2
Bìac Baxa Wa Bìac Am Xôq Ramŏt
1 “Creo ca oh daq calô da ìh aih: ‘Am-mi,’ wa oh daq cadrì da ìh aih: ‘Ru-ha-ma.’
2 “Ta'mòq tôiq ca miq pì, ta'mòq beq,
taiq haq pi xài mai au,
au pi xài ŏng haq!
Thê haq cađac bìac tango anang ta hadrò haq
wa bìac tango khoi enh tôh haq,
3 Tàng ùh èh, au luch haq loh ca rahòng,
tìah ca hì 'nang xa-ông ca haq;
hadai broq ca haq loh tìah ca đùng wang wê,
tìah ca taneh croh,
broq ca haq cachìt ca croh ranŏng.
4 Au ùh xa-ŏch ca con caiq haq,
taiq con aih con da bìac tango anang.
5 Joq 'nàng 'màng aih, miq wì haq khoi broq tôiq tango anang,
mangai ŏi jiang ca wì haq khoi broq bìac camaih.
Ma jah 'màng aih haq doi: ‘Au lam tiaq dèh 'bài mangai au ma enh waq,
wì am ca au 'benh, diac,
xàc trìu, bai, dàu wa dahwèq ôq.’
6 Taiq 'màng aih, Au yŏc hila crùh tàt trong haq,
broq panàt dudan ca haq, đòiq haq chaq ùh hnoq trong loh.
7 Haq hnan tiaq mangai haq ma enh waq mahaq ùh tem,
chaq mahaq ùh hnoq.
Hi khoi haq doi ca dađeh:
‘Manàiq au wìh hlài dèh ta ŏng ma baxèm,
ma jah 'màng aih jò aih au yi xùang ca manàiq.’
8 Joq 'nàng haq ùh loq Au cô khoi am ca haq 'mau mì,
alac neo wa dàu,
Au khoi am ca haq bàc 'bac wa wang
mahaq wì haq lam tadreo ca Ba-an.
9 “Taiq 'màng aih, ta jò gat, Au yŏc hlài dèh 'mau,
wa alac nho neo da Au jò mùa.
Au hadai yŏc hlài dèh xàc trìu wa bai habùac da Au,
aih bai đòiq ca bàng chac rahòng da haq.
10 Jò aih, Au pa'noh bìac 'mèq haq
ŏi jang ngìa mangai haq ma enh waq,
ùh i ca cabô jah dŏih haq claih enh tì Au.
11 Au tàt đac bìac lem bùi da haq,
'bài hiniang, hì khê neo,
hì Sabat wa dìq ca 'bài hì lè càn da haq.
12 Au raliang đac 'bài long nho wa long pŏc haq,
'bài long ma haq doi: Cô 'bac cùng da 'bài mangai ma loq waq am ca au.
Au jah broq ca 'bài long aih loh rôm
wa 'bài ngè rôm caq dŏng.
13 Au baxa haq taiq haq bùh nhŏng ca 'bài dua 'mù Ba-an,
haq halŏng hatai,
wa bac ngè canaq 'bac,
hnan tiaq mangai haq ma enh waq,
mahaq haq hèt ca Au!”
Chuaq doi 'màng aih.
Diac Is-ra-ên Jah Ha'naoq Hlài
14 “Taiq 'màng aih, cô Au alùan haq,
'nong haq mùt ta đùng wang wê,
capoch ca haq bàu rangot.
15 Enh nòi aih, Au am ca haq wùan nho,
broq ca thòng tamang Acô wìa 'mang ngèh gòm.
Ta nòi aih, haq tiaq bàu Au tìah ca jò haq ŏi thì,
tìah ca hì haq loh khoi enh taneh Aicàp.”
16 Chuaq doi:
“Hì aih èh ìh creo ca ‘Au ŏng,’
pi creo ca ‘Ba-an hòm.’
17 Au jah don đac hiniq da dua 'mù Ba-an loh khoi enh hacùng haq;
èh pi i ca cabô ràu hiniq aih hòm.
18 Ta hì aih, Au jah broq wêh jao ca pì wa ca 'bài ngè ta rôm,
ca 'bài chìm ta plình, wa ngè 'yêq ta crŏng taneh.
Au goh đac wa bahnhung đac 'bài panenh, 'bài chang,
wa bìac tajêh poh khoi ca crŏng taneh,
wa am ca jàn jah catèm.
19 Au ta'nèp ca ìh hloi hloi;
Au ta'nèp ca ìh ta bìac ta-atoq wa bìac lem jang,
can xa-ŏch xam manoh loq waq wa can xa-ŏch.
20 Joq 'nàng, Au ta'nèp ìh tìah ca mai da Au xam manoh wèq dèh bàu;
jò aih ìh jah loq ca Chuaq.”
21 Chuaq doi: “Ta hì aih,
Au jah tèo bàu waiq dang,
Au jah tèo bàu waiq dang da 'bài lòp plình,
èh 'bài lòp plình jah tèo bàu waiq dang da taneh.
22 Taneh jah tèo bàu am 'mau,
am alac nho neo, am dàu,
piq hiniq cô jah tèo bàu ca Jê-rê-ên.
23 Khoi èh Au jah rai haq ca Au ta taneh.
Au xa-ŏch ca mangai 'nhòq jah xa-ŏch,
hi doi ca jàn ùh xài jàn Au nèh: ‘Ìh jàn Au!’
Wa jàn aih tèo: ‘Ìh Boc Plình nhèn.’ ”