35
Bàu Hadrah ca Êđôm
1 Èh bàu Chuaq doi ca au:
2 “Ô con mangai, tangìa ngìa pah wang Sirò, capoch bàu doi adroi tajraq hlài ca haq beq.
3 Doi ca haq: ‘Chuaq Boc Plình doi 'màng cô: Ô wang Sirò, cô, Au tajraq hlài ca gè! Au dèch tì tajraq hlài ca gè, broq dìq ca gè loh ca wang wê.
4 Au jah broq ca 'bài phôq da gè loh đùng braih, phàn gè loh ca wang wê, jò aih gè jah loq Au Chuaq.
5 “ ‘Taiq gè wê yôt manoh tarènh, wa khoi jao con caiq Is-ra-ên ca pla chang gùm ta hì ranàc wì haq, ta jò baxa pulùch,
6 taiq nen aih, Chuaq Boc Plình doi: Joq 'nàng troi Au ma rìh hloi, Au khoi padon đòiq gè ca mahem, mahem jah hnan tiaq gè; taiq gè ùh git ca mahem, dài mahem hnan tiaq gè!
7 'Màng aih Au jah broq ca wang Sirò loh dìq jaq wang wê, wa jêh cachìt dìq mangai ran cadàu claih wa mangai leq wìh hlài ta aih.
8 Au jah broq ca 'bài bôi wang haq bình ca hanang mangai 'bìq jêh đac; 'bài mangai 'bìq pla chang gùm jêh đac jah tacro cachìt ta 'bài bôi go gè, ta 'bài thòng wa ta'ne 'bài diac cròng gè.
9 Au jah broq ca gè loh ca wang wê hloi hloi; 'bài phôq gè pi i ca mangai jàn ŏi hòm, wa pì jah loq Au cô Chuaq.
10 “ ‘Taiq gè i doi: “Baiq jàn aih wa baiq Diac aih jah hlài ta au, au jah blah yŏc wa haq,” 'nhac ca Chuaq 'nang ŏi ta aih;
11 Taiq 'màng aih Chuaq Boc Plình doi: Joq 'nàng troi Au ma rìh hloi, Au tabroq ca gè xam bìac nòih wa bìac git ma gè khoi tarènh wa tajraq hlài ca wì haq, wa jò Au hadrah gè, wì haq jah loq ca Au.
12 Èh gè jah loq Au cô Chuaq, taiq Au khoi tàng bàu waiq hanip gè khoi capoch loh tajraq hlài ca 'bài wang Is-ra-ên gè doi: “ 'Bài wang aih khoi 'bìq loh wìa nòi catù; khoi wìa hanùm ca bèn.”
13 Pì khoi yŏc dèh hacùng catèh dađeh tajraq hlài ca Au, wa khoi tam bàu tajraq hlài hlài ca Au. Joq 'nàng, Au khoi tàng bìac aih!
14 Chuaq Boc Plình doi 'màng cô: Jò dìq ca crŏng taneh lem bùi, Au jah broq ca gè loh ca wang wê.
15 Taiq gè khoi lem bùi ca cùng hang hnem Is-ra-ên 'bìq wìa nòi catù, 'màng aih Au tabroq ca gè hadai 'màng aih. Ô wang Sirò, gè wa dìq ca Êđôm, gè jah loh wìa nòi catù, èh wì haq jah loq Au cô Chuaq.’ ”