19
Jop Ngèh Gòm Waq ca Hnoq Yiang Rŏt Dèch Haq
1 Èh Jop tèo hlài:
2 “Pì broq ca au chìuq jìq xa
wa padit au xam bàu capoch dùnh dàng leq hòm?
3 Khoi 10 yàng pì jù lê au;
pì ùh 'nì camaih jò broq ùh troq ca au.
4 Tàng au joq 'nàng khoi broq tôiq 'màng leq,
tôiq aih xôq tôiq da au.
5 Tàng pì joq 'nàng enh padèch dađeh tajraq hlài ca au,
wa enh patô ro bìac 'mèq da au,
6 'màng aih, pì ep loq cla Boc Plình khoi broq ùh troq ca au,
Haq khoi tang hlàm Haq dudan ca au.
7 “Tàng au creo dang: Jùp đò au beq!
Mahaq ùh i cabô rùp bàu au. Au creo xìn dèch au, mahaq ùh i ca bìac ta-atoq leq trùh ta au.
8 Chuaq broq pagia tàt trong au, au ùh jah lam cwa;
Chuaq đòiq can clam clôiq ŏi ta trong au lam.
9 Chuaq khoi dŏih đac 'ngah 'ngai da au,
wa dŏih đac cadoh 'ngah lem loh khoi enh gàu au.
10 Chuaq khoi pacro au rìm pah,
wa au loh ca hnhung;
Haq bùiq đac bìac au ngèh gòm 'màng ca bùiq đac long tabùiq xam riah.
11 Chuaq hadai loh nòih ca au,
ngan au tìah ca mangai tagit ca Haq.
12 'Bài lình Haq khoi adràc dabau lam broq trong đòiq glàm jêh au,
wa broq traiq dudan ca traiq au.
13 “Chuaq khoi broq ca 'bài oh daq au hangai ca au,
wa 'bài mangai canao ca au loh ca mangai pi canao ca au.
14 Oh daq au dìq khoi cađac au,
'bài mangai bua au dìq khoi hèt ca au.
15 'Bài mangai ma ŏi ta hnem au wa 'bài hapŏng cadrì ngan au bu dàng tamoi ùh canao;
ŏi jang ngìa wì, au bu dàng mangai enh Diac 'noiq.
16 Au creo ca hapŏng au, mahaq haq ùh tèo,
'nhac ca au yŏc bàu waiq xìn dang haq.
17 Hòi gahà au broq cadròt ca mai au,
wa au bìac ramòt ca oh daq au.
18 Trùh 'mòi 'bài con 'yoh hadai khìn au;
tàng au yòng, wì capoch halê au.
19 Dìq ca bua au ramòt ca au,
'bài mangai ma au loq waq khoi tawìh tajraq hlài ca au.
20 Caxènh au top ca akia wa xech au,
au jah ŏi rìh toq akia glom hanenh.
21 “Ôi 'bài bua au, xa-ŏch ca au dìq, xa-ŏch ca au dìq!
Taiq tì da Boc Plình khoi jêh au.
22 Gleq pì ma ŏi padit padiang au tìah troi Boc Plình broq;
pì padit baxa ca au dàng aih 'nhòq hêq 'mòh?
23 “Ôi, ngèh enh ca bàu au jah achìh hlài!
Ùac aiq waq jah achìh 'mùt ta sech!
24 Yŏc long achìh xam mem wa tanàm,
achìh 'mùt ta hmu đòiq jah ŏi trùh hloi hloi!
25 Phàn au, au loq Chuaq ma Rŏt Dèch Hlài au xôq ŏi rìh,
trùh hì pulùch Haq yòng ta crŏng taneh đòiq jah palem ca bìac au.
26 Atìq ca jò akia au khoi 'bìq raliang, mahaq au xôq ngèh enh,
xam chac hamac cô, ngan hnoq Boc Plình.
27 Cla au jah hnoq Haq, mat au jah ngan Haq,
ùh xài mat mangai 'noiq;
manoh au loq enh wa ngèh gòm hì aih jah renh trùh.
28 “Tàng pì hatình: Bèn jah padit padiang haq hòm,
aih bìac haq 'bìq baxa taiq tôiq cla haq,
29 èh ep crè ca mùh chang gùm,
taiq can nòih da pì đang ca baxa xam chang,
đòiq ca pì jah loq hì hadrah khoi haten.”