से येन अनतद.”