14
Jop Pa'noh Bìac Xalep Da Con Mangai
1 “Con mangai clìh enh cliac miq,
rìh đò toq 'biaq hì, bình halùih bìac xa lep.
2 'Nhòng rìh da con mangai 'màng ca riang đah,
khoi èh 'bìq tagoh đac; lam cwa 'màng ca 'mù, ùh jah ŏi dùnh.
3 Gleq Chuaq ma ŏi hèm trùh ca con mangai 'màng aih
wa ŏi enh hadrah haq?
4 Cabô jah yŏc bìac amùa, broq đòiq jah lem hreo ùh?
Ùh i mòiq ngai leq!
5 'Bài hì da 'nhòng rìh con mangai Chuaq khoi pajaq đòiq,
'bài khê hanam dìq ŏi ta Haq, acang Chuaq hadai khoi pajaq, đòiq con mangai ùh jah lam cwa.
6 Xìn Chuaq apaq ha'miang ngan đòiq con mangai jah padài;
'màng ca mangai abroq caq cùng broq khoi xèq dèh ca hì èh jah padài.
7 “ 'Ma jah 'màng aih 'nhac ca long khoi 'bìq cau,
èh xôq ŏi hon òn, ùh hêq ca plôh hamŏng,
8 'nhac ca riah haq khoi tagôi ta taneh,
xèm haq cachìt ta blo taneh,
9 bu i hòi diac, tajòi 'mòi haq plôh ramŏt,
wa loh hamenh 'màng ca long neo hon.
10 Mahaq con mangai, jò hi cachìt èh pi tadroq,
wa hnhung dŏng dìq; con mangai pat hihèm, khoi èh lam ta leq?
11 Tìah ca diac ta 'bau jò khoi dìq,
wa tìah ca diac cròng xŏt wa croh,
12 hadai 'màng aih, con mangai hi ca'nùng ti ha'neq èh pi yòng trùh jò lòp plình hech đac,
wa ùh i ca cabô jah broq ca haq rìu enh cùi.
13 “Ôi, ngèh enh Chuaq cadoc au ta ralùng hanang,
bàng hlèp au trùh jò Chuaq khoi brêh ca nòih, pajaq đòiq ca au jò, khoi èh hmàng hlài ca au!
14 Tàng mangai cachìt, haq jah rìh hlài ùh?
Rìm hì toq tagah lep gòm trùh jò au jah mùt cachìt èh rìh hlài.
15 Chuaq jah creo ca au, au jah tèo hlài;
Chuaq jah hmàng trùh dèh ca bìac da tì Ìh broq loh;
16 Mahaq manàiq, Chuaq rèn tang cadiang au lam,
hi ngan 'bài tôiq lôi au;
17 'Bài tôiq au khoi tah đòiq ta mòiq toq ayôp càt ngah,
Chuaq jah bàng hlèp tôiq lôi da au.
18 “Mahaq, 'màng ca bôi wang ralàih loh blo,
hmu daxìch khoi dèh ca nòi,
19 Tìah ca diac hìu broq mon ca hmu wa diac càn bahìu đac blo taneh;
hadai 'màng aih, Chuaq bahnhung đac bìac ngèh gòm da con mangai.
20 Chuaq jêh con mangai, khoi èh con mangai loh lam;
Chuaq tablòq hadrò con mangai xam can cachìt, wa drùh đac con haq loh lam khoi ca mangai rìh.
21 Con caiq haq jah padèch, mahaq haq ji ùh 'nì,
loq wì haq 'bìq loh ùh nèn, haq ji ùh canao loq.
22 Haq toq loq dèh ca can jìq xa dađeh,
toq crò hmoi ca dađeh.”