11
Xôpha Lech Ca Jop
1 Èh Xôpha, mangai Na-a-ma, tèo hlài:
2 “Ùh i mangai leq khòh tèo hlài mangai capoch bàc 'mòh?
Ma xài mangai capoch bàc èh jah doi haq ta-atoq?
3 Ma xài ìh catèh èh jah broq ca wì àt?
Jò ìh capoch halê, ma ùh i ca cabô lech ca ìh?
4 Taiq ìh khoi doi ca Boc Plình: ‘Au lem hreo
ŏi jang ngìa Chuaq.’
5 Mahaq ngèh enh Boc Plình hnài ìh, pèh hacùng Haq,
tajraq hlài ca bàu capoch da ìh,
6 ngèh enh Haq pa'noh ca ìh loq bìac jrùq hlèp da can khôn rabiaq!
Ma jah 'màng aih khôn rabiaq da Chuaq joq 'nàng jrùq hlèp. Manàiq cô, ìh ep loq, Boc Plình hadrah yi biaq ca tôiq ngang dù da ìh khoi broq.
7 “Tàng ìh hamòt, ìh nui loq bìac jrùq hlèp da Boc Plình,
wa loq ro enh dalam Chuaq I Cwìang Itai Dìq Dŏng 'mòh?
8 Bìac khôn rabiaq da Boc Plình yi ha'nhèq ca plình,
ìh broq jah cleq? Yi jrùq ca nòi ralùng cachìt. 'Màng leq ìh jah loq 'nì dìq?
9 Bìac jrùq da Boc Plình yi càn ca plì taneh,
yi rùng ca diac raxìq.
10 “Tàng Boc Plình lam cwa rùp mangai, khoi èh 'noh hadrah mangai aih,
tah ta hnem tù, cabô hùa tàt Haq?
11 Ma jah 'màng aih Haq loq ca mangai leq bàu lem manoh dù.
Haq ngan hnoq tôiq lôi ma con mangai ùh jah loq.
12 Mangai blùng ùh wìa khôn rabiaq hadai tìah lùa brì ùh jah xa-ông loh con mangai.
13 “ 'Màng aih, tàng ìh padon dèh manoh tawìh ta Chuaq,
hnhu tì tangìa ta Chuaq, 'màng aih, tàng ìh padon dèh manoh tawìh ta Chuaq, dèch tì tangìa ta Haq,
14 Tàng i tôiq lôi ta tì ìh, phai cađac dìq hangai beq,
paq đòiq bìac ngang dù ŏi ta traiq ìh,
15 jò aih èh, joq 'nàng ìh jah ngoi mat tŏc,
manoh ìh ùh hìaq i xìt, ùh hìaq i teo, joq 'nàng jah cajap, ùh hìaq crè lèt cleq;
16 Ìh jah hèt đac bìac nan xa,
wa hmàng ca haq tìah ca diac ma hìu.
17 'Nhòng rìh ìh jah xreo 'ngah yi hnao ca jò 'ne hì;
can clam clôiq atìq èh jah loh tìah ca daxroq.
18 Èh ìh jah ŏi catèm taiq i bìac jah ngèh gòm;
jah wèq ngan pôn pah wa jah cùi padài catèm.
19 Ìh jah ca'nùng, pi i ca cabô broq ca ìh crè.
Bàc ngai jah chaq Ìh xìn bìac xôq ramŏt.
20 Mahaq mat mangai ngang dù jah lep tagah;
haq ùh i ca nòi mot;
wì haq toq ngèh gòm bìac pat hihèm pulùch.”