4
Is-ra-ên Ùh Chìuq Tawìh Iu Tiaq Chuaq
1 Ô 'bài 'bo can Basan ŏi ta bôi wang Sa-ma-ri, tamàng cô!
Pì padit padiang mangai pa, baxa mangai nan,
hi khoi doi dèh ca ŏng: “ 'Ràng dahwèq ôq ca bèn ôq beq!”
2 Chuaq Boc Plình khoi yŏc bìac hadròih da Haq pachac doi:
“ 'Bài hì padon trùh, wì wê long glêh dùng 'noh pì,
wa mangai ŏi xrong hlài da pì 'bìq dùng 'noh xam pla axai enh Taneh Diac cô.
3 Wì dùng pì tang ngai chiu
loh ti 'bài trom ma hlùh da panàt phôq,
hwenh ca'nìh pì ta Hamôn.”
Chuaq doi 'màng aih.
4 “Lam trùh ta Bêtên broq tôiq beq;
lam trùh ta Gingan broq tam bàc tôiq beq!
Rìm xroq 'ràng trùh ngè tadreo wa ngè mòiq phàn mòiq jàt,
piq hì pì dèch am mòiq yàng!
5 Bùh ngè tadreo manè pôi xam 'benh i blo beq;
anoi 'noh 'bài ngè tadreo to dèch am canhè ca phù cròng loq,
ô con caiq Is-ra-ên,
taiq pì enh broq 'màng aih.”
Chuaq doi 'màng aih.
6 “Mahaq Au, Au khoi am bìac pangot hrah trùh ta rìm phôq da pì,
broq ca pì thìuq ca 'benh ta rìm nòi pì ma ŏi.
'Nhac ca 'màng aih, pì xôq ùh wìh hlài ta Au!”
Chuaq doi 'màng aih.
7 “Au ùh ca'nìh mè
piq khê adroi ca jò gat;
Au am mè ca phôq cô
mahaq ùh am mè ca phôq tau;
đùng tamang cô jah i diac mè;
đùng tamang tau croh crenh ùh i ca diac.
8 Taiq 'màng aih, wì enh baiq piq phôq cô lam tùm jènh trùh phôq tau đòiq chaq diac ôq,
mahaq chaq ùh jah.
Mahaq pì xôq ùh wìh hlài ta Au.”
Chuaq doi 'màng aih.
9 “Au yŏc cayeo tôq
wa hadrùng đòiq baxa pì.
I bàc wia cachiq, wùan nho, long ôliu da pì hadrùng caq dìq dŏng,
mahaq pì ùh wìh hlài ta Au.”
Chuaq doi 'màng aih.
10 “Au thê can hinìq ramòt trùh ta pì
tìah ca ta Aicàp.
Au thê chang jêh đac 'bài gu radam da pì;
'bài axêh pì khoi 'bìq rùp 'nong lam.
Au broq can xua om loh enh traiq lình pì pan mùt ta mùh pì,
mahaq pì ùh wìh hlài ta Au.”
Chuaq doi 'màng aih.
11 “Au hacùp đac pì
tìah ca jò Boc Plình hacùp đac Sôđôm wa Gô-mô-ra,
pì tìah ca catŏch ùnh dŏih loh khoi ca tanùh ùnh.
Mahaq pì ùh wìh hlài ta Au.”
Chuaq doi 'màng aih.
12 “Ô Is-ra-ên, Au jah broq ca ìh 'màng aih;
Ô Is-ra-ên, taiq Au jah broq ca ìh 'màng aih,
padon beq đòiq glàm Boc Plình ìh.”
13 Joq 'màng aih,
Haq khoi broq rôm wang wa broq cayeo;
Haq broq con mangai loq ca manoh Haq;
Haq broq daxroq loh clam clôiq,
Haq cadiang lam ti 'bài nòi ha'nhèq ta crŏng taneh.
Hiniq Haq Chuaq ma wèq dìq ca 'bình plình.