26
Jop Lech ca Binđat
1 Èh Jop capoch bàu tèo:
2 “Ìh joq 'nàng jùp đò mangai ìuq 'mòh?
Ìh joq 'nàng khoi dèch cŏng da mangai ùh i cwìang 'mòh?
3 Ìh dìq jaq rabiaq đòiq doi hnài mangai ùh i khôn rabiaq,
khoi pa'noh loh bàc bìac jùp đò 'nì loq!
4 Ìh khoi hnài anoi ca cabô?
I yiang da cabô khoi thê ìh broq bìac aih.
5 “Mangai cachìt tarìt tariang enh 'neq ca diac,
wa 'bài ngè ŏi ta aih hadai.
6 Ralùng hanang jah hnoq ro ŏi jang ngìa Boc Plình,
A-ba-đôn, nòi 'Bau Ùnh jrùq, ùh jah bàng hlèp jang ngìa Haq.
7 Chuaq hlèch crŏng taneh pah 'ngeo ca mat mahì loh ta nòi ùh i ca cleq;
Haq atua plì taneh ta nòi ùh i ca cah cleq.
8 Haq cayôp diac ŏi ta yùc,
'nhac ca diac bàc mahaq diac ùh broq hyah ca yùc.
9 Haq bàng mat khê panŏng,
wa hlèch yùc ta mat khê panŏng aih.
10 Chuaq chot mòiq trong dawenh enh 'nhèq ca mat diac,
trùh ti nòi acang ta'ne can 'ngah wa can clam.
11 'Bài jrang da 'bài lòp plình tadroq,
wa hamàih jò Boc Plình 'noh lech tagàih.
12 Haq 'noh dèh cwìang itai broq ca diac raxìq hatenh,
wa dèh can khôn rabiaq Haq jêh 'blêq ngè càn caiq ta diac raxìq.
13 Hihèm Chuaq broq ca 'bài lòp plình 'ngah;
tì Haq pùng hlùh bìh 'nang cadàu mot.
14 Cô toq ngan hnoq toq kiah da bìac Haq broq,
toq bàu chop capoch da Chuaq!
Mahaq cabô nui loq 'nì ca atêh hilùng da cwìang itai Haq?”