6
1 'Màng aih, taiq nhèn patìh bìac pajùm ti Chuaq, nhèn xìn pì apaq nhàn bìac am dech da Boc Plình loh ca 'ngwan.
2 Ma jah 'màng aih Haq doi:
“Au khoi tàng bàu ìh ta jò ta'nàih,
Au khoi jùp đò ìh ta hì dèch claih.”
Manàiq cô raq jò ta'nàih, manàiq cô raq hì dèch claih.
3 Nhèn ùh broq bìac cleq đòiq cabô catŏih cro, waq ca bìac patìh Chuaq da nhèn ùh hìaq i mangai leq jah trech.
4 Mahaq nhèn broq ca dađeh tajì ca mangai hapŏng 'yoh Boc Plình ta rìm bìac: nhò manoh ran chìuq àt dìq jaq, ta bìac nan xa, ta bìac nan tùng, ta bìac xalep,
5 chìuq blai, chìuq ŏi tù, chìuq baxa, chìuq xalep, rìu tacrôh, pangot;
6 ta bìac lem hreo, ta bìac 'nì loq, ta bìac nui chìuq àt, xam manoh loq xa-ŏch ca mangai, nhò Yiang Hadròih, ta manoh loq waq joq 'nàng,
7 nhò bàu capoch joq 'nàng, nhò cwìang itai da Boc Plình, nhò ranac ta-atoq ŏi ta tì 'ma wa tì 'ngeo,
8 'nhac ca jah padèch loq 'bìq wì hanip, 'nhac ca jah bàu manè loq bàu 'mèq, ngan nhèn tìah ca mangai capoch amòng, mahaq nhèn capoch bàu joq 'nàng,
9 ngan tìah ca wì ùh canao, mahaq wì canao loq ca nhèn, ngan tìah ca ten cachìt, mahaq manàiq xôq rìh, ngan tìah ca 'bìq baxa, mahaq ùh 'bìq jêh đac,
10 ngan tìah ca mango mahaq jah lem bùi hloi hloi, ngan tìah ca papiang, mahaq joq 'nàng nhèn broq ca bàc ngai jah can padrŏng, ngan tìah ca ùh i ca cleq, mahaq jah tôm tàu rìm bìac.
11 Ô mangai Cô-rinh-tô, nhèn khoi pèh manoh rùng rai capoch ca pì bàu jang.
12 Ùh xài nhèn 'biaq manoh ca pì, mahaq taiq pì 'biaq manoh ca nhèn.
13 Pì phai broq ca nhèn 'màng ca nhèn khoi broq ca pì beq. Au anoi ca pì tìah ca anoi dèh ca con 'yoh, pì hadai pèh dèh manoh cla beq.
Hnem Cùh Waiq Da Boc Plình
14 Apaq bac long ech pajùm ti mangai ùh lùi, ma jah 'màng aih trong ta-atoq wa trong ngan dù jah pajùm ti dabau 'mòh? Can 'ngah wa can clam jah ta'mùt ti dabau 'mòh?
15 Chuaq Jêxu Crich wa kiac Satan ma jah pajùm ca dabau 'mòh, loq mangai lùi jah pajùm ti mangai ùh lùi 'mòh?
16 Hnem cùh waiq Boc Plình wa dua 'mù da kiac dù jah pajùm ti dabau 'mòh? Ma jah 'màng aih bèn hnem cùh waiq da Boc Plình ma rìh hloi, troi Boc Plình khoi doi:
“Au jah ŏi enh dalam ca wì haq
wa lam hlài ta'ne wì haq.
Au jah broq Boc Plình da wì haq,
wì haq broq jàn Au.”
17 'Màng aih Chuaq doi:
“Loh khoi ca wì haq beq.
Wia hangai ca ngè amùa amech,
èh Au jah nhàn pì.”
18 “Au jah broq Baq pì,
pì broq con calô con cadrì Au,
Chuaq I Cwìang Itai Dìq Dŏng doi 'màng aih.”